МАСАЛ ДАР БОРАЙИ НЕК СОМАРИ

Йакбор тар Исо хез йи чорик йат. Йуйи Муқадас Нивишчин лап баша̄нд фа̄мт. Wи даwра̄йен дисга одамен шарийатду̊н лу̊д, йа̄ни wа̄δен Хуδой Қонунен баша̄нд фа̄мт. Йу чорик Молимард саwол чиδе̂д вуд, амо йуйи ху ҷа̄т напех̇цтат, йу Исо озимӯд чичӣд вуд. Йуйи фикр чӯд: «Ага Исота му саwолард ҷаwоб ца δӣд, wузта укмандаϑ wи га̄панд хатойи вирӣм».

Ба̄ди аз Исо пех̇цт: «Молим, wуз чӣрумху, ла̄к Хуδой айоти абади мурд насӣб ких̇т?» Исойи ба ҷойи ҷаwоб пех̇цти wи: «Нивишчинанд чӣз лу̊вд?» Йеданд йу чорик маҷбур сут хубаϑ ҷаwоб δӣд: «Йаманд лу̊вд иде̂, Хуδой аз дилу ҷу̊н жӣwҷ кийат, ху сар наздӣк одам ху ҷиноw жӣwҷ ки».

Исо розӣ сут: «Ростат лу̊д, ик дисга киху айоти абадита ба каф кини». Йу шарийатду̊ни бераwот ху йис чӯдху, ситиробу̊на̄йи лу̊д: «У̊н, wуз фа̄мум. Амо му сар наздӣк одамта ча̄й йисоб су̊д?»

Исойи wирд лу̊д: «Wуз йи wоқийа̄ турд нақл кинум:

«Йи чорик аз Ерусалӣманд тар Ериӯ тӯйд. Wи пу̊нд

бийа̄бу̊нва вуд. Йамвайен розанен фук wахт мусофирен пу̊нд анҷӯвд. Wа̄δен аз та̄х зибо ху δодху, наwен мусофирен йатат, wа̄δен wевти ниδовд. Розаненен wи чорик хуб δодху, ар чӣз wинд ца вуд wийен зох̇тху, рицостен. Йу захмийаϑ пу̊ндти ред.

Ба̄д аз йичанд wахт йи рӯу̊ни робар йамва наɣҷӣд.

Йуйи wи wе̂х̇чин чорик wӣнт, амо ху пӣци гарδентху тӯйд. Йу рӯу̊ни робари хойих̇ начӯд йордам wирд ких̇т. Ба̄д аз йичанд дақӣқа̄ йамваво йига одам наɣҷӣд. Йу аз Левӣ аwлод вудат ибодатху̊на̄йанди хизмат чӯд. Йу мис wи рӯу̊ни робар ҷиноw гӣр насутху тезаϑ наɣҷӣд.

Охиру̊н йи чорик марка̄б қати йамва наɣҷӣд. Йу на рӯу̊ни робар вудат, найи ибодатху̊на̄йанд хизмат чӯдат, нага исроӣли вуд. Йу сомари вуд, йа̄ни аз Сомарийа̄ вуд. Исроӣл мардуманд сомарийен қати баша̄нд муносибат навуд, баракс wа̄δен wев қати бад вад. Аз рӯйи wев фикр, гуйо сомарийен Хуδойард ғалат ибодат кинен. Ику бечора̄ чорик пу̊ндти захмийаϑ wе̂х̇чин ца вуд, wинд ачаϑ умеδ навуд, иде̂, йу сомарита wирд йордам ких̇т. Амо йу сомарийи wи захми одам wӣнтху, ра̄м wирд йат.

Йуйи, wи захмийен вӣстху,оста̄йикаϑи ху марка̄бти wи рибӯд. Ба̄д пу̊ндва мис оста-оста̄ тӯйдху, тар йи мему̊нху̊на̄ хезен йат. Йу сомарийи тар wам мему̊нху̊на̄ пӯл да̄кчӯдху, wи захми чорикен тарам аɣе̂зд.

Х̇а̄бен х̇овдат, са̄ракийи йу сомари wам мему̊нху̊на̄ сойибард пӯл да̄кчӯдху, лу̊ди: «Пис ди касалаϑ палойс. Ага да̄δ пӯлен ками ца кинен, wузтаво аз гах̇т йадумху, арцу̊ндта сарф дирд ца кини, wузта wи турд гарδенум».

Исойи дам Ху масал тайор чӯдху, пех̇цти: «Пас wи захми чорикард сар наздӣк ча̄й вуд?»

Дам саwолард ҷаwоб δе̂доw осу̊н вуд. Йу шарийатду̊ни лу̊д: «Арча̄йи wирд йордам ца чӯд» Исо розӣ сут: «Ростат лу̊д, пас ту мис дига ки»!

САWОЛЕН

1) Исойарди ча̄й саwол δод? Йуйи чӣз пех̇цт?

2) Исойи чиду̊м масал нақл чӯд?

3) Ма̄ш сар наздӣк одам ча̄й?