ИБРОӢМ МА̄ БАТ ТАР ХУΔОЙ ОЗИМУ̊Д ЧӢДОW

Иброӣмат Соройанд Исоқга сутху, wа̄ δен соф хушбат сат. Wа̄ δен аравӣр а̄ м йакдигар жӣwҷ чӯдат, а̄ м Хуδой. Тама фа̄ мет иде̂, Иброӣм бой одам вуд. Амо wи wух̇ фақат тар йӣwаθ

«бойгари» вуд – тар wи пуц Исоқ. Иброӣми ҷау̊нти сар лап ху пуц жӣwҷ чӯд, аммо тар Хуδойво лапди ма̄ бат wинд вуд.

Йакбори Худоwанд хойих̇ чӯд Иброӣм озимӯд ких̇тху, чост иде̂, ку йу Хуδойард цу̊ндик боwари δӣдат, цу̊ндик ма̄ бат wинд. Ба̄ ди Офарӣдгор Иброӣмард лу̊д: «Ху йӣwаθ пуц, сар лапат wи ца жӣwҷ, зиху, пи йи кӯ wи йос иде, Wузта турд wи ца лу̊м, ба̄ д қурбу̊ни wи ки».

Иброӣмард йид лап қӣн кор вуд. Амо йуйи хойих чӯд иде̂, арчӣз Хуδой wи ца римед, иҷро ких̇т, ду̊н ҷа̄ т йуйи Хуδой аз дилу ҷу̊н жӣwҷ чӯд. Иброӣми жӣзен вирух̇тху рибӯди марка̄ бтиху, ба̄ ди Исоқат δуга ғулу̊м зох̇тху, раwу̊нен сат. Соро тар чӣд ред. Wев пу̊нд дароз вуд. Wа̄ δен аз са̄ ракинди то вега̄ йец пу̊нд тойд, йакборийен ду̊нд ху да̄ м δод. Исоқи хойих̇ чӯд фа̄ мтоw иде̂, wа̄ δ тарка̄ тийен.

Йуйи фикр чӯд: «Арчӣзца сабаб йаст иде̂, му та̄ т мурд йичӣзаθ ца налу̊вд».

Иброӣманд ақу̊нийаθ сабаб вуд иде̂, дар борайи ди ху сафар йичӣзаθ ма̄ лу̊вд. Пиро аз дийи Хуδой wирд дисга са̄ маҷин га̄ п δод иде̂, Иброӣмард боwари мис навуд. Ақу̊нийи Хуδой Исоқ мӣдоw хойих̇ начӯд. Амо Wирд даркор вуд фа̄мтоw иде̂, ку Иброӣмта Wи га̄ п ма̄ ни мис ца нафа̄ мт, Wирда итоат ких̇то най. Амо Иброӣми ди нафа̄ мт. Йуйи фикр чӯд иде̂, йута бойад ақу̊нийаθ ху нозийу̊н пуц қурбу̊ни ких̇т. Ди ҷа̄ т йу лап хафа̄ сут. Амо йид wирд арцу̊нд қӣни мис ца чӯд, йуйи хойих̇ чӯд ла̄ к Хуδой га̄ п иҷро ких̇т.

Wа̄ δен ба̄ д тар йи биланд кӯ хез фирӣпт. Исоқи ачга тоқат

начӯдху, пехцти: «Та̄ т, йима жӣзат йоц, тут пас қурбу̊ни чичӣд. Ат йу wа̄ ргбуц ка̄ й?»

Иброӣми га̄ пδе̂д нава̄ рδод. Wи дар хайол wи нойен жақч. Йуйи ба̄ д оста̄ йикаθ лу̊д: «Пуцик, Хуδойта Хубаθ қурбу̊ниwа̄ рг тайора̄ ких̇т».

Wа̄ δен пи кӯ фирӣптху, жӣренен дараw ҷа̄ мчӣд сат. Иброӣми wев йакдигар тӣрти рибӯдху, қурбу̊ниҷойи мӣзд. Ба̄ ди Исоқ вӣстху, жӣз тӣртийи wи рибӯдху, че̂ди тар wи ка̄ л вӯд!

Ди wахтанд аз осму̊н аwоз йат: «Иброӣм, Иброӣм!»

Иброӣманд че̂д wи миδустат wи ғаδабуц ка̄ лти анде̂ғаθ ред. Ба̄ ди лу̊д: «А̄ , Худоwанд».

Во аwоз йат: «Пи ди ғаδабуц ма̄ раф! Шичум Wуз фа̄ мт иде̂, ту Му ниғу̊ɣийат, ху пуцат мис Му ҷа̄ т қурбу̊ни чи чӣд сут».

Иброӣманд тулу кӯ аз wи да̄ мти wе̂хт. Йу хушизор сутху, қурбу̊ниҷой хезанди ху чизу̊н δод. Wи δустенен лаɣʒа̄ чӯдат Исоқи йет чӯдху сенти wи. Додат пуцен йакдигар кинор анҷӯвдху нӣwден, амо аз қӣни найат, аз лапаθ хуши.

Ба̄ ден аз дийен wа̄ δ ди қарӣбаwол ҷойард маɣ бе̂ғдоw х̇уд. Иброӣмат Исоқен тар па̄ ли чӯх̇тху wа̄ рген wӣнт. Wинден wи хох̇ен ар шағ дарӯн хах̇ сицин вад. Wа̄ δен wи зох̇тху вӯден пи қурбу̊ниҷойху, қурбу̊нийен wи чӯд. Иброӣм га̄ пенен рост нах̇тойд, ца лу̊ди иде̂ Хуδойта Хубаθ қурбу̊ни тайора̄ ких̇т.

Wа̄ δен аз кӯ ца ха̄ вд хушизорен вадат, сабукенга ху йис чӯд. Исоқи ху та̄ т δустард хах̇аθ анҷӯвдху ха̄ вден. Варθен фикр чӯд иде̂, одам жӣwҷдоw чӣзат, Хуδой жӣwҷдоw чӣз. Wа̄ δен фикрга чӯд иде̂, ду̊нга ма̄ бат Хуδойанд тар одам ца, йичинга ду̊нга ма̄ бат нист, ага йакбори дирд мис боwар чӣдоw қӣн ца вид.

САWОЛЕН

1) Чӣзарди Хуδой аз Иброӣм римод иде̂, ху пуц қурбу̊ни ких̇т?

2) Иброӣм тайор вудо Хуδой га̄ п иҷро ких̇т?

3) Ик wи wахтанд Иброӣм аз Исоқ қурбун̊ и чичӣд ца вуд, wийи чӣз гӣр δод?