ПА̄ ВЛУС САФАР ТАР РӮМ

Па̄влусат wи амро-гу̊нен тар Ерусалӣм ҷамоат хез ца йат, wа̄δен хушизор сат! Па̄влуси нақл чӯд иде̂, Хуδойи wи хизмат қати дига халқенард чӣр чӯд, ба̄ден фукаϑ Худоwанд Wи Калӣма̄ қудрат ҷа̄т ситоwах̇ чӯд. Амо йид wев хуши дароз навуд.

Ба̄ди wӯвд рӯз Па̄влус тар ибодатху̊на̄ сут. Йуйи хойих̇ чӯд аз рӯйи қойда̄йат сунат қурбу̊ни ких̇т. Амо тарамен йаӯдийен wи wӣнтху, айбдорен wи чӯд иде̂, йу Исойи Масе та̄лӣмот па̄н ких̇т, ат wевард на Исо хуш вудат, на Wи та̄лӣмот. Wа̄δен Па̄влус анҷӯвдху хах̇аϑен қӣwд иде̂, йу wев қонӯнен иҷро наких̇тат фукаҷо йига та̄лӣмот нақл ких̇т. Ба ғайри дийен лу̊д иде̂, йуйи ху қати бегу̊на̄ мардум вӯдху, ибодатху̊на̄йи ару̊м чӯд. Ба̄ден қа̄ранд Па̄влус зима̄δва кире̂х̇тху аз ибодатху̊на̄йанден wи зиwост. Wа̄δен хойих̇ чӯд икамандаϑ зӣнен wи, амо тар ибодатху̊на̄ зӣдоw мӯмкин навуд. Рӯм лих̇кар қуманду̊н, Кла̄вдийус Лӣсийоси чӯх̇т иде̂, х̇а̄ранд фукаҷо носойах̇и, ба̄ди римод Па̄влус ɣинʒелен қати вӣсенху тар қала̄ йосен. Пу̊ндвайи Па̄влус хойих̇ чӯд иде̂, йакборга тар мардум муроҷиат ких̇т.

Йуйи йаӯдийенард нақл чӯд иде̂, цара̄нги Худоwанд қабӯл чӯдху wи гунойенен бахих̇ сат. Йаӯдийенен аwал Па̄влус га̄пен қарораϑ ниғух̇т, амо йуйи наw лу̊д иде, Худоwанди wи бох̇т, ла̄к дига халқенард мис дар борайи Масе нақл ких̇т, ат wеванд wитийаϑ wев садо биланд сут. Wа̄δен хах̇аϑ қӣwд иде̂, йид бойад зинда̄ ма̄рист. Кла̄вдийус Лӣсийоси чӯхт иде̂, йу мардум Па̄влус га̄пен қати соф лапди ҷу̊х̇ δодху, римоди тар қала̄ wи йосен. Йуйи ху аскарен римод иде̂, азоб wи кинен, амо Па̄влуси лу̊д: «Тамард дисга мӯмкин йастна̄ рӯми одам ҷазо δет? хе̂р мунд ғал му айб ма̄лум нист!»

Рӯмийенен айру̊н сатху, йичӣзгайен wи напех̇цт, амо wев ɣинʒеленен аз wити назох̇т.

Wам йига рӯзен Па̄влус тар пӣрен шӯро йод. Йаманд йу мардум δу қисм сут. Йила̄вен айбдор wи лу̊д, ат йила̄вен лу̊д иде̂, динд йичӣзаϑ айб нист. Шара̄тат норозӣги соф лапди сут. Йаӯдийенен аз фук тараф Па̄влус гирд чӯд. Кла̄вдийус Лӣсийоси х̇оҷ δӯйд иде̂, wа̄δташ тика̄ wи кинен, ба̄ди ху аскарен римод тар қала̄ wи йосен.

Х̇а̄б Худоwанд Исо Па̄влусард озир сутху, лу̊ди: «Па̄влус хах̇ ху ки, арра̄нгат Ерусалӣманд дар борайи Му нақл ца чӯд, Рӯмандта мис бойад ик дисга нақлийен кини!»

Ба̄ди дийен во Па̄влус цу̊нд пӣδга пурсупос чӯдат, цу̊нд пӣδгайен йаӯдийен wи чизӣд вад. Охиру̊нен ба хулоса̄ йат иде̂, тар импиратур хез wи йосен.

Ди ҷа̄т бойад Па̄влус тар Рӯм суδҷатху, импиратурарди Хабари Хуш дар борайи Исойи Масе нақл чӯҷат. Хости Худоwанди ик дити иҷро сут.

Па̄влус Қайсарийа̄йанд ких̇тӣти сифӣдху, азеданди тар Рӯм сафар чӯд. Йид wев сафар а̄м δарат а̄м хатарнок вуд.

Ик ди wахтанд ба̄ри Мийу̊назамӣнанд фук wах̇т хах̇ х̇ӯʒ сут, ди ҷа̄т ба̄д ʒалик δоргин ких̇тӣти тӣдоw хатар вуд. Па̄влуси wев ких̇тӣ сойибенард дар борайи ди лу̊д, амо wа̄δен wи наниғух̇т.

Йи рӯз ба̄д ба̄ранд хах̇ х̇ӯʒ андӯйд. Ғула̄ маwҷенен андойдху, wам ких̇тӣйен сентат не̂δд. Wам ких̇тӣ сабуксид ҷа̄тен wи бех̇ди wӣз азамти пите̂wд, амо йу wазийат соф қӣнди сут. Йу х̇ӯʒи йичанд рӯз wам ких̇тӣ тар ар тарафаϑ ба̄р δод. Йу мардуми боwар начӯд иде̂, аз дисга балота халос су̊д. Па̄влуси ба̄д wевард лу̊д: «Вирода̄р! ғам ма̄кет, аз тамандита йича̄йаϑ намӣрт, йам ких̇тӣта ду̊нд вироɣд. Уз ди фа̄мум, ду̊н ҷа̄т Фарих̇тайи Худоwанд иде̂, wуз Wирд хизмат ца кинум, нур х̇а̄би мурд лу̊д: «Па̄влус, х̇оҷ ма̄δе̂р, Тута бойад тар қайсар хез са̄wи!»

Ба̄ди ху амрогу̊нард лу̊д: «Вирода̄р, х̇оҷ ма̄δе̂рет! Уз ху Худоwандард боwари δа̄м. Арчӣзи йу ца лу̊д, ик дисгата су̊д!»

Ба̄ди ди чорда̄ рӯз наɣҷӣдат wа̄δен қоқи wӣнт, амо тар wи хезен ситтоw нава̄рδод, ду̊н ҷа̄т йаманд х̇ац дӯс вадху, йа̄ ких̇тӣ ар зима̄δ фирӣпт. Йа̄ ху ҷойти хах̇ сатху ачгайи аракат начӯд, ат аз па̄лийи х̇ац маwҷен wам вирух̇т. Амо wа̄δ одаменен ба хӯбийаϑ азаманд нах̇тойдху тар зӣмба̄йен тойд.

Худоwанди Ху wа̄да̄ иҷро чӯд. Йича̄йаϑ на бун нӯстат, на захми сут. Шич ида ва̄рδед Хуδой нақша̄ иҷро су̊дху, Исо ну̊м Рӯманд мис нах̇тӣзд.

Хуδойи Ху мӯҷиза̄ қати Па̄влус тар Рӯм вӯдху, йуйи Худоwандард шукрат лу̊д иде̂, Исойи Масейарди иму̊н ца вӯд, шич ва̄рδед дар борайи ди импиратурард нақл ких̇т.

Па̄влус тар Рӯм банди дастӯр надед, йу тарам амчун Исо шойид дед, йа̄ни аз ну̊ми ху Осму̊ни Подх̇о тарам йат!