МАСАЛ ДАР БОРАЙИ БЕΔҶИН МАƔ

Йакбори Исо фарӣсийенат Таwрот молименард йи нақл чӯд:

«Йи чӯпу̊ни ху мол баша̄ндаϑ чӯх̇т. Wинд йигу̊н сад ду̊на маɣат wа̄рг вуд, ат йуйи хойиқ начӯд иде̂, йӣw аз wеванд аз мол ҷидо су̊дху бест. Йу ақу̊нийаϑ баша̄нд чӯпу̊н вуд, йуйи ху мол жӣwҷ чӯдху аз дилу ҷу̊ни wи пе̂йд, ла̄к йу вега̄ра сер видат ба хӯбийаϑ тар ху ҷой йоδд. Амо йуйи йи вега̄ ху молен йисоб чӯдху, чӯх̇ти wа̄δен наwадунӯ ду̊на̄ вад.

Йу чӯпу̊ни йакборга во йисоб чӯд – во наwадунӯ! Пас йи маɣ беδҷ, йа̄ хой оле сатат, хойи wӯрҷ wам хӯд! Арра̄нг вид, wам вире̂доw даркор!

Чӯпу̊ни во йакборга мис ху мол баша̄ндаϑ чӯх̇тху, фа̄мти иде̂, йи wа̄ргбуц нист – ику wа̄ргбуц иде̂, wи не̂ʒти те̂р них̇у̊на̄ ца вуд.

Йуйи дарвоза̄ баша̄ндаϑ чуст чӯдху, тӯйд wи wа̄ргбуц х̇икӣдоw. Йуйи wев наwадунӯ маɣ ла̄кчӯдху ца тӯйд, wи зорδти ғалч вуд, амо йу бойад тезди раwу̊н су̊д, ду̊н ҷа̄т йу wа̄ргбуц ар ҷойанд ца вуд, wирд хатар вуд.

Йу чӯпу̊ни аз са̄м ик дисга тез же̂х̇т иде̂, то пи кӯ фирӣптоwард қуwат мис wинд наред. Амо нӣстоwат да̄мδе̂дард wахт навуд, андӣдоwху х̇икӣдоw даркор вуд. Йу йила̄в ҷой тӯйдат во гӣр сутху, ху wа̄ргбуцаки қӣwд, ба̄ди ниғух̇т, ку аз йиҷондита wи бе̂ғдоw садо йоδдо най. Амо wев да̄х̇тенард фақат wи чӯпу̊н садо ду̊нд от вуд…

Йу wа̄ргбуц ног йиҷо оле ма̄сут! Йу чӯпу̊н йичанд пӣδ пи биланди сифӣдат, ху wа̄ргбуци қӣwд.

Ат йеданд ба̄д аз арҷоцайанд wи тар ғу̊ɣ бе̂ғдоw садо йат!

Wи чӯпу̊нанд аз же̂х̇тоw wи нафас байела̄ нах̇тӯйд, ат шич аз хуши wи дил мис тезак дараw δе̂д сут. Wи wа̄ргбуц ғал зинда̄ вуд!

Йуйи ба̄д ситиробу̊на̄ ик тар wи тараф же̂х̇т иде̂, азаманд бе̂ғдоw садо ца йат. Ба̄ди ху беδҷин wа̄ргбуцак вирӯд. Йу wа̄ргбуц йи кӯ дарӯнанд жӣрен байнанд хах̇ вуд, ба̄ди на тар пиро тӣдоw ва̄рδодат на тар зибо.

Йу чӯпу̊ни ху гаргинӯх̇а̄ пу̊ндакен чӯх̇т, ку чиду̊м ҷойва ар wи wа̄ргбуц хез ха̄вдоw бофт.

Йуйи фикр чӯд: «Йид хатарнок кор, амо бофтта».

Чӯпу̊н ба̄д оста-оста̄ ар wи wа̄ргбуц хез ха̄вд. Wийи зох̇тху, рибӯди ху ма̄ктиху, ба̄д оста-оста̄ пи тӣраҷ дараw сифӣд сут. Йу ик ди wахтанд хушбахтизор вуд! Йу wа̄ргбуци мис хах̇аϑ пи wи чӯпу̊н ма̄канд ху δод, йуйи х̇о мис фа̄мт иде̂, wийен зиwостху, мӯмкин хуш сут».

Исойи ба̄д охиру̊н лу̊д: «Хуδой мис ик wев одамен иде̂, аз Wийен δар ца δе̂ц, ик дисга йида х̇икӣрт. Ростаϑ тамард лу̊м, пи осму̊нта мис ик тар wи гунокор шахс иде̂, йу тез-тез тӯба̄ ца киδт, лапди хушита су̊д, ат тар wев наwадунӯ росткор иде̂, тӯба̄ чӣдоw wевард даркор ца нист, йича̄йаϑ хуши наких̇т.

САWОЛЕН

1) Исойи фарӣсийенард чиду̊м йикойа̄ (масал) лу̊д?

2) Тамард аз дам масаланд чӣз лапди хуш йат?

3) «Тӯба̄ чӣдоw» ма̄нӣ чӣз?