Х̇А̄ БИНДИ МЕМУ̊Н

Исойи Наҷот айу̊манд фана̄ мӯҷизайен дивих̇т, ба̄д фана̄ мардуми Wирд иму̊н вӯд. Бех̇дийен бечора̄ одамен Wи амчун Масейат Наҷотδа̄δӣҷ қабӯл чӯд, ат бойенен ка̄м Wирд боwари δодат, йо шакен Wирд лу̊д Амо Ерусалӣманд йи чорик вуд иде̂, йу ақу̊нийаϑ пи Худоwанд зор вудат, хойих̇и чӯд тоқа̄ϑ Wи қати га̄п δӣд. δид.

Амо йуйи меϑин ик ди кор за̄ра̄ начӯд, ду̊н ҷа̄т йу а̄м олим вудат, а̄м ну̊мдор одам вуд. Ба ғайри ди йу фарӣсийен раwийа̄йанд катанак одам вуд. Wи ну̊м Ниқу̊дӣмус вуд. Йу х̇а̄б андӯйдху тар Исо хез тӯйд, ду̊н ҷа̄т хойих̇и чӯд иде̂, мардум wи ма̄wӣнтху йичӣз га̄п дар борайи wи ма̄су̊д.

Ниқу̊дӣмус дед тар Исо чӣдху лу̊ди: «Молим! Ма̄ш фа̄ма̄м, Тут ику Молим иде̂, аз Хуδой хезат ца йаϑч, ду̊н ҷа̄т Хуδой йичи қати ца навид, йута аз дев Ту мӯҷизайен дивих̇тоw нава̄рδед.

Ниқу̊дӣмуси фикр чӯд иде̂, Исо бузург Молим вуд, амо йуйи нафа̄мт иде̂, Йу Хуδой Пуц. Исойи ба̄д wирд лу̊д иде̂, арйак одам бойад аwал аз тӣр олам таwалуд су̊дху, ба̄дта wа̄рδед тар Хуδой Подх̇ойи деδд.

Ниқу̊дӣмуси Wи га̄п ма̄нӣ нафа̄мт, ди ҷа̄ти ба̄д во Исойард саwол δод: «Одам цара̄нг ва̄рδед асараϑ аз на̄н су̊д? Йу ва̄рδедна̄ йакборга во ʒуликик су̊д?»

Исойи wирд ҷаwоб δод: «Одам бойад аз тӣр олам, аз Рӯ таwалуд су̊д». Амо Ниқу̊дӣмус ғалаϑ мис пи Wи га̄п ма̄нӣ нафирӣпт, ди ҷа̄ти ба̄д Худоwанд Ху га̄пен ма̄нӣ wирд фа̄му̊нт: «Фукаϑ одамененанд гуно йаст, амо wа̄δта хубаϑ ху гуно тоза̄ чӣдоw нава̄рδийен. Wевта фақат Рӯи Пок ду̊нд дигаргӯн чӣдоw ва̄рδед. Амо одамта ачаϑ нафа̄мт иде̂, йидта дисга цара̄нг су̊д».

Исойи дев Ху га̄пен фа̄му̊нтоw ҷа̄т Ниқу̊дӣмусард дисга мисол вӯд: «Х̇ӯʒард арҷонди форт андӣзд. Ту wи садо х̇ини, амо нафа̄ми йу аска̄ йоδдат, тарка̄ тӣзд. Ида ик wа̄δ одаменен аз Рӯ таwалуд ца сиц, wеванд мис дисга».

Амо Ниқу̊дӣмуси вога мис Wи га̄пен ма̄нӣ нафа̄мтху, хах̇аϑи лу̊д: «Йид цара̄нг дисга?»

Исойи wирд фа̄му̊нт иде̂, Хуδойта мардум гунойен ҷа̄т Ху Пуц ма̄рг мис розӣ су̊д, ат одам магам фақат Хуδой Пуцард боwари δӣдху, ва̄рδед аз ху гуно халос су̊д.

Охиру̊ни Исо wирд лу̊д: «Хуδойи Ху Пуц ди ҷа̄т набох̇т иде̂, ла̄к Йу ҷау̊н укм ких̇т, ат ди ҷа̄ти Wи бох̇т иде̂, ла̄к ҷау̊н Wи қати наҷот виред».

Ба̄д аз дийи Ниқу̊дӣмус Худоwандард иму̊н вӯдху, аз тӣр олам аз Рӯ таwалуд сут. Йуйи Хуδой Пуцард иму̊н ца вӯд, дига ди ҷа̄т х̇арманда̄ насутат аз мардуми мис ху ҷой начӯд. Ат арwахтен Исо дух̇манен бар зидди Wи ца андойд, Ниқу̊дӣмуси Wи тарафдори чӯд.