ИСОТА Х̇АЦ ПӢЦВА ТӢЗД

Исо х̇огирденен х̇а̄бинди ких̇тӣ қати ба̄ри Ҷалӣлва аракат чӯд. Исо Хубаϑ wев қати навуд, Йуйи пи кӯ тоқаϑ дуо чӯд. Wи х̇огирденен ких̇тӣ қати аз йи соwат зийод ба̄рва тойд. Wевард тезди тӣдоw даркор вуд, ду̊н ҷа̄т хах̇ х̇ӯʒ андӯйд. Ба̄р маwҷенен wам ких̇тӣ хах̇ϑди дараw ҷумбент сатат, хатар мис лапди сут, ат wа̄δ бойад тар Кафарнаум сен. Wеви Исо тарам римод, ат wеварди wа̄да̄ δод иде̂, Хубаϑта таредийард йоδд.

Wа̄δ х̇огирденен хойих̇ чӯд иде̂, тар зӣмба̄ нах̇тийен, амо нава̄рδоден, ду̊н ҷа̄т х̇ӯʒи wам ких̇тӣ тар йига тараф ба̄р δод. Х̇ӯʒ лап хах̇ вуд, ди ҷа̄т ба̄д тар зӣмба̄ нах̇тӣдоwард wев қуwат нафирӣпт.

Ат йеданд х̇огирден цем йакбораϑ арчӣзца рухити δод. Йу рухи х̇ац тартӣр ҷумбенчак сутат оста-оста̄ тар wам ких̇тӣ хез наздӣк сут. Йу wам ких̇тӣйард соф қарӣбди сутат, wа̄δен фа̄мт иде̂, йу одам вуд. Йӣw аз wев х̇огирденанди аз х̇оҷ wа̄ғаст δод. Арчӣзца одам дастӯр х̇ац пӣцва тӣзд! Дисга бойад ма̄вид!

Йи ку арчӣзца тар wев хез наздӣк ца сут, йу хой рӯ вудат йо арчӣзцага нома̄лумат са̄маҷин кочор вуд!

Йу наздӣкди сутху wа̄δен wӣнт иде̂, йу одами – ага йу одам ца вуд – ху δустен рибӯд ху ғе̂втиху хах̇аϑи қӣwд, ду̊н ҷа̄т wи х̇ӯʒ садойанд wи аwоз баша̄нд от навуд Йуйи wевард лу̊д: «Х̇оҷ ма̄δе̂рет, идум Wуз!»

Йид Исо вуд, йа̄ни wев Молим! Wа̄δен Wи садо қати Wи фа̄мтху, wитийаϑен сабук ху йис чӯд. Х̇огирденанд wев дил пур сутху, ностен, ца wахтта Йу тар wев хез фиропт, амо йӣw аз wеванди тоқат начӯд. Петрус бетоқат одам вуд. Ба ғайр аз ди, йуйи Исо ду̊ндард хах̇ жӣwҷ чӯд иде̂, йилоҷ wирд ца вуδҷат, же̂х̇чатху пироди Wирд суδҷат, амо йеданд набӣфт. Ча̄й ва̄рδед х̇ац пӣцва тӣздат, амо бун ма̄нӣϑт?

Петруси фикр чӯд: «Wуз чӣзард нава̄рδӣм? Исо х̇ац пӣцва ца тӣзд, пас wузта мис ва̄рδӣм, амо хубаϑта нава̄рδӣмат, укмандаϑ Wи йордам қати».

Дисга фикр wи дилард йатху, йуйи қӣwд: «Худоwанд, ку ик дисга ки иде̂, ла̄к wуз х̇ацва тар Ту хез йадум!»

Исойи wирд ҷаwоб δод: «Йа» Петрус аз wам ких̇тӣти ха̄вдху, ху йи поδи х̇ацти рибӯд. Wи поδ wам х̇ац тӣрти гӣр сут, арра̄нг зима̄δти гӣр ца су̊д. Ба̄ди ху йига поδ мис х̇ацти рибӯдху пу̊нд йамва тӯйд.

Йу х̇ац пӣцва тӯйд! То Исо хезец дӯсикга ҷой ред.

Петруси чӯхт йакбораϑ ғула̄ маwҷ пеδо сатху, тар wи хеза̄ҷ йат. Йа̄ биландизор андойдху, хӣф қати рост тар wи поδен хез йат. Петруси ачга тар Исо начӯх̇т, wинд wи wух̇ тар wам маwҷ вуд. Йеданд ба̄д са̄м wи диланд δод. Арра̄нги х̇ац тӣрти ху гӣрчӣд ца ва̄рδод, wам маwҷтита мис ку ва̄рδедо? Амо йу бун дараw нӣст сутху хах̇аϑи қӣwд: «Йо Худоwанд, наҷот му δа!»

Исо ди wахтанд соф wи па̄линди вуд. Йуйи Ху δуст аϑе̂ртху, Петруси анҷӯвдху сенти wи.

Исойи wи пех̇цт: «Е беиму̊н! Тут чӣзард боwари наδод?»

Петрус аз ма̄рг ғе̂ванд нах̇тӯйд, амо йу ху иму̊н қуwат қати нанах̇тӯйд, wийи Хуδой Пуц, Исойи Масе зиwост.

Ик ди wахтанден wа̄δ дига х̇огирденен мис тар Исойат Петрус хез фирӣптху, wа̄δен мис ар ких̇тӣ дед. Йеданд ба̄д во аҷойиб кор сут – йу х̇ӯʒ қарор чӯд. Йа̄ ких̇тӣйи во х̇ац пӣцти оста-оста̄ аракат чӯд.

Йид wоқийа̄йи х̇огирденти ду̊ндард хах̇ та̄сӣр чӯд иде̂, wа̄δен йат тар Исо хезху, ху ка̄лен Wирд хамбентху, лу̊ден: «Исо, Тут ақу̊нийаϑ Хуδой Пуц!»

Wа̄δен ик дам х̇а̄б йакборга мис wӣнтху фа̄мтен иде, бе Исойаϑта йичӣзаϑ нава̄рδийен.