ƔИНИК ХУБ СИТТОW
Китоби Муқадас, Луқо «Инҷил» , 8 боб, 42-48 ойатен
Исо ких̇тӣти саwор сутху, во тар Кафарнаум гах̇т чӯд. Тарам фана̄ мардум пи Wи нӯсчин вуд. Тар wи х̇а̄р йу мардум та̄нг кучайенва Wи да̄мти тӯйд. Исойард пу̊ндтӣд қӣн вуд, ду̊н ҷа̄т Wи гаргинӯх̇а̄ мардум лап вуд. Ба̄д Худоwанд йакбораϑ гӣр сутху, ба̄д пӣц гах̇тху, лу̊ди: «Йид ча̄й тар Му ангихт?»
Йуйи йис чӯд, иде̂ аз Wинди қуwат нах̇тӯйд. Wи-денен айру̊н сатху лу̊ден: «Молим, хе̂р Хубаϑат wӣнч иде̂, Ту гаргинӯх̇а̄ дира̄нг лап мардум. Мӯмкин фана̄ одамен тар Ту ангахцен, ат Ту шич пех̇ци иде̂, ча̄й тар Ту ангихт». Исойи wевард йичӣзаϑ налу̊д, амо Ху гаргинӯх̇а̄йи чӯх̇т, ку ча̄й тар Wи ангӣхт.
Wи мардум дарӯнанд йи касал ɣиник вад. Йа̄ бӣст соланд тар фана̄ духтурен хез вадат, ху табобатарди фана̄ пӯл сарф чӯд, амо йичӣзаϑи wамард йордам начӯд. Йа̄йи мис дар борайи Исо мӯҷизайен х̇удху, тар Wи хез йат, ла̄к Йу wам хуб ких̇т. Йа̄йи фикр чӯд иде̂, аз Худоwанд зибота ца су̊д, Йута wам наwӣнт, ба̄дта тар Wи луқаϑ ца ангахцт, хубта су̊д. Ика̄ ɣиники Исо қудратард бобвари δод иде̂, Йута wам хуб ких̇т! Йа̄ ба̄д наw тар Wи бузург Молиманд тар Wи луқ ангихтат, wитийаϑи йис чӯд иде̂, хуб сат.
Исойи фа̄мт иде̂, ик ди ғӯл дарӯнанд ча̄й хуб сут, амо Йу нӯст, ца wахта йа̄ ɣиник хубаϑ тар Wи хез йоδд. Йа̄ ɣиник ба̄д аз х̇оҷ пи лаɣʒа̄ δодху, хубаϑ тар Wи хез йат.
Йа̄йи Худоwанд поδенард ху пите̂wдху, ху нақлийи Wирд чӯд. Исойи ме̂рабу̊нийат ма̄бат қати wамард лу̊д: «Ризӣн, ту иму̊ни ту хуб чӯд. Андиʒху ба салу̊матийаϑ са тар ху чӣд»!
САWОЛЕН
1) Худоwанд ху х̇огирден қати тар чиду̊м х̇а̄р йат?
2) Ика̄ ɣиник иде̂, бӣст сол касал ца вад, йа̄йи чӣр чӯд?
3) Wам ɣиники чӣз хуб чӯд?