ТОБИТОТА ЗИНДА̄ СУ̊Д
Китоби Муқадас, «Х̇огирден корен» китоб, 9 боб, 36-42 ойатен
Йи рӯз Петрус тар йи қишлоқ сут. Wи ну̊м Лӣда вуд. Йу да̄х̇тен мобайнанд вудат, аз Ерусалӣм бӣст киламетир δарди вуд.
Wи қишлоқанден фана̄ одамен Худоwанд Исойард боwари δод, ди ҷа̄т ба̄д Петрус тез-тез тарам йат. Тарам Анийос ну̊м чорик хах̇ касал вуд. Йу ма̄йӯб вудху, wах̇т соланд ар бӣреҷ вуд. Петруси wирд лу̊д: «Анийос! Исойи Масета ту хуб ких̇т. Аз ху бӣреҷанд андиʒ!»
Йу чорик wитийаϑ андӯйд. Петруси wирд налу̊д иде̂, wузта ту хубум, ду̊н ҷа̄т йуйи фа̄мт иде̂, фақат Масе қудратта касал хубчӣд ва̄рδед. Арча̄йи дар борайи Анийос касали ца фа̄мт, wитийаϑен тар wи хез йат. Ба̄ден чӯх̇т йу хуб суδҷху, фана̄ аз wевен Худоwандард иму̊н вӯд.
Аз Лӣда сӣ киламетир δарди йига х̇а̄р вуд. Йу ба̄р хезанд вудат, wи ну̊м Йофо вуд. Аз Лӣдайанден йила̄в одамен сат ик тар ди х̇а̄рху wи мардумарден нақл чӯд иде̂, цара̄нги Петрус ба ну̊ми Исо ма̄йӯб одам хуб чӯдху, қуwати wирд да̄кчӯд.
Йофо мардуми wев га̄п х̇удху, Петрусен тар ху х̇ар қӣwд, ду̊н ҷа̄т ик ди wахтанд аз wев калисойанд йи ɣиник касал сатху мод. Wам ну̊м Тобито вад. Йа̄йи бечорайенард дойимаϑ йордам чӯд, wа̄δен ба̄д wам ҷа̄т лап нӣwд. Wам ох̇ногу̊нен wам ба хок чӣдоwард тайори чӯд, амо аз Петрусен хойих̇ чӯд иде̂, то wам ба хок чӣдоwард тар wев хез йоδд. Петрус тар Йофо йатху тар wев чӣд дед. Тарамен Тобито ох̇ногу̊нат, беwа̄ ɣиникен вад иде, йа̄йи фук wахт wевард йордам ца чӯд. Wа̄δ ɣиникенен нӣwдат ик wев луқени Тобито wевард ца анцӯвд, Петрусарден wев дивих̇т. Wа̄δен лап хафа̄ wам ҷа̄т вад, ду̊н ҷа̄т йа̄йи wев лап жӣwҷ чӯд.
Петруси wевард лу̊д иде̂, аз wи ма̄ла̄йанд нах̇тийен. Ба̄ден фукаϑ нах̇тойдат, йуйи чизу̊н ху δодху, Худоwандарди дуо чӯдху, wам ɣиник майитарди лу̊д: «Тобито! Андиʒ».
Йа̄ ɣиники ху цемен йет чӯдху, ба̄ди Петрус wӣнтху, чибун ност. Ба̄ди Петрус wам δустард анҷӯвдху, андӣдоwарди wамард йордам чӯд. Wа̄δ иму̊ндоренат беwа̄ ɣиникенен даргонди wирӣвʒин вад. Петруси wев қӣwдху Тобитойи зинда̄йаϑ wев δусти δод. Wам ох̇ногу̊нен хушизор сат!
Ик ди мӯҷиза̄йи Худоwанд Петрус дуо қати ца чӯд, зиборайен фукаϑ дар борайи ди фа̄мт. Ба̄ден во фана̄ одамен Худоwандард иму̊н вӯд.
САWОЛЕН
1) Петруси тар Лӣда wи ма̄йӯб одам хуб ца чӯд, wи ну̊м ча̄й вуд?
2) Петрусен тар чиду̊м х̇а̄р қӣwд? Чӣзарден фукаϑ Тобито жӣwҷ чӯд?
3) Тобито цара̄нг зинда̄ сат?