ПӢНƷ АЗОР НАФАР СЕР СИТТОW

Исойи йи рӯзи пура̄ мардум қати нақл чӯд. Wи мардум дарӯнанд фақат мардӣнайенаϑен пӣнʒ азор вад. Ба ғайр wев фана̄га ɣиникат кӯдак вуд. Исойи найинки нақл чӯд, Йуйи фана̄ касаленга хуб чӯд.

Йа̄ рӯз вега̄ сатат, Исо х̇огирденен Wирд лу̊д: «Молим, йам мардум бойад йичӣз хӣрт, мирд аwқот даркор»

Исойи оста̄йикаϑ шӣнтху лу̊ди: «Там йичӣз wевард да̄кет!» Филӣппуси ба̄д Wирд лу̊д: «Ма̄ш ик дисга лап мардумард аска̄ аwқот ва̄ра̄м? Ма̄шҷа фақат пӣнʒ гарδа̄йат δу мойи ду̊нд. А̄мга ма̄ша̄м бийа̄бу̊нанд. Ба ғайри ди, пӯл мис ма̄шҷа дӯсаϑ».

Исойи wевард лу̊д: «Wев гарδайенат мойийен тар Му хез вет».

Исойи ба̄д аwал wев гарδайен зох̇тху, Хуδойарди шукрат чӯдху, аз Wийи баракат хойих̇ чӯд. Ба̄ди wев гарδайен ка̄нд чӯдат ар сабадени рибӯд. Wев мойийен қатийи мис айнан ик дисга чӯд.

Йеданд вога мӯҷиза̄ сут. Х̇огирденен ху цемен δуст δодху, тар wев сабаденен чӯх̇т. Йи сабаданд гарδа̄йат мойи – йид йичӣзаϑ нист! Ат шичен йаманд фукаϑ сабаден аз гарδа̄йат мойи пур вад!

Ба̄ден wи мардум ох̇ти не̂δдху, wи гарδа̄йат мойийен wевард тақсӣм дараw чӣд сат, амо йу харч ар wев сабаден ачаϑ тайор насут. Йу фукаϑард фирӣпт! Фукаϑен сери зор сат.

Исо цара̄нгин Одам? Wинд ик дисга қудрат аска̄данд иде̂, Йу ик дисга аҷойиб корен ца ких̇т?

Исойи ба̄д Ху х̇огирденард лу̊д: «Ди мардум дарӯн ноɣетху, арчӣз ца реδҷ, ҷа̄м wи кинет. Йамард бойад йичӣзаϑ ма̄рист».

Wа̄δен wи реδҷин харч ҷа̄м чӯдху вӯден. Ар йаки wевҷа йӣwи сабад пури харч вуд. Йу мардум сер сут, ат йу бех̇δоδҷин харч сабаденанд пур вуд!

Мардуми ди мӯҷиза̄ wӣнтху, айру̊нен сатху тар йакдигарен лу̊д: «Йид ақу̊нийаϑ Ику Пайғумбар иде̂, пи мам ҷау̊н чийат цавуд».

Амо сад афсӯс иде̂, ик wи пӣнʒ азор нафар дарӯнанден ик дисга одамен мис вад иде̂, wа̄δен ачаϑ нафа̄мт Исо чӣз ҷа̄т йаϑчат чӣр чичӣд. Wеванд дисга фикр вуд: «Ага Исо ик дисга ба осу̊нийаϑ харч ма̄шард ца виред, пас ма̄шард кор чӣдоw мис даркор нист. Вет Wи хурд подх̇о зе̂за̄мху, Йута дига ма̄ш чост».

Исойи wи мардум фикр фа̄мт, амо Йу ди ҷа̄т найаϑч иде̂, замӣнти подх̇ойи ких̇т. Ди ҷа̄т ба̄д, Исо аз wи мардум хезанд тезаϑ тӯйдху, тоқаϑ сифӣд пи кӯху, дуо дараw чӣд сут.

Йу мардум тар ху чӣден тӯйд, ат йила̄в одаменанд пи Исо ачга умеδ навуд.

Йуйи ба̄д пӣнʒ гарδа̄йат δу мойи зох̇тху, пи осму̊ни чӯх̇тху,баракати wевард δод. Ба̄ди ка̄нд wев чӯдху, Ху х̇огирденарди да̄кчӯд, ла̄к wа̄δ мардумард wев да̄кен.

Фукаϑен хӯдху, серен сат, ат йу бех̇δоδҷин харч дуwозда̄ сабаданд сут.

САWОЛЕН

1) Мардум чӣз ҷа̄т тар Исо хез йат?

2) Худоwанди цара̄нг дивих̇т иде̂, Wинд фукчӣзардаϑ қудрат йаст?

3) Ба̄ди ик ди мӯҷиза̄, мардуманд дар борайи Исо чӣз нақша̄ вуд?