ПЕС ОДАМ ХУБ СИТТОW

Исойи ғал замӣнти хизмат ца чӯд, Йу тез-тез тар сафар нах̇тӯйд.

Йу тар фана̄ х̇а̄ренат қишлоқен сутат, фана̄ касаленат ма̄йӯбенен пи Wинди δодху, Йуйи wев хуб чӯд. Wи даwра̄ Фаластӣнанд пес касали вуд, йу пу̊станд сутху аз йи одам пи йига δод. Йид қӣн касали вудат ачаϑ табобат насут.

Йи рӯз Исо ху х̇огирден қати тар Ҷалӣл йатху йи пес одам пи Wинди δод. Йу бечора̄йи же̂х̇т тар Исо хезху, чизу̊ни ху δодху, зоргийи Wирд чӯд: «Йо Худоwанд! Ага хойих̇ ца кини, ва̄рδийи пок му ки!»

Ику одами Исойард хах̇ боwари δод! Худоwанди Ху δуст тар wи δодху лу̊ди: «Хойих̇ум пок са!» Йид на фақат Исо хойих̇ вуд, йид Хуδой амр вуд. Ба ғайри Хуδойи йича̄йаϑ дисга лу̊вдоw за̄ра̄ начӯҷат!

Ба̄д аҷойиб кор сут: йу касал хуб сут. Wи пу̊ст тоза̄ сутху, йу хушат хушбахтаϑ Исо хезанд wирӯвҷин вуд. Худоwанди хойих̇ начӯд иде̂, ла̄к йу одам дар борайи ху хуб ситтоw йичирд нақл ких̇т. Исойи wирд лу̊д иде̂, тар рӯу̊ни робар хез су̊дху, ху хуб ситтоw ҷа̄т қурбу̊ни ких̇т, арра̄нг Мӯсо Қонӯнанд нивишчин ца вуд.

Амо йид мӯҷиза̄ пину̊н чӣдоw набӣфт. Ба̄ди wи тар Исо хез соф лапди мардум дараw йат сут. Wа̄δен хойих̇ чӯд ниғу̊ɣен Wийат, хуб сен.