ЙОӢР РИЗӢНТА ЗИНДА̄ СУ̊Д

Йоӣри ғал дисга тез ачаϑ наже̂х̇ч. Йу йӣw аз ибодатху̊на̄ хӯҷайӣнен вуд, ат ик wа̄δ одамен иде̂, wеванд дисга wазӣфа̄ ца вуд, wевард же̂х̇тоw мӯмкин навуд. Амо йу цара̄нг ких̇т, шич wи ризӣн чимӣд вад. Йа̄ наw дуwозда сола̄ сат. Йоӣри ху ризӣн лап жӣwҷ чӯд, ат шич wи цем пиронди wам олат рӯз ба рӯз гандади сут. Ик ди wахтанд Исо ху х̇огирден қати тар wев х̇а̄р йат.

Йоӣри фикр чӯд иде̂, су̊д тар Исо хезху йордам аз Wи хойих̇ ких̇т. Йу ба̄д сут тар Исо хезху, чизу̊ни ху δодху пураламаϑ зорги дараw чӣд сут: «Молим, му ризӣн чимӣд. Ту қабӯл са̄м, ку ти хуб wам ки! Ту қабӯл са̄м! Ку ти тезди, ла̄к дер масу̊д!»

Исойи ба̄д wирд лу̊д: «Тойда̄м, ту пиро δийат, Wуз ту да̄мти».

Амо wи ғӯл мардум хезва тезаϑ наɣҷӣдоw набӣфт,ди ҷа̄тен ба̄д wа̄δ оста-оста̄ тойд. Ди wахтанд Йоӣр хизматгор ситиробу̊на̄ йатху, лу̊ди wирд: «Ту ачга Молим носойах̇ ма̄к. Ту ризӣни соф ик шич ху ҷу̊н сипорт».

Йоӣранд wи зорδ чи х̇ичӣфт вуд. Йида тайор! Нозийу̊н ризӣн мод! Фук саргарδу̊ни хардарег. Йоӣр анде̂ғаϑ ред, ат wи пӣц мурδа̄ ра̄нгти сафедизор вуд.

Исойи мис wи хизматгор га̄пен х̇уд. Йуйи ху δуст рибӯд Йоӣр сӣвдтиху, лу̊ди: «Х̇оҷ ма̄δе̂р, ту ризӣнта хуб су̊д».

Йоӣри нафа̄мт, чиду̊м га̄пард боwар ких̇т. А̄м ға̄мат а̄м са̄м wи диланд вудат, тар ху чӣдаҷ хез тӯйд. Исо мис wи да̄мти раwу̊н сут.

Wа̄δен тар wи чӣд хез наздӣк сатат, нӣwдоw садо от сут. Исо дед тар wи чӣдху лу̊ди: «Ма̄на̄wет! Йид ға̄цбиц намӣɣʒ, йид х̇е̂вʒ!»

Йу мардуми Wи га̄пен х̇удху шӣнтен Wи. Хе̂р wа̄δен фа̄мт иде̂, йа̄ ға̄цбиц ақу̊нийаϑ мӣɣʒин вад. Йид цара̄нг ва̄рδед дисга бема̄нӣ га̄пен δӣд! Исойи фукаϑ wев зиwостат, тарамен wам ға̄цбиц додат на̄нат, Йуанойат, Петрусат, Йа̄қӯб ред. Йа̄ ға̄цбиц хубаϑ ар бӣреҷ вад. Худованди wам δустард анҷӯвдху, лу̊ди: «Еға̄цбиц, андиʒ!»

Йа̄йи ба̄д йи-δу пӣδ хах̇аϑ нафас тӣждху ху цемени йет чӯд. Wам рангат рӯй тар wам йатху, йа̄ андойд. Wам додат на̄нард боwари мис навуд. Wев ризӣн зинда̄ сат! Wа̄δен хушбахтизор вад! Исойи wам додат на̄нард лу̊д: «Ху ризӣнард йичӣз аwқот да̄кет, ла̄к қуwат анҷафст».

Исо ба̄д андӯйдху, тар wам ға̄цбици йакборга шӣнтху, аз wи чӣданд нахтӯйд. Wа̄δ Wи х̇огирденен мис аз ди кор айру̊н ца вад, ба худен йатху, ху Молим да̄мтийен нах̇тойд, ат йу ху̊наwода̄ ху чӣданд хушбахтаϑ нӯст.

Ат Йуйи фукаϑ wев зиwостху, wам δустарди анҷӯвдху, лу̊ди: «Еға̄цбиц, андиʒ!» Ба̄д wам рӯ во гах̇т чӯд;

йа̄ wитийаϑ андойдат, Йуйи римод аwқот wамарард вен.