МӮҶИЗА̄ ТАР ҚОНО

Исойат wи х̇огирденен йат тар Ҷалӣлат, йаманд ба̄ди ара рӯз Қоно ну̊м қихода қишлоқанд сӯр вуд. Исо на̄н, Марйам мис тар wи сӯр вад.

Йид ғула̄ базм вуд: мему̊ненен хӯдат бирох̇тен, созен лу̊дат рақосийен чӯд, чақ-чақен хурд чӯдат шӣнтен. Ат айни базмандат Марйам йат тар Исо хезху, оста̄йикаϑи wирд лу̊д: «Мев шароб тайор сат».

Аҷаб безеб кор сут! Мардум таш фикр ких̇т иде̂, йид х̇у̊нчи лап мунсик вуδҷ. Марйами фикр чӯд иде̂, Исо таш йи илоҷ ких̇т, амо Йуйи фа̄мт иде̂, Wи На̄н аз Wи чӣз хойих̇ ких̇т, ба̄ди ҷаwоб wамард δод: «Ту аз Му чӣз хойих̇и? Мунд ғал Му wахт найаϑч».

Марйами фа̄мт иде̂, Худоwанди чӣз лу̊д, йа̄йи боwари δод иде̂, Йута фукчӣзаϑ ва̄рδед. Йа̄ ба̄д сат тар wев хизматгорен хезху оста̄йикаϑи лу̊д: «Му Пуц арчӣз тама ца римед, Wи га̄п иҷро кинет». Ба̄д аз йичанд дақӣқа̄ Исо ақу̊нийаϑ тар wев хизматгорен сут. Wев хезанден хоɣ ғула̄ ҷира̄йин ку̊за̄йен вад.

Исойи wев хизматгоренард лу̊д: «Дев кузайен аз х̇ац лап кинет!»

Wа̄δен х̇ац кире̂х̇тху wев кузайенен пур чӯд.

Исойи ба̄д лу̊д: «Шич ида зет азедандху wи сӯр хӯҷайӣнард йосет, ла̄к дам ма̄за̄ чост».

Wа̄δ хизматгоренен Wи га̄п ма̄нӣ нафа̄мтху айру̊наϑен ред. Хе̂р wа̄δен аз чо дарӯнанд х̇ац кире̂х̇тху, шич бойад сӯр хӯҷайӣн wам маза̄ чост. Йид цара̄нгин кор? Йо Йид носирайеҷ ҷиwу̊н ку масхара̄ wев чичӣд? Амо ба̄д Марйам га̄пенен wев байоδ δодху, арчӣзи йа̄ wевард ца лу̊д, wийен иҷро чӯд.

Ба̄д йу сӯр хӯҷайӣн йатху, аз кузайенанди ҷога̄ қати қӣмб δодху бирох̇ти. Йуйи ху ка̄л ҷумбентху, wитийаϑ тар х̇у̊нчи хез сутху, лу̊ди: «Тут баша̄нд ташкӣли чӯд, амо йи корат хато чӯд».

Х̇у̊нчийи ху диланд лу̊д: «Йид таш х̇о му та̄на̄ δӣд иде̂, шароб дӯс вад». Йу ба̄д х̇арманда̄ сутху wи ка̄л ха̄м сут.

Амо сӯр хӯҷайӣни соф исохга га̄пен δод: «Ақу̊нита сар пиро wам баша̄нд шароб да̄кен. Ба̄д мардум маст ди сут, wевард ачга фарқ нист иде̂, йам шароб баша̄нд йо ганда̄. Wити ба̄д арзу̊нди шароб мис тақсӣм чӣдоw бофт, ат тунд во баракс. Ик шичен ту хизматгорен мам ца вӯҷ, йам аз фукаϑ бӣди шароб!»

Йу х̇у̊нчийи хубаϑ мис нафа̄мт иде̂, йид чӣз га̄п вуд. Марйами ди wахтанд тар Исо чӯхтху шӣнти, ат Wи х̇огирденен фикр чӯд: «Ақу̊нийаϑи Хуδой Хубаϑ Исо бох̇т иде̂, ла̄к мардумард йордам ких̇т».

САWОЛЕН

1) Исо ху х̇огирден қати тар чиду̊м қишлоқ йат?

2) Тарам чӣз ма̄рака̄ вуд? Исойи аз ху наздикенанд чи тарам wӣнт?

3) Wи сӯранд чӣз га̄п сут? Исойи чӣр чӯд? Wи х̇огирденен дар борайи Wи чӣз лу̊д?