ВОХУРИ ЗАКАЙ ҚАТИ

Ериӯйанди Закай ну̊м чорик зиндагӣ чӯд. Йуйи аз мардум андоз ҷа̄м чӯд. Йу ну̊мдорат бой одам вуд. Wинд wи ҷойи кор х̇а̄р дарвоза̄ хезанд вуд.

Саwдогаренен тар Ериӯ чидед ца вад, укмандаϑен wи хезва наɣҷӣд.

Закайи wев гӣр δодху, лу̊ди: «Гӣр сет! Арча̄йта ху андоз ца нада̄ких̇т, wирд тар х̇а̄р дедоw мӯмкин нист. Δу нуқрайин танга̄ зиwе̂δетху да̄кет. Рӯм подх̇ойи дисга андоз не̂δҷ»

Саwдогаренен δинду̊нзири қати ху пӯл зиwостат, wирден да̄кчӯд, ат йуйи зох̇тат хуш сут, ду̊н ҷа̄т ар пӯлзе̂х̇т қати wи бойгари соф лапди сут. Йута Рӯм хӯҷайӣненард фақат йи нуқрайин танга̄ ду̊нд да̄ких̇т, wам йига танга̄та хурд зе̂зд.

Закайи фук wахт шӣнтат хуш вуд, амо йу хушбахт одам навуд, ду̊н ҷа̄т wийи йича̄йаϑ жӣwҷ начӯд. Бех̇ди одаменард йу бад вуд. Закайи мис хубаϑ фа̄мт иде̂, ик дисга ганда̄ муносибат тар wи ца вуд, динди йу хубаϑ айбдор вуд. Ду̊н ҷа̄т wинд wи кор ғалат вуд.

Йи рӯзен йичанд чорик нақл чӯдат, Закайи wев ниғух̇т. Wа̄δен лу̊д иде̂, Исо бойад ба наздӣки тар Ериӯ йоδд.

Закайард мис аҷойиб сутху фикрйи чӯд: «Исо тару̊д чи йата̄? Баша̄нд, мурд мис Исо wӣнтоw форт, ду̊н ҷа̄т Йу лап ну̊мдор одам. Фукаϑ лу̊вен иде̂, Исойи мардум жӣwҷ, амо wуз фа̄мум муйи Йу нажӣwҷ. Муйи йича̄йаϑ нажӣwҷ, амо Wи wӣнтоw мурд форт».

Закайи ху кор ху муоwиненард сипортху, тар куча̄ нах̇тӯйд. Ик wи куча̄ва бойад ба̄д аз йичанд дақӣқа̄ Исо наɣҷӣδҷат. Амо то Закай нах̇тӣдоwард йу куча̄ аз одам пур вуд. Wа̄δен фукаϑ Худоwанд wӣнтоw ҷа̄т ҷа̄м сат.

Закай па̄стқа̄д одам вуд, йу ик wи мардум дарӯн ца нӯсчат, Худоwанд wӣнтоwи нава̄рδоδҷат. Йу айру̊наϑ ред ку чӣз илоҷ ких̇т. Йу магам пи йичиду̊м биланди сифӣнтху, азамтита ба̄д wӣнт иде̂ , куча̄йард чӣз га̄п. Йуйи ху гаргинӯх̇а̄ чӯх̇тху, wи цем йи дарахтти δод. Йида хуб илоҷ, пи дам дарахт сифӣдоw даркор! Мардуми чӯх̇т иде̂, андоззе̂зӣҷен хӯҷайӣн зӯр δӣдат пи дарахт сифӣнт, ба̄ден фукаϑ шӣнтат масхара̄йен wи чӯд. Амо Закайи тар wев диқат наδод. Wирд арра̄нг вид Исо wӣнтоw даркор вуд.

Ик ди wахтанд Исо Ху дуwозда̄ х̇огирд қати таред фирӣпт. Wев да̄мтига фана̄ мардум вуд. Закайи аз дарахтти чӯх̇т иде̂, Исо йатху wи бӣрва чи наɣҷӣд сут... Амо най! Исо аз wи нанаɣҷӣд! Йу wам дарахт бӣранд гӣр сутху, пи тӣри чӯх̇тху, хах̇аϑи лу̊д: «Закай, аз дам дарахтти ха̄фц! Wузта нур тар ту ҷой мему̊н йадум!»

Закай айру̊н сут: «Йид аска̄ му фа̄мт? Ат чӣзард Йид укмандаϑ тар му чӣд ситтоw хойих̇ ких̇т?»

Амо шич wинд фикрчӣдард wахт навуд. Йу тезаϑ аз дарахтти ха̄вдху Исойат Wи х̇огирдени тар ху чӣд йод. Тарами йу римод тезаϑ аwқот пӣʒенат, арчӣзга мис ца вид тар дасторху̊н вен. Закай хушизор вуд иде̂, Исо қати балад ца сут. Wи мардум га̄п рост нах̇тӯйд: Исойи фукаϑ одамен жӣwҷ чӯд. Фукаϑен фа̄мт иде̂, Закай аз йисоби чӣз зиндаги ких̇т, амо Исойи wи дастӯр одам мис жӣwҷ чӯд.

Закай фикрийенен wитийаϑ дигаргӯн сат. Йуйи Исо қати нақл чӯдху, фа̄мти иде̂, wи зиндаги холи гуно вуδҷ, ба̄ди ди ҷа̄т тӯба̄ чӯд.

Wа̄δен аз дасторху̊нти андойат, Закайи Исойард wа̄да̄ δод: «Wузта нӣми ху бойгари камбағаленард да̄кум, ат аз арчийум йи танга̄ мис зийоти ца зох̇ч, цавор баробаргата wирд лапди да̄кум».

Исо тар Закай чӣд ца йат, йуйи ик ди ҷа̄т хушбахтизор ху йис чӯд. Ба̄д ик аз ди вохури Закайанд наw зиндаги сар сут. Шичи йу хойих̇ чӯд ик дисга кор ких̇т иде̂, ла̄к Хуδойард йу хуш вид.

Фана̄ одаменен Исо қати то Закай чӣдец ца йат, айру̊нги wевард вуд. Wеванд wев қа̄р сифӣдху, лу̊ден: «Исо чӣзард тар дисга одаманд тар ди чӣд су̊д? Ма̄шта ди дастӯр макр одам қати га̄п мис наδа̄δа̄м. Ат йи дасторху̊нтита ди қати ачаϑ наниϑа̄м. Амо чӣзард Исо тар ди чӣд су̊дат, тар ма̄ш ҷой насу̊д?»

Мардуми йила̄в wахт Исо мақсад нафа̄мт. Амо Худоwанди Закайард лу̊д: «Нур ту ху̊на̄йанд файзат баракат сут! Тут нур наҷот δоδҷак сутху, тар халқи Хуδойат амро сут. Wузум ар мам ҷау̊н ди ҷа̄т йаϑч иде̂, ту ҷиноw гунокорен х̇икарумат, вирӣмат, наҷот wев δа̄м!»