ИСОТА ТАСЛӢМ КИНЕН

Wи боғ хезанд лапаϑ мардум ҷа̄м сут.Wа̄δен шамшеренат, незайен қати вад, тулу дузд йо одамзӣнӣҷен чи анҷӣвд вади. Бех̇ди wев қати фарӣсийенат рӯу̊ни робарен хизматгоренен вад, ат wев сардор, Йаӯдо, йӣw аз Исо х̇огирден вуд. Исойи wев пех̇цт: «Тама чи х̇икарет?» Арча̄йцайи аз wи ғӯланд лу̊д: «Исо аз Носира̄ ца, ма̄ш ик Wи х̇икара̄м». Исойи ба̄д лу̊д: «Има Wузум Исо».

Ик wа̄δ одаменен Исо анҷӣвдоw ца йат, Йаӯдойи пиройаϑ wев қати мусла̄т чӯд: «Wузта са̄мху Молимта ба̄ кинум, тамата ба̄д ик дити фа̄мет иде̂, чи анҷӣвдоw даркор». Ба̄д Йаӯдо наw тар Исо хез йатат, Йуйи оста̄йикаϑ wирд лу̊д: «А̄ Йаӯдо, ху ба̄чӣд қатита Му таслӣм кинийо?»

Дев га̄пен қатийен тулу Йаӯдо диланд хала̄ δоди, амо йуйи ик дити мис Худоwанд ба̄ чӯд. Ба̄ден фарӣсийен хизматгорен wитийаϑ Исо анҷӯвд.

Исойен ца анҷӯвдат, ца вӣстен Wи, Йу қароаϑ вуд, ат wеварди лу̊д: «Хе̂р Wузум ар рӯз тар ибодату̊на̄ вуд, тамет wити Му наанҷӯвд, ат чӣзардет х̇а̄бинди тару̊д йатху, анҷӯвдет Му?»

Wи х̇огирденен wӣнт, цара̄нген wев Молим йодху, тар ар тарафаϑен рицост. Wа̄δ дух̇маненен Исо зох̇тху, тар Ерусалӣмен Wи йод. Wа̄δен хойих̇ чӯд укм Wи киненху, зӣнен Wи.