ИСОТА Б̄АЙТ-ИНӢЙАНД ТАӢН СУ̊Д
Китоби Муқадас, Йуано «Инҷил», 12 боб, 1-8 ойатен
Хоɣ рӯз пиро аз айу̊м Исо Ху х̇огирден қати тар Байт-Инӣ йат. Йу wам х̇а̄б тар Мартойат, Марйамат Ла̄зор ҷой ред. Wам йига рӯзен wа̄δ фукаϑ Шиму̊нти мему̊н вад. Wинд йи wахт пес касали вудху, Исойи wи хуб чӯд.
Мартойи аwқотхӣд wахтанд пис wев мему̊ненаϑ палойст. Ат Марйам андойдху, куза̄йанди қиматбаойат хушбу̊й рӯған зох̇тху тар Исо хез сат. Йа̄йи оста̄йикаϑ wи ғе̂вак йет чӯдху, wи рӯғани Исо ка̄лтийат, Wи поδенти чӯд. Ба̄ди ху дароз ғӯнҷен йет чӯдху, wев қатийи Исо поδен қоқ чӯд. Wи қиматбао рӯған бу̊й wи чӣдард па̄н сут.
Wев йила̄в мему̊ненанд ди Марйам кор қати wев қа̄р сифӣд. Wа̄δен фикр чӯд иде̂, wи қиматбао рӯған ик дисга бедаракаϑ сарф чӣдоw даркор нист. Йаӯдойи Исқарийӯт йӣw аз Исо х̇огирден вуд иде̂, ба̄д аз йичанд wахти Wирд хийу̊нат чӯд. Ику Йаӯдойи дисга таклӣф чӯд: «Ди рӯған сесад нуқрайин танга̄ти парδе̂доwху ди пӯл бечорайенард тақсӣм чӣдоw даркор»
Йуйи ик га̄п ди ҷа̄т налу̊д иде̂, бечорайенти wи зорδ ϑуд, ат ди ҷа̄ти лу̊д иде̂, йу хубаϑ дузд вуд. Ику умӯми пӯл иде̂, мардуми Исойард амчун садақа̄ ца да̄кчӯд, йу Йаӯдоҷа вуд, йуйи ба̄д аз wити хурд мис зох̇т.
Худоwанди Ху х̇огирден норозӣги ниғух̇тху, лу̊ди: «Марйами баша̄нд кор чӯд. Бечорайенен фук wахт тама хезанд, амо Wузум фук wахт тама қати нист! Йами ди рӯған Му қа̄барчӣд ҷа̄т нига̄ чӯдху, пиройаϑи Му тана̄йард ди молт! Мам ҷау̊нтита арҷонди Инҷил нақл ца кинен, а̄м йамат, а̄ми арчӣз хизматга йам Мурд ца чӯд, wев байоδта δед!»
САWОЛЕН
1) Исо тар Байт-Инӣ тар чи чӣд дед? Йу тарам цаwахт йат?
2) Марйами чӣр чӯд?
3) Аз Исо х̇огирденанд ча̄й Марйам кор қати норозӣ вуд?