ПЕТРУСТА МУНКИР ХУ КИХ̇Т
Китоби Муқадас, Луқо «Инҷил», 22 боб, 54-62 ойатен
Ҷума̄ меϑ са̄ракийен Исо тар Қайофо хез йод. Йу рӯу̊ни робар вуд. Wи чӣданден пӣрен шӯро (дӣни сӯд) наɣʒимт. Йаманден хойих̇ чӯд Исо пурсах̇ киненху, чора̄ Wирд чисен. Петруси мис δараϑ ху зох̇тху, wев да̄мти тӯйд. Ик тар wи аwлийен Исо ца wеδд, йу мис тарам дед. Wам рӯз шито вуд, ди ҷа̄тен ба̄д аскаренат хизматгорен wи аwлийанд йоц пиδе̂дху кашен ху чӯд. Петрус мис wев хезанд нӯст.
Йи ɣиники ба̄д wи пех̇цт: «Тут х̇о мис йӣw аз Исо х̇огирден, о най?» Петруси ситиробу̊на̄ лу̊д: «Най, най, wузум нист!»
Йеданди ида йу йакум бор ху пӣц аз Исо гарδент, амо йичанд wахт пиродийи лу̊д иде̂, йута ачаϑ дисга наких̇т.
Ба̄д аз wи иде̂, Петрус тар ди аwли ца йат, қарӣб йи соwат наɣҷӣд. Арчӣзен wи Молим ца пех̇цтат, арчӣзи Йу цалу̊д, Петруси мис фукаϑ х̇уд. Йуйи ғӯл дарӯнанд ху ҷой чӯдху нӯст, ку йу шӯро маҷлиста цаwахт тайор су̊д. Ба̄д аз йичанд wахт йи хизматгори тар Петрус чӯх̇тху, лу̊ди: «Ик тут мис дойим Ди қати вуд!»
Петруси мункир ху чӯд: «Исо қатийо? Най, wуз Ди ачаϑ нафа̄мум!»
Йид дуйум бор вуд иде̂, Петруси аз Исо ху пӣц ца гарδент.
Ди wахтанд ик тар wи ма̄ла̄йен Исо ца wеδд, хах̇ ғаwғо тарам сут. Исойен ба̄р δодат, масхара̄йен Wи чӯдат, йила̄в одаменен софаϑ δод Wи. Йеданди во арча̄йца Петрусард лу̊д: «Тут ақу̊нийаϑ йӣw аз дев. Тунд ту га̄пδе̂дандаϑ от!»
Петруси wӣнт иде̂, цара̄нген wи Молим қилоғ анҷӯвдат, бера̄маϑен азоб Wи чӯд. Йуйи ба̄д х̇оҷ δӯйд иде̂, ику Молим олат wирд мис насӣб ма̄су̊д, ди ҷа̄ти ба̄д лу̊д: «Wуз ди Исо ачаϑ нафа̄мум!»
Ди wахтанди чух̇ қӣwдху, йига рӯз сар сат.
Йеданден Исо га̄пен Петрус байоδ δод иде̂, wам пиро рӯзи аwқотхӣдти ца лу̊д: «Тута пиро аз чӯх̇ қӣwдоw ара пӣδ ху пӣц аз Му гарδени!» Петруси ба̄д тар Худоwанд чӯх̇тху wӣнтийи иде̂, ик ди wахтанди wи Молим мис тар wи чӯх̇т.
Петрус а̄м х̇арманда̄ сутат, а̄м алам wи диланд лап сут. Йу хах̇аϑ дараw нӣwд сутху, аз wи аwлийанд нах̇тӯйдху тӯйд. Ик мам пӣδи wи Молим тар wи ца чӯх̇т, дийи йу ачга ринӣх̇тоw нава̄рδод.
САWОЛЕН
1) Ча̄йи фа̄мт иде̂, Петрус Исо х̇огирд?
2) Петруси чӣз ҷаwоб δод? Йид цу̊нд пӣδ такрор сут?
3) Петруси чӣзард хах̇аϑ нӣwд?