ИСОТА ТАР ЕРУСАЛӢМ ДЕΔД

Наҷот айу̊м қарӣб сат. Исойат Wи х̇огирденен аз Байт-Инӣйанд тар Ерусалӣм тойд. Wев қати фана̄га мардум вуд. Исойи то ик дийец цу̊нд пӣδ лу̊д иде̂, тар Ерусалӣмта фана̄ қӣнийат азоб wӣнт.

Сар пиро фукаϑ айу̊м ҷиноw вуд. Мардуми хуши чӯдат, хурмо дарахт хе̂х̇чакен қатийен Худоwандард пироди йат. Та̄марден хурмо хих̇чакен них̇у̊наи ғалаба̄йат озоди вад. Та̄м ику Ерусалӣм мардум Исойард пироди ца йат, wеванд умеδ вуд иде̂, Йута wев озод ких̇тху ба муродат мақсадта wев фире̂пт. Хуδойи пайғумбарен қати Йаӯдийа̄ Подх̇о, йа̄ни Масейи wа̄да̄ ца δод, Йу бойад аз рӯмийен ча̄қанд wев халос ких̇т! Ик дисга Подх̇ойийард Исо ду̊нд лойиқ вуд!

Худоwанди найинки wи мардум олат ду̊нд фа̄мт, Йуйи Нивишчин мис фукаϑ фа̄мт, ат йаманди Закарйо пайғумбар Хуδой га̄пен дар борайи Исо лу̊д: «Ида, ту Подх̇ота бунгакти саwор су̊дху, оста-оста̄та тар ту хез йоδд…» Йуйи хойих̇ чӯд Ху Осму̊ни Та̄т га̄пен иҷро ких̇т, ди ҷа̄ти ба̄д Ху х̇огирден тар йи қарӣбаwол қишлоқ пис бунгак римод.

Wа̄δен сатху, wи бунгакен тезаϑ вӯд. Ба̄ден ху луқенен wити рост чӯдху, Худоwанд wити саwор сут. Йу мардум мис Wи қабатанд тӯйдат, хах̇аϑен қӣwд: «Ӯша̄но! Бабаракат Ику иде, аз ну̊ми Худоwандта ца йоδд! Наҷотта аз осму̊н йоδд!»

«Ӯша̄но» – йид йаӯди қадӣма̄ калӣма̄, ди ма̄нӣ: «Йо Худоwанд, баракат ма̄шард δайат наҷот ма̄шард насӣб ки!»

Йу йила̄в мардуми во қӣwд: «Алелуйо»; ди ма̄нӣ «Хуδой ситоwах̇ кинет!» Пу̊ндард йила̄вга мардум мис тар wев амро сутху, фукаϑен йакҷойаϑ Хуδойард шукрат лу̊дат, ситоwах̇ен Wи чӯд: «Исо, Тут Ику Одам иде̂, Хуδойи Ту бох̇т ла̄к ма̄ш фукаϑард йордам кини!»

Йу мардуми хурмо хе̂х̇чакен х̇ичух̇тху, Исо пиройарден wев пите̂wдат, хах̇аϑен қӣwд: «Ма̄шта ситоwах̇ Ту кина̄м! Тут Хуδой Пайғумбар ҷиноw тар ма̄ш хез йат! Тут ма̄ш Подх̇о! Тута ма̄шард осойах̇и ва̄ри!»

Мардуми ба ҷойи дароз қолӣн Исо пирова ху луқат хурмо хе̂х̇чакен рост чӯд. Wа̄δен хойих̇ чӯд ик дити дивесен иде̂, Исо – йид wа̄даδоδҷин Наҷотδа̄δӣҷ. Йу бойад wев подх̇о су̊д! Арцу̊нд мардум йаманд ца вуд, фукандаϑ wев черайи рӯй хуш вудат, шӣнтенат, ҷе̂ғен δод.

Амо дисга одаменен мис вад иде̂, ик тар ди корен хуш навад. Йила̄в фарӣсийенен wи мардум хуши wӣнтху, саттен тар Исо хезху, лу̊ден: «Лу девард, дисга ма̄қӣwен! Рӯмийента ца фа̄мен иде̂, мардум аз Ту подх̇о лу̊вд, тута қӣн кинен. Йид мардум ик дисга ца лу̊вдат ҷе̂ғ ца δӣд, да̄δ хубаϑ мис ди ма̄нӣ нафа̄мен. Лу девард ба̄с кинен!».

Фарӣсийенен Исо қати бад вад, ду̊н ҷа̄т халқ дарӯнанд Wи қадр бар wеванд лапди вудат, Wийен лапди ниғух̇т. Wа̄δен х̇оҷ δӯйд иде̂, wев қадрита бестат, йаӯдийента ачга wев га̄п наниғу̊ɣен.

Исойи wевард ҷаwоб δод: «Най, ага йид мардумта қарор ца ких̇т, ма̄δ жӣрента дараw қӣwд сен. Ла̄к да̄δ Хуδой ситоwах̇ кинен!»

Амо Худоwанди ик ди мис фа̄мт иде̂, ик wа̄δ йила̄в одамента нур Wи ситоwах̇ ца кинен, ба̄ди йичанд рӯзта Wи парδенху, аз Wи хезандта тийен. Ат wев диландта ма̄бат ҷойти кӣн пеδо су̊дху, Wита салӣбти чорме̂х δен.

САWОЛЕН

1) Мардум тар Ерусалӣм Исо да̄мти ца тӯйд, wеванд аз Wи чӣз умеδ вуд?

2) Исо цара̄нг тар Ерусалӣм дед?

3) Исойард чӣз залӯлди вуд: подх̇о ситтоw йо Ху Та̄т хост иҷро чӣдоw (салӣбти Ху ҷу̊н сипортоw)? Чӣзард?