АҶОЙИБ МОЙИАНҶӢВД
Китоби Муқадас, Луқо «Инҷил», 5 боб, 1-11 ойатен
Йи рӯзи Исо Ҷинесор қу̊л хезанд Хуδой Калӣма̄ нақл чӯд. Йу мардум ду̊ндард лап ҷа̄м сут иде̂, Исо маҷбӯр сут ар ких̇тӣ деδдху, дӯсикга δарди су̊дху, азаманд нақл ких̇т. Дисгайен а̄м фукаϑ Wи wӣнтат, а̄мен фа̄мт Йута дар борайи чӣз нақл ких̇т. Исойи ху нақл тайор чӯдху, Петрусарди лу̊д: «Мам ких̇тӣ тар мобайн йосху, ба̄д тӯр ар х̇ац питиху, фана̄ мойита анҷа̄ви».
Петрус айру̊н сутху, пех̇цти: «Ик шичо? Мобайни қу̊ландо?»
Петруси ик ди фа̄мт иде̂, маδорта йича̄йаϑ мойи наанҷӣвд, ат мобайни қу̊ландта мис мойианҷӣвд набофт, ду̊н ҷа̄т йаманд лап курцху тӯрта ар х̇ац бун нафиропт. Мойианҷӣвд зӣмба̄йанд баша̄нд, ла̄к тӯр ар х̇ац бун фиропт.
Петруси ба̄д лу̊д: «Молим, ма̄ша̄м катарах̇а̄б ме̂нат чӯд, амо йи мойийа̄м мис наанҷӯвд. Рост Турд ца лу̊м, ма̄шта мобайни қу̊ланд йичӣзаϑ анҷӣвдоw нава̄рδийа̄м. Амо ма̄шта Ту га̄пти кина̄м, wуз таш са̄м тар мобайнху, тӯрта пите̂м».
Андрийосат Петрусен ар ких̇тӣ дедху тойден. Йуанойат Йа̄қӯбен ар йига ких̇тӣ дедху, wев да̄мтийен раwу̊н сат. Wевард аҷойиб вуд, ку йид мойианҷӣвд таш цара̄нг су̊д. Петрусат Андрийосен тар қу̊л мобайн фирӣптху, тӯрен пите̂wдху, ар х̇ацен чӯх̇т. Ат йакбораϑ х̇ац дарӯнанд лапаϑ мойи от сут. Wа̄δен wам тӯр ва̄х̇енард хах̇аϑ анҷӯвдху дараw тӣжден сат. Йа̄ тӯр х̇о аз мойи лап вад, ду̊н ҷа̄т wа̄δен байела̄ wам тӣжд. Wа̄δ δу нафарен wам сентоw нава̄рδод, ба̄ден Йа̄қӯбат Йуано мис йордам wевард чӯд.
Ба̄ден ар цавор ба йи зури wам тӯр сентху, wи мойийен ар варϑ ких̇тӣйен холи чӯд, ду̊н ҷа̄т йу лапизор вуд. Йу мойи ду̊ндард лапат wазмин вуд иде̂, йа̄ тӯр йила̄в ҷойенва зидах̇т.
Йид аҷойибард кор вуд! Wа̄δен то дийец дисга лап мойи ғал ачаϑ наанҷӯвд! Йича̄йаϑи боwар начӯд иде, дисга лап мойита анҷен, фукаϑен айру̊наϑ ред, ат Петруси Исо пиронди чизу̊н ху δодху лу̊ди: «Йо Худоwанд, аз му хезанд δар са, ду̊н ҷа̄т wузум гунокор одам, wуз бойад Ту хезанд ма̄вӣм!»
Амо Исойи Ху δуст рибӯд wи сӣвдтиху лу̊ди: «Петрус, х̇оҷ ма̄δе̂р. Тута аз ми тару̊д мойи наа̄нҷа̄ви, тута одамен бакаф кини!»
Исо х̇огирденен wев варϑ ких̇тӣйен тар зӣмба̄ тӣжд, ба̄ден wи мардумард лу̊д иде̂, ди мойи хурд тақсӣм кинен, ат хубаϑен Исо да̄мти тойд.
Шиму̊ни Wирд лу̊д: Молим! Ма̄ша̄м катарах̇а̄б ме̂нат чӯд, амо йичӣзаϑа̄м наанҷӯвд, ат wуз магам Ту га̄п ниғу̊ɣумху, тӯр пите̂м. Wа̄δен тӯр пите̂wдху, дисга ла̄п мойийен анҷӯвд иде̂, wев тӯр мис цуғ δод.
САWОЛЕН
1) Ҷинесор қу̊ланд цара̄нгин мӯҷиза̄ вуд?
2) Чӣзарди Петрус Исойард лу̊д иде̂, аз wи хезанд δар су̊д?
3) Исойи Петрусард чӣз wа̄да̄ δод?