БЕWА̄ ƔИНИК ПУЦТА ЗИНДА̄ СУ̊Д

Исо тар Ноӣн ну̊м х̇а̄р тӯйд. Тарам мис фана̄ мардум Wи қати вуд. Йу тар х̇а̄р дарвоза̄ хез наздӣк сутат, азаманден нарву̊ндти майит зиwост. Ат йи ɣиники wи майит да̄мти нӣwдат аз wи дарвоза̄ нах̇тойд. Мардум тар wам хез йатат дилпурийен wам δод. Йа̄ ɣиник хубаϑ беwа̄ вад, ат йу мӯɣҷин ғаδа̄ wам йӣwикаϑ пуц вуд.

Исойи wам ɣиник ға̄мат алам wӣнтху, Wирд аз wам ра̄м йат. Йу йат тар wам хезху, лу̊ди: «Ма̄на̄w!»

Йу мардум wам нарву̊нд қати гӣр сут. Исо сут тар wев хезху, Ху δусти рибӯд wам нарву̊ндтиху, wи майитарди лу̊д: «Е ҷиwу̊н! Турдта лу̊м, андиʒ!»

Йу ғаδа̄ зинда̄ сутху, андӯйдху дараw га̄пδе̂д сут. Йид мӯҷиза̄ вуд! Исойи на̄нард wам пуц зинда̄ чӯд. Йу мардуми аwал х̇оҷ δӯйдху фукаϑен қарор вад, ат ба̄ден фукаϑ йакдигарард лу̊д: «Тар ма̄ш хез бузург пайғумбар йаϑч! Хуδойанд Wи халқ Wи байоδ δод!

Йу халқи Исроӣл Хуδойард шукрат лу̊дат ситоwах̇и Wи чӯд. Йид мӯҷиза̄ Ноӣнанд ца вуд, ба̄д аз йичанд wахт Йаӯдийа̄йард фукаҷо па̄н сут.