КУ̊Р ОДАМТА ХУБ СУ̊Д

Исойат wи х̇огирденат, фана̄га мардумен аз Ериӯйанден нах̇тойдху тар Ерусалӣмен тойд. Ди wахтанд Бартимай ну̊м бечора̄ одам пу̊ндти нӯсчин вуд. Бартимай ку̊р вуд, ди ҷа̄ти ба̄д йиҷондийаϑ кор чӣдоw нава̄рδодат, маҷбӯр вуд гадойи ких̇т.

Йу аррӯз хафа̄йаϑ пу̊ндти нӯсчин вуд. Wирди мис форт иде̂, ху гаргинӯх̇а̄ wӣнтат, одаменат, гуленат, кӯйенат, пух̇тайен тамошо ких̇т!

Йи рӯзи арча̄йца wирд лу̊д иде̂, Исо ку̊р одамен хуб ких̇т.

Бартимайи фикр чӯд: «Исо му цемен хуб ца ких̇т, лап баша̄нд су̊д. Амо wузум ку̊р, wуз цара̄нг Wи Исо вирӣм?»

Йи рӯз Бартимай пу̊ндти нӯсчин вудат, садо қатийи фа̄мт иде̂, арчӣзца га̄п йамард йаст. Арча̄й wи пирова наɣҷӣдат йуйи пех̇цт:«Аро йид чӣз га̄п йу̊дард».

Арча̄йцайи wирд лу̊д: «Исо тару̊д йат».

Йуйи ба̄д ху диланд лу̊д: «А̄, Исо тару̊д йаϑч!» Бартимайанд аз хуши wи дил мис пи лаɣʒа̄ δод. Ба̄д арцу̊нд wи садо ца вуд, қӣwди: «Исо, йордам мурд ки! Исо, ра̄м бар му ки!»

Йу мардуми wирд лу̊д: «Оста̄ ки! Лап хах̇ ма̄қӣw! Исо гаргинӯх̇а̄ дитийаϑ мис фана̄ мардум ҷа̄м суδҷ. Хе̂р Йу ғал wев қати нақл ких̇тат, туга азед Wи қӣwи»!

Амо Бартимайи тар wи мардум га̄п диқат наδод. Йуйи ик дити қӣwд: «Исо, ра̄м бар му ки!». Исойи Бартимай садо х̇удху гӣр сут. Йуйи Ху х̇огирденард лу̊д: «Ику одами Му ца қӣwд, тар Му хез wи вет».

Х̇огирденен сат тар Бартимай хезху, лу̊ден: «Исойи ту садо х̇удху, пис туйи ма̄ш римод. Андиʒу тойда̄м тар Wи хез».

Бартимай аз ху ҷойти андӯйдху раwу̊н сут. Х̇огирденен wи δустард анҷӯвдху, wи ғӯл байнвайен wи наɣʒимтху, тар Исо хезен wи вӯд.

Бартимай тар ғу̊ɣ милойим садо йат: «Wуз турд чӣрум».

Йу ху га̄пти ангихтат лу̊ди: «Йо Худоwанд, wуз хойих̇ум му цемен хуб сенху, wуз мис wинум!»

Исойи wирд ҷаwоб δод: «Хуб са! Ту иму̊ни ту наҷот δод!»

Бартимай цеменен wитийаϑ хуб сатху, йу дараw wӣнт сут! Wи гаргинӯх̇а̄ йакбораϑ рух сут! Йуйи ху зиндагинди йакум бор одаменат, арчӣзга табийатанд ца, ху цем қатийи wӣнт! Йид аҷойибард кор вуд! Шичи йу мис ва̄рδод Исо пӣц wӣнт. Wинд Wи черайи рӯйанд холи ма̄батат ме̂рабу̊ни вуд! Бартимайи нафа̄мт ик ди ме̂рабу̊ни ҷа̄т Исойард цара̄нг қуллуғ лу̊вд!

Йу аз хуши ʒуликен ҷиноw цилуқ-цилуқ зибудат Хуδойарди шукрат лу̊д. Ба̄д Исойат Wи ох̇ногу̊нен раwу̊н сатат, Бартимай мис wев да̄мти тӯйд.

САWОЛЕН

1) Тар Ериӯ wи ку̊р одам ну̊м ча̄й вуд?

2) Йу ку̊р одами аз Исо чӣз лу̊д? Йуйи аз Исо чӣз хойих̇ чӯд?

3) Йу ку̊р одам хуб ца сут, чӣри чӯд?