ИСО ПИЛОТУС ХЕЗАНД

Wам йига рӯзен Исо тар Пилотус хез вӯд. Йу Рӯм импира̄туранд wи намойанда̄ вуд. Йуйи бойад ма̄лум чӯҷат, ку Исо зӣдоw даркор йо най. Wи дарбор пиронди фана̄ мардум ҷа̄м сут. Пилотуси wи мардумард хах̇аϑ елу̊н чӯд: «Wузум ик ми Одаманд дисга айб навирӯд иде̂, даройи wи укми қатл Мирд δа̄δа̄м. Ди ҷа̄тта ба̄д wуз

римӣм ҷазо Ми δенху, ла̄кен Ми. Йу мардуми қӣwд:«Най, най! Чорме̂х ди δа, чорме̂х ди δа!

Пилотусард ачга илоҷ навуд. Йу мардуми маҷбӯр wи чӯд иде̂, ла̄к йу Исо чорме̂х δӣд. Амо Пилотуси фа̄мт иде, Исойанд йичӣзаϑ айб нист.

Йеданд ба̄д Пилотусанд йи фикр пеδо сут: «Наҷот айу̊манд йи қойда̄ вуд. Ди wахтанден бойад йи банди озод чӯҷат. Ага wузта ми мардумард ца лу̊м иде̂, аз Барабос йо Исойанд йи нафар интихоб кинет, ма̄δта бағер Исо интихоб кинен» Ба̄ди Пилотус хах̇аϑ қӣwд: «Ку лу̊вет, асӣд тамард чи озод кинум, Исо йо Барабос?»

Йу мардуми мис хах̇аϑ қӣwд: «Барабос йет ки, Барабос йет ки!»

Wи мардум садо тар дарбор дарӯнец от вуд. Тарамен рӯми аскарен Исо қилоғгӣри чӯд. Wа̄δен аwал хах̇ азоб Wи чӯдху, ба̄ден масхара̄ Wи дараw чӣд сат. Wа̄δен хойих̇ чӯд подх̇о ҷиноw Wи киненху, ба̄ден рӯшт гилем Wирд пинӯйдат, аз шӯδанденга тоҷ wӣфтху, wи ка̄лтийен чӯд. Ба̄д аз дийен қилоғ Wи анҷӯвдху, хах̇аϑен дараw қӣwд сат: «Е Йаӯдийа̄ Подх̇о хуши ки!»

Пис дийаϑен қамчийен қати ик дисга хах̇ азоб Wи чӯд иде̂, Wи хӯн мис раwу̊н сут. Пилотуси фикр чӯд иде̂, ба̄ди ик диду̊нд азобат қилоғгӣрийен Исо ца чӯд, мардумардта бағер ра̄м Wирд ких̇т. Ба̄ди Пилотус тар мардум хез Wи зиwост, амо йичирдаϑ ра̄м аз Wи найат. Йу мардуми ик дити қӣwд: «Чорме̂х ди δа! Чорме̂х ди δа!»

Пилотусард ачга илоҷ навуд. Йуйи римод х̇ац wирд вен. Ба̄ди wи мардум пиройанд ху δустен зинодху, wеварди лу̊д: «Wузта ик ми Росткоранд ху δуст Ми хӯнанд наδа̄м! Хубаϑ чисет! Wузта римӣм чорме̂х Ми δен, амо Ми гуно тама гарδа̄нти!»

Ба̄ди Пилотус римод Барабос озод кинен, ат wа̄δ рӯми аскаренен во Исо қилоғгӣри дараw чӣд сат.