ИСОЙИ МАСЕ ОХ̇КОРИ ЙУАНОЙАРД

Исойи Масейанден фана̄ х̇огирден Хабари Хуш па̄нчӣд ҷа̄т ҷазо δодат зӣден, амо wа̄δен то охирец аз Хуδой ху пӣц нагарδент. Ат йӣw аз wеванди дароз умр wӣнтху наwад- солагиндийи ғал мис Ефсӯс ну̊м х̇а̄ранд масейийен ҷамоатанд хизмат чӯд. Wи ну̊м Йуано вуд. Йуйи мис Исойи Масейард боwар ца чӯд, ди ҷа̄тен wи пех̇ тӣждат, қӣнен wи чӯд, амо назӣден wи. Ба ҷойи дийен тар йи δар ҷазӣра wи йод. Йа̄ ба̄ри Мийу̊назамӣнанд дарӯнанд вадат, wам ну̊м Па̄тмус вуд. Йаманден бех̇ди бандийен зиндаги чӯдат, пайрайенгайен wевти вад. Ик wам ҷазӣра̄йанд Хуδой Йуанойард озир сут. Йуйи Йуанойард лу̊д иде̂, Исо Подх̇о, ат арцу̊ндта фукаҷо масейийен пех̇ ца та̄жен, Йута wити мис иму̊ндорен тоқа̄ϑ нала̄ких̇тху, чостта wев!

Йаманден ба̄д Йуанойард дуwозда̄ wа̄й йат. Йуйи ик wев wа̄йен ху дил қати ца wӣнт, Хуδойи wев дарӯнанд охирзаму̊н мис дивих̇т. Йуанойи дар борайи wев «Ох̇кори» китобанд нивишт. Йа̄ Китоби Муқадасанд охиру̊н китоб вад.

Фарих̇тайи Худоwанди охиру̊н wа̄йанд осму̊нти хушрӯй ҷой дивих̇т иде̂, йу Хуδой халқард тайора̄ чӯҷин вуд. Йуанойи йига наw бийӣх̇т wӣнт иде̂, йаманд аз Хуδойат Wа̄рг тахт хезанд зиндаги х̇ац нах̇тойдху тоза̄ дарйо ҷиноw раwу̊н вад. Ат wам зимба̄йанд зиндаги дарахт не̂δҷин вад.

Ику бийӣх̇т осму̊нанд ца, йамандта ачга йича̄йаϑ гуно наких̇т, ду̊н ҷа̄т Исойи Масейи гуно аз ҷау̊нти бине̂ст. Йича̄йаϑта гунойат, беиму̊нийат марг дарак ачга наwӣнт, ду̊н ҷа̄т Худоwанди wев нест чӯд. Ат ик wа̄δ иму̊ндоренен наҷот δоδҷак ца сат, Масе қатита то абадец пи осму̊н зиндаги кинен.

Фарих̇та̄йи Йуанойард лу̊д иде̂, арчӣзи йу ца х̇удат ца wӣнти, йид фукаϑ ростат ақу̊ни.

Охиру̊н wа̄йанди Худоwанд Исо Хубаϑ Йуанойард лу̊д: «Wузум а̄м А̄лфайат а̄м Омега, а̄м сар пиройат а̄м сар зибо, а̄м Аwалу̊нат а̄м Охиру̊н…

Wузум Доwӯд wийе̂шат насл, са̄раки рух̇нойи х̇ите̂рʒум! Wузта ба наздӣки йадум!»

Йуанойи ҷаwоб δод: «Омин! У̊н, Худоwанд Исо, йа».

Бади мурд луд: «Маδ гапенен ам ақӣқат, ам рост; муқадас Хуδойи Ху фирихта бохт, лак арчӣзта бақарӣби ца суд, Йу Ху бандайенард Wи дивест. Wузта ба наздики йадум; Хушбахтен йик Wаδ одамен иде, арчӣз йик мам китобанд пехгӯйи ца суδҷ, Wаδ Wи риойа кинен... лак росткор одам ғалаθ ху росткори кихтат, муқадас ғалаθ мис муқадасди суд. Ба наздӣкита йадумат, Му музд мис Му қати, лак арчай аз рӯйи ху кирдор ху бах зезд.