ИСО ТАР БАЙТ-ИНӢ
Китоби Муқадас, Луқо «Инҷил», 10 боб, 38-42 ойатен
Исо арwахт тар Ерусалӣм ца йат, Йу укмандаϑ тар Байт-Инӣ мис сут. Байт-Инӣ аз х̇а̄р йичанд киламетир δар вуд. Тарам Йу Ху пайраwенат, Ху ох̇ногу̊н чӣданд нӯст. Wа̄δен Марйамат, Мартойат, Ла̄зор вад. Йи рӯз Исо йат тар wев хезху, Марйами Wи нақл ниғух̇тат, Мартойи аwқот пе̂хт. Ба̄д Марто йат тар Исо хезху, норозӣйаϑи лу̊д: «А Худоwанд! Йид му йахи ми чӣд кор фукаϑ пи му ца ла̄кчӯҷ, йид баша̄ндо ганда̄, Ту икдинди чӣз лу̊ви? Ку лу дамард ла̄к йордам му қати ких̇т!»
Исойи wамард ҷаwоб δод: «Марто! Марто! Ту га̄п рост, ту ақу̊найаϑ фана̄ корат саргарδу̊ни кини, амо мам дунйойанд фақат йи чӣз ду̊нд даркор! Марйами ик wи бӣди чӣз интихоб чӯҷ, ат йута аз wам парҷӣвдоw набофт».
Wи бузург Молиманд Wи га̄п ма̄нӣ чӣз вуд? Йуйи хойих̇ чӯд Мартойат дига одаменард лу̊вд иде̂, дуйумдараҷа̄ чӣзенти ду̊нд лап диқат δе̂доw даркор нист. Марто мис бойад Марйам ҷиноw вид, йа̄ бойад фа̄мт иде̂, ғизойи рӯу̊ни аз ҷисму̊ни лапаϑ залӯлди. Бӣди чӣз – йид Исойи Масейард иму̊н вӣдоw. Wита аз йичийаϑ парҷӣвдоw набофт, ат йам замӣнти зиндагита ар wахт вид, тайор су̊д.
Амо ди ма̄нӣ ик дис нист иде̂, ик ми шич зиндагити бойад диқат ма̄δа̄δа̄м. Ар йак одаманд wи wазӣфа̄йат, wи кор йаст! Амо одаманд бойад ик да̄δ чӣзен аз wи рӯу̊ни зиндаги пиро ма̄δийен, арра̄нг Марто зиндагийанд ца вуд. Wамард ик wи wахтанд бар Наҷотδа̄δӣҷ га̄пен аwқотпе̂хт залӯлди вуд.
САWОЛЕН
1) Исо тар Ерусалӣм ца йат, Йу чи чӣданд гӣр сут?
2) Мартойанд wам wух̇ тар аwқотпе̂хт сутху, йа̄йи аз чӣз ринӯхт?
3) Исо чӣзард розӣ насут иде̂, ла̄ к Марйам Марто қати йордам ких̇т?