МАСАЛ ДАР БОРАЙИ НОЛОЙИҚ ПУЦ

Исойи ба̄д фарӣсийенард йига йикойа̄ нақл чӯд: «Йи чориканден δу пуц вад. Wа̄δен ғула̄ сатху ху та̄тарден wи хоҷаги корард йордам чӯд.

«Йи чориканден δу пуц вад. Wа̄δен ғула̄ сатху ху та̄тарден wи хоҷаги корард йордам чӯд.

Йу хидӣр пуци ақу̊нийаϑ йордам чӯд, амо кор wирд ду̊нд лап хуш навуд. Ат wи ʒулди пуцанд дисга wоқийа̄ сут. Wирди ачга нафорт иде̂, wи та̄т wи кор римедат, насийат wи ких̇т. Йуйи фикр чӯд иде̂, тоқаϑ зиндаги ца ких̇т бӣдийат, хубаϑта фа̄мт чӣр чӣдоw дар-кор. Ба̄д йу йи рӯз йат тар ху та̄т хезху, лу̊ди wирд: «Та̄т wузум ту пуц, тута арwахт ца мари, аз ту бойад пи му йичӣз мерос рист. Амо wузта пи ту мӣдоw наниϑум, арчӣз мурд раwо ца, ик нураϑ мурд wи да̄к, ла̄к wуз шичаϑ ху зиндагийард wи сарф кинум. Ту фа̄ми иде̂, йи қисми ту бойгарита арwахт вид пи му рист».

Йу чорики ху пуц га̄пен х̇удху хафа̄ сут. Йуйи фа̄мт иде̂, wи пуцта wи пӯл зе̂здху аз ху додат на̄н чӣданта тӣзд. Амо йуйи ху пуцард налу̊д иде̂, ту тар йиҷо ма̄са, баракс, лу̊ди ла̄к ху дилти ких̇т. Ди ҷа̄ти ба̄д арчӣз ик wи пуцард раwо ца вуд, фукаϑи wи да̄кчӯд.

Ба̄д аз йичанд рӯз йу ʒулди пуц тар йи δар мамлакат тӯйд. Йуйи тарам хушрӯй ма̄ла̄ хурд вирӯд, қиматбао луқи хурд зох̇тат, ху харчат, сайлийат, хушийарди фана̄ пӯл сарф чӯд.

Ба̄д аз йичанд wахти йу мардум фа̄мт иде̂, йу пӯлдор одамат, ху бойгарита лап ситоwах̇ ких̇т. Йу йичанд бачгала̄йат ға̄цен қати балад сутху, wа̄δен дойимаϑ wи қати вад, ду̊н ҷа̄т йуйи ху пӯл бех̇ди wевард сарф чӯд. Йуйи фикр чӯд иде̂, баша̄нд ох̇ногу̊ни хурд вирӯд, амо wа̄δен ақу̊ни ох̇ногу̊н навад, wевард фақат wи пӯл ду̊нд даркор вуд.

Wи зиндаги холи роwатат, айшат майишат қати вуд. Йуйи холи сайл чӯдат, ху wахти базмат разм қати наɣʒимтат, арчӣзи wирд ца форт зох̇ти хурдат, ачаϑ қӣни wинд навуд.

Дар борайи ху ху̊на̄йат, ху додат на̄ни ачаϑ фикр начӯд.

Йу wи ху сайлийат майишат қати хабар насутат, йу wи пӯл рӯз ба рӯз ка̄мди сут. Йуйи йи рӯз ғула̄ ташкӣли чӯдху, ху ох̇ногу̊ни мис қӣwд. Йаманден аз арҷойаϑ фана̄ мему̊нен вадху, хӯденат, бирох̇тенат, чақ-чақен чӯд. Ба̄д wахти пӯл да̄кчӣд йатат, йуйи чӯхт wи пӯл ками ких̇т. Йу са̄манд δодху лу̊ди: «Му пӯленен тайор сат! Тама бойад мурд йордам кинет! Хе̂р тамет му ох̇ногу̊н!»

Wа̄δен норозӣйаϑ wирд ҷаwоб δод: «Ох̇ногу̊на̄? Ма̄шард ик дисга ох̇но даркор нист иде̂, тар мему̊ни ма̄ш қӣwдху, пӯл да̄кчӣд нава̄рδед. Салу̊мат ви!» Wа̄δен ик дев га̄пен δодху андойденху тойден.

Ат йуйи ху охиру̊н пӯленга да̄кчӯд wи ма̄ла̄ сойибардху, йуйи ба̄д ди ғаδа̄ зиwостху айи ди чӯд.

Йу ик тар ди олат йатху, кучайенард саргарδу̊н сут, ба̄ди фа̄мти иде̂, қӣни чӣз вуδҷ. Ба̄д аз йичанд wахт wи мамлакатанд хах̇ маɣʒу̊нҷи сут. Ди ҷа̄ти ба̄д йича̄йаϑ йи ғе̂в гарδа̄ мис wирд нада̄кчӯд. Ат йуйи кор мис хурд вире̂доw нава̄рδод.

Йуйи хелак ҷойенард кор хурд х̇икӯдху, йиҷонди хӯгбу̊н сут, амо пӯл йаманд ка̄мизор вуд. Йуйи пироки дар борайи дисга кор фикр мис начӯд, амо шич wи катаҷу̊ни тайор сут. Йу лап хах̇ маɣʒу̊нҷ вуд. Wирди форт иде̂, аз wев хӯген та̄сард йичӣз зе̂здху хӣрт, амо wев сойиби wи нала̄кчӯд. Wи зиндаги хӯген дарӯнанд вуд, wи пӣцат δуст фук wахт ғажд вуд, wи луқ цуғ вуд, фук wахт маɣʒу̊нҷат ра̄маҷин вуд. Ат ди wахтанд йакумӣн бор wи чӣд wи байоδ δод.

Йуйи фикр чӯд: «Wузум лап ғалат кор чӯд. Шичардум ху чӣданд ца нӯсчат, бӣди вуδҷат! Му та̄т хизматгоренандаϑ wев зиндаги бар му бӣди»

Йу ба̄д дӯсик нӯстат, йакбораϑ йига фикр wинд пеδо сут: «Wузум фа̄мт чӣр чӣдоw даркор. Wуз таш са̄м тар ху чӣд. Му та̄тта х̇о ачга пуц ҷиноw му қати муносибат наких̇т. Wинд х̇о тар му ачга ма̄бат наредат, wи зорδ мис аз му вирух̇т. Амо йаст йу бар му ра̄м ких̇тху, амчун хизматгор тар кор му зе̂здху, дӯсик пӯл мурд да̄ких̇т». Wи пу̊нд лап δар вуд, амо йу андӯйдху раwу̊н сут.

Йу хелак тӯйдху, тар ху мулк фирӣпт. Ба̄ди аз δаранд ху та̄т чӣд wӣнтху гӣр сут. Йу икедец йатху wи қуwат мис қарӣб тайор сут, ат ба ғайр ди, йуйи хурд боwари мис наδод иде̂, wи та̄тта wи қабӯл ких̇т.

Амо йуйи чӯх̇т иде̂, арча̄йца тар wи хезаҷ жозд. Йуйи ху цемен δуст δодху, йакборгайи во тар wи одам чӯх̇т. Йид wи та̄т вуд!

Йу мӯйсафеди ху δустен wеδдат аз хушийи арчӣзца лу̊д. Нахо wи та̄т тар wи йаттоw хуш вуд? Ик ди га̄парди йу боwар чӣдоw нава̄рδод.

Нахо wи та̄танд wи қа̄р сифӣδҷин навуд, нахо йуйи ғал пироки ҷиноw жӣwҷ wи?

Wи та̄т тар wи хез фирӣптат, wинден wи йӯх̇кен раwу̊н сатху, лу̊ди: «Та̄т, wузум ту хезанд лап айбдор. Wузум хах̇ гуно чӯдху, ту пуц видоwардум мис лойиқ нист. Бахих̇ мурд ки. Иҷозат мурд δа ту чӣданд ниϑумху, ту хизматгорен ҷиноϑ турд корум. Арчӣз wазмин кор ца вид wуз wи кинум, ла̄к му айб дӯсикаϑ бахих̇ су̊д».

Wи та̄ти хах̇аϑ кинор wи анҷӯвдху, ба̄йи wи чӯд. Ба̄ден ар варϑ тар чӣд тойд. Тарами wи та̄т ху хизматгоренард лу̊д: «Му пуцард сар хушрӯй луқ вет! Ба̄д йи фарби шӣг мирд каɣет! Ма̄ш бойад нур хуши кина̄м! Му пуц мӯɣҷин вудху зинда̄ сут, беδҷин вудху пеδо сут!»