АР ҶАТСАМОНИ БОҒ

Исо Ху йозда̄ х̇огирд қати Қидру̊н дарйойард аз wирӯй наɣҷӣд. Ика̄ дарйо Ерусалӣмард наздӣк вад. Дуwоздаум х̇огирд, йа̄ни Йаӯдо wев қати навуд. Wа̄δен х̇а̄бинди пи Зайтӯн кӯ сифӣд. Падами Исо тез-тез Ху Осму̊ни Та̄тард дуо чӯд.

Wи кӯ бунанд ғула̄ боғ вудат, wи боғ дарӯнанден зайтӯн дарахтен вад. Wийен Ҷатсамони боғ лу̊д. Исойи тар wи боғ дедоwти Ху х̇огирденард лу̊д: «Тама йу̊данд ниϑет, ат Wуз са̄м падам дуо кинум».

Ат Петрусат, Йа̄қӯбат, Йуанойарди лу̊д иде̂, Му қати йадет.

Исойарден ик да̄δ рӯзен лап wазмин вад, Йу а̄м қӣн вудат, а̄м хафа̄. Худоwанди фа̄мт, иде̂ Wинден цара̄нгин рӯзен ас пӣро вад. Фукаϑ мардум гунойенен Wи тора wе̂х̇тху, Wинд ас пиро фана̄ қӣнийат, азобат, охиру̊нард салӣбти мӣдоw вуд. Wинд найинки Wи ҷисмард ду̊нд да̄рδат азоб вуд, ат Йу сар пиро маҷбӯр вуд Ху рӯ қати ик диду̊нд қӣнийат алам тоқат ких̇т. Wинд ачаϑ гуно навудат, Йу маҷбур сут фукаϑ одаминзод гунойен бар Ху зе̂зд.

Худоwанданд Wи диланд да̄рδат алам лап сутху, Ху нозийу̊н х̇огирденарди лу̊д:

А Та̄т!Ага ца форт Турд ла̄к йид қӣнийат азоб Мурд насӣб ма̄су̊д! амо ла̄к Ту хост иҷро су̊дат, Мунд най.

Ба̄д аз осму̊н фарих̇та̄ Wирд озир сутху, қуwати Wирд да̄кчӯд.

Ба̄д Wи зорδ пи лаɣʒа̄ δодху, соф хах̇ди дуо дараw чӣд сут, ат Wи ара̄қ хӯн ҷиноw зима̄δард чикт.

Луқо «Хушхабар» 22:42-44

«Му дил лап хафа̄, тама ику̊данд ниϑет, амо тархӯδм ма̄δийет!»

Исойард мис Wи ох̇ногу̊н дастгӣрийат дилпури даркор вуд, ди ҷа̄ти ба̄д wевард лу̊д, иде̂ ла̄к Wи қати дуо кинен. Йу аз wев дӯсик δарди сутху, чизу̊ни Ху δодху, дуо дараw чӣд сут: «А Та̄т! Ага ца бофт, ла̄к йид қӣнийат азоб Мурд насӣб ма̄су̊д; амо ла̄к Ту хост иҷро су̊дат, Мунд най».

Худоwанди мис фукаϑ одамен ҷиноw хойих̇ чӯд иде̂, ику қӣнийат азоб Wирд ас пиро ца вуд, ла̄к насӣб Wирд ма̄су̊д, амо Йуйи фук wахт Ху Та̄т га̄п ниғух̇т, ди ҷа̄ти ба̄д лу̊д иде̂: «Ла̄к Ту хост иҷро су̊дат, Мунд най».

Исо диланд хах̇ алам вуд, Йуйи ба̄д ик дисга хах̇ дуо чӯд иде̂, Wи ара̄қ мис хӯн ҷиноw дараw чикт сут. Ик ди wахтанд аз осму̊н фарих̇та̄ Wирд озир сутху, қуwати Wирд да̄кчӯд.

Исойи Ху дуо тайор чӯдху, тар wев арай х̇огирд хез сут иде̂, wеварди ца лу̊д ла̄к Wи қати дуо кинен. Амо wа̄δен дуо начӯд, Исо ца йат, wа̄δен х̇е̂вʒин вад. Йуйи wев ага̄ чӯдху, Петрусарди лу̊д: «Шиму̊н! Тут х̇овҷо? Тут бағер нава̄рδод йи соwат Му қати ага̄ вийи?»

Исойи хойих̇ чӯд ик ди га̄п қати wи байоδ wеδд иде̂, йи wахти Петрус wа̄да̄ δод иде̂, Wи ҷа̄тта ху ҷу̊н δӣдат, ачаϑта ху пӣц аз Wи нагарδент. Исойи во δу пӣδга аз Ху х̇огирден хойих̇ чӯд иде̂, Wи қати дуо кинен, амо Йу во тар wев хез ца йат wа̄δен х̇е̂вʒин вад. Ба̄д сейум пӣδ йат тар wев хезху, лу̊ди: «Тамет ғалаϑ х̇е̂вʒат ху да̄мет δоδҷо? Мунд Му wахт йат: Одам Пуц таш гунокоренард парδен. Андиʒетху тойда̄м: Ику одамта Му ца парδӣд, йу наздӣк суδҷ.

САWОЛЕН

1) Исо х̇а̄бинди тарка̄ тӯйд?

2) Исойи ар Ҷатсамони боғ чӣр чӯд? Йуйи аз Ху Та̄т чӣз хойих̇ чӯд?

3) Исойи аз Ху х̇огирден чӣз хойих̇ чӯд?