ИСОТА ЧОРМЕ̂Х ΔЕН

Рӯми аскаренен Исойат δуга ҷинойаткор одам қамчийен қати δодат, йоден wев. Wевен ара вӣр чорме̂х чиδе̂д вад. Wев да̄мти фана̄ мардум вуд. Wа̄δен фукаϑ ик тар wи ҷой раwу̊н вад иде̂, тарамен рӯмийен дойимаϑ ҷинойат-корен чорме̂х ца δод. Wи ҷой ну̊м ибри зивти Ҷолҷолто вуд, ди ма̄нӣ Ка̄л ситху̊н ҷой. Рӯмийенанд йига ҷазо мис вуд: арчийен чорме̂х δе̂доw ца йод, wийен а̄м пу̊ндард азоб чӯдат, ба ғайри ди, йуйи бойад ху салӣб хубаϑ зох̇чатху йоδҷати.

Исойи мис ик wам wазмин δоргин салӣб ху сӣвдти чӯдху тӯйд.

Мобайни пу̊нданд Исо қуwат соф тайор сут. Wев аскарен хӯҷайӣни аз Қурӣнийа̄ Шиму̊н ну̊м чорикард лу̊д иде̂, Исо салӣб зе̂здху йе̂ст. Исо да̄мти йу мардум ца тӯйд, wев қатийен фана̄ ɣиникен вад. Wа̄δен Wи олат wӣнтху, нӣwденат wа̄ғден.

Оқибатен фукаϑ тар Ҷолҷолто фирӣптху, wа̄δ асаренен Исо рибӯд wам салӣбтиху, бера̄маϑен йамти ме̂х Wи δод. Wа̄δен ғула̄ курци чӣнтху, wам салӣбен рибӯд арамху, хах̇ен wам чӯд. Wа̄δ δуга нафарен Исо қати ца вад, wевен мис айнан ик дисга чӯд. Wев салӣбенен Исора йӣw аз хез не̂δдат, йӣw аз ча̄п.

Исойанден Wи сар наздӣк ох̇ногу̊н мис йаманд вад, а̄м ɣиникенат, а̄м чорикен. Wа̄δ ɣиникенен нӣwд. Дусга δардийен йила̄вга одамен wирӣвʒин вад. Wа̄δен тар Исо чӯх̇тху, шӣнтенат, лу̊ден: «Ту ага Хуδой Пуц ца вийи Хубаϑ Хурд йордам киху, аз дам салӣбти ха̄фц! Ба̄дта ма̄ш мис Турд иму̊н ва̄ра̄м!»

Йӣw аз wев ра̄занени аз Исо ақорат чӯд. Ат йу йигайи wи ачга га̄п δе̂д нала̄кчӯдху, лу̊ди: «Оста̄ ки! Ма̄шард йикам ҷазо раwо, амо Йами йичӣзаϑ гандаги начӯҷ!» Ба̄ди йид ра̄зан тар Исо лу̊д: «Йо Худоwанд, арwахта тар Ху Подх̇ойи ца са̄wи, му мис Ху байоδ wеδ!» Исойи wирд ҷаwоб δод: «Wуз турд wа̄да̄ δа̄м иде̂, нураϑта Му қати ар бийӣх̇т тийи!»

Ба̄д аз ди йакбораϑ фукаҷо торик сутху, зима̄δи лаɣʒа̄ чӯд.

Исойи ху ҷисм қати лап да̄рδат азоб wӣнт, амо Wи рӯ да̄рδат алам соф wазминди вуд. Фук ҷау̊н гунойенен Wи тора вад. Исойи ик дити йичанд соwат тоқаϑ қӣнийат азоб тоқат чӯдху, лу̊ди: «О Му Хуδой! О Му Хуδой! Тут Му чӣзард ла̄кчӯд?»

Исойи фукаϑ мардум гунойен ҷа̄т Ху Осму̊ни Та̄т қа̄р Хути зох̇т. Ик дисга қа̄рта йичиду̊м гунокор одам тоқат наких̇т. Фақат Масе, Хуδойат Одамта ду̊нд wи тоқат ва̄рδийен.

Торики бедат, Исойи Ху охиру̊н га̄пен лу̊д: «Йида, иҷро сут! А Та̄т! Ху рӯта Турд сипорум!»

Йуйи ик ди лу̊дху, Ху ҷу̊ни сипорт. Wи ка̄л ха̄м сут. Исо мӯд.

Аромотанди Йӯсуф ну̊м бойат ну̊мдор чорик зиндаги чӯд. Йуйи Исо лап жӣwҷ чӯд, амо пиройаϑи аз х̇оҷ йичирд ди налу̊д. Йу ик wам вега̄йаϑ сут тар Пилотус хезху, аз wийи хойих̇ чӯд иде̂, аз салӣбти Исо мурδа̄ зе̂х̇тоwху, йаӯдийен қойда̄ қати Wи хок чӣдоwард иҷозат wирд δӣд. Пилотус розӣ сут.

Ниқу̊дӣмус мис йи wахт х̇а̄бинди тар Исо хез ца йатху, дигайи Масейард на̄рмаки х̇огирди ца чӯд, Йӯсуфарди йордам чӯд. Йуйи ху қати кафа̄нард кола̄йат, аррақамаϑ хушбу̊й рӯғаненга вӯд иде̂, йаӯдийенен мурδа̄ ҷа̄т wев истифода̄ ца чӯд. Исойарден кафан пинӯйдху wев рӯғаненен Wи тана̄йард молт. Ба̄ден та̄х дарӯнанд қа̄бар чӣнтху, Исойен тарам йод. Wи қа̄бар ғе̂вен ғула̄ шите̂қ жӣр қати чуст чӯдху тар ху чӣденен гах̇т чӯд.

Wам йига рӯз рӯу̊ни робаренат фарӣсийенанд Худоwанд га̄п wев байоδ δод, иде̂, ца лу̊ди Wузта сейум рӯзти зинда̄ са̄м. Wа̄δен йат тар Пилотус хезху, аз wийен хойих̇ чӯд иде̂, аскарен wевард да̄ких̇т, ла̄к wа̄δ Исо қа̄барти пайра̄ ниϑен. Wа̄δен х̇оҷ δӯйд иде̂, Исо х̇огирдента Wи мурδа̄ аз қа̄баранд зенху, ба̄дта лу̊вен Йу зинда̄ сут.

Пилотуси йичанд аскар wевард да̄кчӯд, ла̄к wа̄δ wи қа̄барти пайра̄ ниϑен. Ба ғайри дийен йаӯдийен wам қа̄бар жӣрти них̇у̊н чӯд, ла̄к йича̄й на̄рмаки тар па̄ли wам ма̄ких̇т. Wа̄δен Исо қа̄бар фук тарафти пайраги чӯд, ду̊н ҷа̄т х̇оҷен δӯйд иде̂, аз рӯйи Wита фана̄ қӣнигари wеванд пеδо су̊д.

САWОЛЕН

1) Исойен чорме̂х δе̂доw ҷа̄т тарка̄ йод? Wирди салӣб йе̂доwард ча̄й йордам чӯд?

2) Исо га̄пен ма̄нӣ чӣз, ца лу̊ди: «А Та̄т! Бахих̇ девард ки, ду̊н ҷа̄т да̄δ хубаϑ нафа̄мен, чӣрен!»

3) Чӣзард Исо мӣдоw ма̄шард лап хах̇ даркор вуд?

4) Йӯсуф ну̊м чорик аз Аромоти цара̄нг дивих̇т иде̂, йуйи Исо жӣwҷ? Йуйи чӣр чӯд?

5) Чӣзарден пӣрен шӯро а̄зойен ба̄д аз Худоwанд мӣдоw хах̇ саргарδу̊н сат?