ИСОТА ЗИНДА̄ СУ̊Д

Йичанд ға̄мзада̄ ɣиникен – δу Марйам- ат, Салумитга са̄ракаϑен андойдху, Ерусалӣм та̄нг кучайен- вайен раwу̊н сат. Wа̄δен чӣзард хафа̄ вад ? Йи ганда̄ wоқийа̄ сут: Wев Молим мӯд. Wа̄δен фукаϑ жӣwҷ Wи чӯдат, ху зиндагийен мис боwари Wирд δод! Wа̄δташ пироки ҷиноw ачга Wи га̄пен ниғих̇тоwат йордам Wирд чӣдоw нава̄рδийен. Wа̄δ хойих̇ен охиру̊н бор ху Молимард хизмат кинен, йа̄ни Wи беҷу̊н ҷисмард хушбу̊й рӯғанен молен.

Wа̄δен ғал пу̊ндард вадат, йи кор ҷа̄тен зақт: «Ма̄шта аз wи қа̄бар ғе̂ванд wам ғула̄ жӣр цара̄нг тар па̄ли кина̄м?»

Йила̄вгайен тойдху, ик тар wи ҷой фирӣпт иде̂, Исо қа̄бар йаманд ца вуд. Йам чӣз га̄п? Йа̄ жӣр тар па̄ли вад, йу қа̄бар йет вуд! Wа̄δ ɣиникенен қарӣбди сат. Йамард йича̄йаϑ навуд. Wа̄δ ɣиникенен оста-оста̄ тар wи қа̄бар дарӯн дед. Wа̄δен чӯх̇т иде̂, ик wам жӣрин даку̊нти Исо майит рибӯҷин ца вуд, йа̄ холи вад.

Йид чӣз га̄п сут? Нахо йича̄йи Исо майит азу̊данд цифт?

Wа̄δен нафа̄мт иде̂, Исо во зинда̄ сут. Ик ди ҷа̄т ида Wи мурδа̄ тар қа̄бар дарӯн навуд.

Са̄раки са̄ракаϑ йи ғула̄ мӯҷиза̄ сут: Масе зинда̄ сут! Аз осму̊н Фарих̇та̄ ха̄вдху wам жӣри аз wи қа̄бар ғе̂вти тар па̄ли чӯд, ла̄к арча̄й тарам ца йоδд, фа̄мт иде̂, Исо тарам нист. Wа̄δ аскаренен wи қа̄барти пайра̄ ца вад, х̇оҷен δӯйдху рицостен.

Амо wа̄δ ɣиникенен дар борайи ди нафа̄мт. Wа̄δен фақат wи холи қа̄бар ду̊нд wӣнтху, Марйам ба̄д ди ҷа̄т хафа̄ сат. Йа̄ ик wитийаϑ тар х̇а̄р гах̇т чӯдху, ик ди хабари Петрусат Йуанойард лу̊д, ат wа̄δ дига ɣиникенен wи қа̄бар хезанд редху, фикрийен чӯд, ку чӣрен. Йакбораϑ wев пиройанд нӯру̊ни Фарих̇та̄ пеδо сутху, аҷойиб хабари wевард лу̊д: «Исо зинда̄! Х̇оҷ ма̄δе̂рет! Тездийаϑ сет тар х̇а̄рху, Исо х̇огирденард лу̊вет иде̂, Йу зинда̄ сут!»

САWОЛЕН

1) Аwали афта̄йанд цара̄нгин ғула̄ мӯҷиза̄ сут?

2) Wа̄δ ɣиникенен ик wам са̄раки тарка̄ сат? Wа̄δен тарам чӣр сат?

3) Wа̄δ аскаренен wи қа̄барти пайра̄ ца вад, Фарих̇та̄йен wӣнтху, чӣрен чӯд?