БЕЧОРА̄ БЕWА̄ ТАНГАЙЕН

Исо тар Ерусалӣм йатху, Ху х̇огирден қати тар ибодатху̊на̄ дед. Йу тарам сандӯқи хайрийа̄ хезанд нӯстху чӯх̇ти, ку мардумта арам цара̄нг пӯл пите̂wд. Йуйи чух̇т иде̂, бой одамен лап хайр кинен, амо wа̄δен хойих̇ чӯд ла̄к ик ди wахтанд фукаϑ wев wинен. Ба̄д йи бечора̄ беwа̄ ɣиник йатху ар wам сандӯқи хайрийа̄йи δу танга̄ питӣеwд.

Худоwанди фа̄мт иде̂, ик wам бечора̄ ɣиникҷайен ик wа̄δ δу танга̄ ду̊нд вад. Йуйи Ху х̇огирден қӣwдху, wеварди лу̊д: «Йид беwа̄ ɣиники ар дам сандӯқ аз фукаϑ лапди пӯл пите̂wд, ду̊н ҷа̄т дигайенен аз ху бойгарийанд фақат йи қисм ду̊нд пите̂wд, ат wаманден wа̄δ δу танга̄ ду̊нд ца вад, ик wеви мис хайр чӯд!

Йид х̇огирденард баша̄нд дарс вуд. Исойи хойих̇ чӯд дивест wевард иде̂, Хуδойта начост ча̄йта цу̊ндик хайр ких̇т, ат Йута тар wи одам дил чост! Wа̄δта мис аз ойанда̄ Масейиен ҷамоататнд хизмат ца кинен, бойад ик дисга муносибатат рафтор wеванд вид.

Исойи Ху х̇огирден қӣwдху, wеварди лу̊д: «Ростаϑ тамард лу̊м иде̂ , йид бечора̄ беwа̄йи ар дам сандӯқ аз фукаϑ лапди пӯл пите̂wд, ду̊н ҷа̄т дигайенен аз ху бойгарийанд фақат йи қисм ду̊нд пите̂wд ат wаманден wа̄δ δу танга̄ ду̊нд ца вад, wеви мис садақа̄ чӯд».

Марқус «Инҷил» 12:43, 44