ВОХУРИ ЧО ХЕЗАНД

Йи мулканден мусофирен гарминди пу̊ндва тойд. Wа̄δен ба̄д Суар х̇а̄рард наздӣк сатху чо хезанден гӣр сат. Ик wам чойи цу̊ндо сол тар пиро Йа̄қӯб чӣнт. Wа̄δ мусофиренен Исойат Wи х̇огирден вад.

Йу wахт қарӣби маδор вуд, ди ҷа̄ти ба̄д Исо ху х̇огирден тар х̇а̄р пис харч римод, ат Хубаϑ wам чо хезанд нӯст. Хӣр ғал биланд вуд, ди ҷа̄т ба̄д ди wахтанд чо хезанд йича̄йаϑ навуд, ат аз х̇а̄р йи ɣиник ху куза̄ қати пис х̇ац йат. Йа̄йи аз чойанд х̇ац зох̇тат, Исойи wамард лу̊д: «Ку х̇ац Мурд да̄к, бире̂зум»

Йа̄ ɣиник айру̊наϑ ред иде̂, йаӯди одами wам қати га̄п δод, ду̊н ҷа̄т wа̄δен Сомарийа̄ мардум қати га̄п наδод. Амо Исойи wам дил фа̄мтху, хойих̇и чӯд йордам wамард ких̇т. Йуйи wам қати дар борайи сар даркори чӣз га̄п δод, йа̄ни дар борайи иму̊нат дар борайи ик wи иде̂, ақу̊нита цара̄нг Хуδойард саҷда̄ кинен.

Исойи wамард лу̊д: «Хуδой, йид рӯ, ат ик wа̄δ одамен саҷда̄ Wирд ца кинен, бойад рӯйат рости қати саҷда̄ кинен». Худоwанди хойих̇ чӯд лу̊вд иде̂, фарқ нист ту ка̄данд саҷда̄ кини. Ма̄ш ва̄рδийа̄м фук ҷойанд Хуδойард дуо кина̄м, ду̊н ҷа̄т Йу фукаҷо озир. Йа̄ ɣиники Исо га̄пен хӣч ниғух̇т, Рӯи Поки wамард йордам чӯдху, йа̄йи Wи га̄пен ма̄нӣ фа̄мт. Йа̄йи мис ас пигойаϑ ақӣқат х̇икӯд, ди ҷа̄ти ба̄д лу̊д : ба̄д лу̊д: «Wуз фа̄мум Масе, йа̄ни Хуδой Интихобчӯҷин бойад йоδд.

Арwахт Йу ди йат, ба̄дта ма̄шард лу̊вд иде̂, ма̄ш бойад чӣз фа̄ма̄м, ла̄к Wирд хуш йада̄м». Исойи wамард ҷаwоб δод: «Wузум та̄м Йику, ту қати ғал га̄п ца δа̄м!»

Йеданди ба̄д йа̄ ɣиник ақӣқат фа̄мт. Wамард фақат боwар чӣдоw даркор вуд иде̂, Йу-Наҷотδа̄δӣҷ. Йа̄ сомари ɣиники хушбахтизор ху йис чӯдху, wитийаϑ тойд тар х̇а̄р, гуйо фукаϑард дар борайи ди нақл ких̇т. Хе̂р йа̄йи Наҷотδа̄δӣҷ ху цем қати wӣнтху, Йуйи wамард зиндаги х̇ац да̄кчӯд.

Йа̄ ɣиники Суар мардум тар wам чо хез қӣwд, ла̄к wа̄δ мис ик Wи Шахс иде̂, Йуйи Ху Масе ца лу̊д, wинен Wи. Фукаϑ мардум ситиробу̊на̄ тар Исо хез тӯйд, ду̊н ҷа̄т wа̄δен хойих̇ чӯд тезди Масе wинен. Ба̄ди wам ɣиник га̄пенен фана̄ сомарийен Худоwанд Исойард иму̊н вӯд, ду̊н ҷа̄т йа̄йи wевард лу̊д иде̂, Йуйи дар борайи wам зиндаги фукчӣзаϑ фа̄мт.

Wа̄δен йат тар Wи хезху, хойих̇ен чӯд Йу тар wев х̇а̄р су̊д. Исо розӣ сутху, δу рӯз wев х̇а̄ранд редху, мардум қатийи нақл чӯд. Ба̄ден фана̄га одамен Wирд иму̊н вӯд, ат wам ɣиникарден лу̊д: «Шич таш ида бе ту га̄пенаϑ иму̊н ва̄ра̄м, ду̊н ҷа̄т ма̄ша̄м хубаϑ wӣнтат х̇уда̄м иде̂, Йу ақу̊нийаϑ ҷау̊н Наҷотδа̄δӣҷ вуδҷ.

САWОЛЕН

1) Исойи ик wам чо хезанд Ху да̄м ца δод, йа̄ Исроӣланд чиду̊м ҷойанд вад?

2) Исойи wам сомари ɣиник қати дар борайи чӣз нақл чӯд?

3) Йа̄ ɣиник чӣзард ситиробу̊на̄ тар х̇а̄р сат? Йа̄йи мардумард чӣз нақл чӯд?