ТӮФУ̊Н АР БА̄ Р

Йи рӯзи Исо Ҷинесор қу̊л хезанд мардумард та̄лӣм δодху, охиру̊ни Ху х̇огирденард лу̊д: «Ма̄ш бойад мам қу̊лард аз wи тараф наɣҷӣса̄м».

Wи х̇огирденен ких̇тӣ тайора̄ чӯдху, Исо қатийен йакҷойаϑ арам дедху, раwу̊нен сат .

Исо wам рӯз лап мот сут, ба̄д wам ких̇тӣти йи кунҷанд х̇овд. Ат йакбораϑ хах̇ х̇ӯʒ андӯйд. Дисга хах̇ х̇ӯʒ ба̄ри Ҷалӣланд тез-тез сут. Ба̄р маwҷенен wам ких̇тӣ сентат не̂δден, wа̄δен ду̊ндард хах̇ вад иде̂, йа̄ ких̇тӣ қарӣб чипа̄ли сицат. Исо х̇огирденен фа̄мт иде̂, аз wи х̇ӯʒ wевард хах̇ хатар, ба̄ден Худоwанд ага̄ чӯд: «Молим, ма̄ша̄м бун чи нӣст, нахо турд фарқ нист?»

Исо аз ху ҷойти андӯйд. Йуйи мис wев ғула̄ маwҷен wӣнтат, wи х̇ӯʒ садойи х̇удат, йиси чӯд иде̂, йа̄ ких̇тӣ хатаранд. Исойи ба̄д wи офатард лу̊д: «Гӣр са! Ба̄с ки!»

Йу тӯфу̊н wитийаϑ қарор чӯд. Wа̄δ маwҷенен бедат йа̄ х̇ац ору̊м сат.

Йид мӯҷиза̄ вуд! Дисга ғал ачаϑ навуδҷ иде̂, тӯфу̊н йакбораϑ қарор ких̇тат, маwҷен wитийаϑ бесен. Амо шич, йи га̄пи Худоwанд қати wитийаϑ ору̊ми сут! Х̇огирденен дисга мӯҷиза̄ ғал ачаϑ наwӣнч.

Худоwанди ба̄д wев пех̇цт: «Тама чӣзард х̇оҷ δе̂рет? Тама иму̊н ка̄йи?» Х̇огирденанд а̄м са̄м wев диланд вудат, а̄мен айру̊н вад. Wа̄δен йакдигарард лу̊д: «Йид ча̄й иде̂, а̄м х̇ӯʒат а̄м ба̄р ди ца ниғу̊ɣен?» Wа̄δен иму̊н қати қабӯл чӯд иде̂, Йу wев молим Хуδой Пуц, амо ху ақл қатийен пи ди ма̄нӣ нафирӣпт.