МА̄ ЙӮБ ОДАМ ХУБ СИТТОW

Йи чорики аз ху ох̇но пех̇цт: «Тут йи хабар х̇уδҷо? Исо тар ма̄ш қишлоқ йаϑч! Йид ику Шахс иде̂, касален хуб ца ких̇т». Йу wи ох̇нойи лу̊д: «Тут бағер ма̄ш рафӣқ ҷа̄т ди лу̊д? Хе̂р йу пӯндтӣд пу̊ндтӣд нава̄рδед. Йу цара̄нг тар Исо хез су̊д?»

Йу чорики ба̄д лу̊д: «Ва тар Исо хез wи йоса̄м» Wа̄δен ба̄д йи-δуга балад одамен қӣwдху, тар ху ма̄йӯб ох̇но хезен сат. Wа̄δен қатийаϑ йи шатак сохта̄ чӯдху, wи касал одамен йамти рибӯдху, ик wи чӣданд Исо гӣр ца сут, тарамен тойд. Амо йеданд йи қӣни вуд. Йу мардум Исо ниғих̇тоw ҷа̄т ик дис лап ҷа̄м сут иде̂, тар wи чӣд ҷой навудат, wи диви пиронди мис фана̄ мардум вуд. Wа̄δ ох̇ногу̊нен wи ма̄йӯб одам қати ачаϑ тар Исо хез дедоw нава̄рδоδҷат. Ат йӣw аз wеванди лу̊д: «Мунд йи фикр, вет дишӣдва ди wеδа̄м!»

Wа̄δ wи амрогу̊нен айру̊н сатху лу̊ден: «Ма̄ша̄м ту га̄п ма̄нӣ нафа̄мт. Дишӣдва цара̄нг ди wеδа̄м» Йуйи ба̄д ху фикр wевард лу̊д: «Ди чӣден ростоw ҷира̄й қати биɣӣн чӯҷ. Ма̄ш wи ку̊ɣʒ кина̄мху ми ху ох̇но в ва̄х̇ қати арам хамбена̄м».

Йӣw аз wев ба̄д пис ва̄х̇ат асбобен сут. Wа̄δ йила̄вгайен wи ма̄йӯб одам зох̇тху нарву̊ндвайен пи дишӣд wи сифент. Йу кор ду̊нд лап навуд: wа̄δен ба̄д аз йичанд дақӣқа̄ wи дишӣд ку̊ɣʒ чӯдху ва̄рδоден wи ху касал ох̇но ар чӣд хамбенен. Йу ку̊ɣʒ ик дисга ҷойанд вуд иде̂, Исо рост wи бӣранд wирӯвҷин вуд. Аз бӣри йича̄й ца чӯх̇т, wев чорикен пӣц пис wи ку̊ɣʒаϑ от вуд. Wи касален ва̄х̇ қати ар Исо пиро хамбент. Исойи аwал пи тӣр чӯх̇тху, шӣнтиху, ба̄ди тар wи ма̄йӯб одам чӯх̇ту, аҷойиб га̄пени δод: «Ту гунойента турд бахих̇ сен».

Йаӯди катанакенат фарӣсийенен Исо хезанд ца вад, wев қа̄р сифӣд. Wа̄δен фикр чӯд иде̂, гунота фақат Хуδой ду̊нд бахих̇ чӣдоw ва̄рδед, ат Йам чӣзард дисга га̄пен δӣд. Исойи фа̄мт wа̄δен дар борайи чӣз фикр чӯд, ба̄ди лу̊д wевард: «Тама фикр қати, чӣз лу̊вдоw осу̊нди: ту гунойента турд бахих̇ сен, йо: андиʒху пу̊нд ти?»

Wа̄δен фа̄мт иде̂, гунота фақат Хуδой ду̊нд бахих̇ чӣдоw ва̄рδед. Амо Исойи wи ма̄йӯб одам гунойен бахих̇ чӯдху, ик дитийи wевард дивих̇т иде̂, Йу ростоw ахлоқ молим нист.

Амо wа̄δен во йига фикр чӯд: «Йид ғал ма̄лум нист, ку wи гунойенен ақу̊нийаϑ бахих̇ сиц йо най? Ага Тут ди касал хубчӣд ца ва̄рδоδҷат, wитийен фукаϑ фа̄мчат иде̂, Тунд бузург қудрат».

Исойи wев фикрийен фа̄мтху, лу̊ди: «Тамет дар борайи гунойен бахих̇ чӣдоw х̇удху, бойад фа̄мет иде̂, Хуδойи Мурд а̄м касалийен хубчӣдардат а̄м гунойен бахих̇чӣдард қуwатат қудрат да̄кчӯд».

Йуйи ба̄д тар wи касал чӯх̇тху, лу̊ди: «Андиʒ, ху бӣреҷ зиху тар ху чӣд са!» Йу чорик wитийаϑ андӯйдху, ас wи касали халос сут. Ба̄ди ху бӣреҷат wев ва̄х̇енга зох̇тху, ди ху wӣз қати wи мардум мобайнва наɣҷӣдху тӯйд. Йу аз Исо минатдор сутху Хуδойарди шукрат лу̊д. Wа̄δ wи ох̇ногу̊нен аз тӣр, wи дишӣд ку̊ɣʒва ца чӯх̇т, хушен сатху тойден азаманд.

«Амо ла̄к тама фа̄мет иде̂, Одам Пуцанд замӣнти ик дисга қудрат йаст иде̂, Йу гунойен бахих̇ ких̇т», ба̄ди wи ма̄йӯб одамард лу̊д: «Турдта лу̊м: андиʒху, ху бӣреҷ зиху, тар ху чӣд са». Йу ба̄д wитийаϑ wев пиронди андӯйдху, ху бӣреҷи зох̇тху, Хуδойардига шукрат чӯдху, тӯйд тар ху чӣд.