ИСОТА КӮДАКЕНАРД БАРАКАТ ΔӢД
Китоби Муқадас, Луқо «Инҷил», 18 боб, 15-17 ойатен
Фана̄ мардум ҷа̄ м сут. Йуйи wевард дар борайи Хуδойат, Хуδой Подх̇ойи нақл чӯдат, фана̄ касал одамени хуб чӯд. Таwрот молименен мис йаманд вадху, Исойарден қӣнат бема̄нӣ саwолен δодат, Йуйи мис тоқат чӯдат ҷаwоби wевард δод. Ди wахтанд Исо гаргинӯх̇а̄ лап ғӯл вуд, амо во йила̄вга чорикенат ɣиникенен мис ху кӯдакен қати тар Wи хез йат.
Арча̄йцайи ба̄д аз ди ғӯл дарӯнанд wевард лу̊д:Гӣр сет, тамет тарка̄ раwу̊н?»
Йи ɣиники wирд ҷаwоб δод: «Ма̄ша̄м тар Исо хез йаϑч, ла̄к Йу ма̄ш кӯдакенард баракат δӣд» Йига одами ба̄д бадқа̄рwораϑ лу̊д: «Кӯдакенарда̄?
Исойанд ба ғайри кӯдакен фана̄га залӯлди корен! Тама наwинетна̄, Йу ғал йиwу wев касален хуб ких̇т. Нах̇инетна̄ Йу ғал дар борай Хуδой Подх̇ойийат, фана̄га даркори чӣзен нақл ких̇т. Ат тамет азед ху зирйотенат, йила̄вет ху наwсуδҷин кӯдакен қати мис йат. Да̄δ кӯдакен шич аска̄ фа̄мен Исота дар борайи чӣз нақл ких̇т!»
Йа̄ ɣиники ба̄д wирд лу̊д: «Мев кӯдакенард ғал фук чӣзаϑ фа̄мтоw даркор нист, амо ма̄δ ла̄к фа̄мен иде̂ Хуδойи мев жӣwҷ. Wуз ба̄д ду̊н ҷа̄т аз Исо хойих̇ кинум, ла̄к…
Йу чорики wам га̄п х̇ичух̇тху лу̊ди: «Исойанд ду̊нд лап wахт нист иде̂, Йу кӯдакенард wи сарф ких̇т!» Йа̄ ɣиники wирд зорги чӯд: «Илтимос, ку ла̄кет ма̄ш!» Wа̄δен ик дити шара̄т сатху, wев садо биланд сут. Исойи тар wев диқат δодху, лу̊ди: «Дев кӯдакен ла̄кет тар Му хез йаден! Хуδой Подх̇ойи ақу̊ни деванд!»
Исо х̇огирденен тар Wи чӯх̇тху айру̊наϑен ред. Wа̄δ чорикенат ɣиникенен хуш сатху, ху кӯдакен қатийен wи ғӯл байнва наɣҷӣдху, тар Исо хезен сат. Wев х̇огирденанд дӯсик нобоwари пеδо сутху, қарӣбдийен сат, ку чисен чӣз таш су̊д.
Исойи тар wев чӯх̇тху лу̊ди: «Боwар кинет, арча̄йта Хуδой Подх̇ойи кӯдакен ҷиноw қабӯл ца наких̇т, тар wита дедоw нава̄рδед! Арча̄йта Хуδой ма̄бат кӯдакен боwари дастӯр қабӯл ца наких̇т, wирдта Хуδой Подх̇ойи насӣб насу̊д».
Ба̄ди Исо wев ʒулик кӯдакен йӣwи Ху миδуст зох̇тат баракати wевард δод, ат wев ғулади кӯдакенанди ху δуст wев ка̄лти рибӯдат, wеварди мис баракат δод.
САWОЛЕН
1) Чӣзарден Исо х̇огирден кӯдакен тар Wи хез нала̄кчӯд?
2) Худоwанди ца лу̊д иде̂, Хуδой Подх̇ойи кӯдакенанд, Wи га̄п ма̄нӣ чӣз вуд?