ЛА̄ ЗОРТА ЗИНДА̄ СУ̊Д

Тар Байт-Инӣ Марйамат Марто вирод Ла̄зор хах̇ касал сут. Wа̄δ йахʒиненен х̇оҷ δӯйд иде̂, йута х̇о мӣрт, ди ҷа̄тен ба̄д Исора пе̂ғу̊м бох̇т: «Йо Худоwанд! Ту ох̇но хах̇ касал суδҷ». Худоwанди фа̄мт иде̂, йид га̄п дар борайи чи, амо Йу беғамаϑ вуд.

Исойи лу̊д: «Йид касалита wи назӣнт, ат йидта Худоwанд бузурги них̇у̊н δӣд!». Исойи дар борайи Ла̄зор касали х̇уд, амо δу рӯзга мис тар йиҷойаϑ насут. Ба̄д сейум рӯзтийи ху х̇огирденард лу̊д: «Тийет тойда̄м! Ла̄зор х̇овҷ. Wуз са̄м ага̄ wи кинум».

Wи х̇огирденарди нафорт, амо Исойи wевард лу̊д: «Амо Wузум тама ҷа̄т хуш иде̂, йамандум навуд, тамата дисга тезди иму̊н вет. Тийет шич тар wи хез са̄wа̄м!»

Ба̄д аз Ла̄зор қа̄барчӣд цавор рӯз наɣҷӣдат, Худоwанд тар Байт-Инӣ йат. Тар wи қишлоқ мардум лап вуд, ду̊н ҷа̄т аз Ерусалӣмат йила̄вга х̇а̄ренен фана̄ мардум тар Марйамат Марто хез йатху дилпурийен wев δод.

Мартойи х̇уд иде̂, Исо тар қишлоқ хез наздӣк суδҷ, ба̄д пироди Wирд сат, ат Марйам тар чӣд ред.

Марто тар Исо хез фирӣптху, Wирди лу̊д: «Йо Худоwанд! Тут шичард тару̊д ца вуδҷат, му вирод намӯɣҷат. Амо wуз фа̄мум иде̂, Тута арчӣз аз Хуδой ца тила̄би, Йута Турд да̄ких̇т!» Исойи wамард лу̊д: «Ту виродта зинда̄ су̊д!»

Мартойи Wирд лу̊д: «Фа̄мум, рӯзи қийу̊матандта зинда̄ су̊д».

Исойи wамард лу̊д: «Ик Wузум а̄м қийу̊матат а̄м айот. Арча̄йта Мурд иму̊н ца вӣрт, ачаϑта намӣрт. Ту дирд боwар кинийо?»

Йа̄йи ҷаwоб δод: «У̊н, е Худоwанд! Wуз боwарум иде̂, Тут Масе, Хуδой Пуц ар замӣн ца йаϑч!» Мартойи ик ди лу̊дху, же̂х̇тиху сат тар ху йах хезху, лу̊ди wамард иде̂, Исо йаϑчху пи wам нӯсч.

Марйами ху йах га̄пен х̇удху, тезаϑ андойдху, тар Исо хези же̂х̇т. Йа̄йи Wи поδенард ху пите̂wдху, хах̇аϑ дараw нӣwд сат. Исойи wӣнт иде̂, йу мардум фукаϑ хафа̄ вуд, ба̄ди Хубаϑ мис ойи сар тӣждху, пех̇цти: «Wийет ка̄данд қа̄бар чӯд?» Wирден ба̄д дивих̇тху, Йу сут тар wи қа̄бар хезху, нӣwди. Исойи римод иде̂, wам жӣр аз wи қа̄бар пиройанд δарен. Йичанд чорикенен wам жӣр тар па̄ли чӯд. Ба̄ди Худоwанд Ху цемен чӯд пи осму̊нху, лу̊ди: «А Та̄т, шукрат Турд иде̂, Тут Му ца х̇уд!»

Дийи лу̊дху, ба̄ди хах̇аϑ қӣwд: «Ла̄зор! Нах̇ти!»

Йеданд ба̄д аҷойибард кор сут! Йу майит кафа̄н дарӯнандат, wи пӣц тӣтак қати вӣсчинат, аз қа̄баранд нах̇тӯйд.

Исойи ба̄д римод: «Йетет диху, ла̄к тӣзд!»

Фана̄ йаӯдийенен ик ди ғула̄ мӯҷиза̄ wӣнтху, Худоwанд Исойарден иму̊н вӯд.