ИСО ЙАКУМ Х̇ОГИРДЕН
Китоби Муқадас, Йуано «Инҷил», 1 боб, 35-51 ойатен
Йи рӯзи Йа̄йо мардумард дар борайи Худоwанд нақл чӯдат, ди wахтанд Исо мис тар Урдӯн йат. Йа̄йойи ху δу х̇огирд, Йуанойат Андрийос қати нақл чӯд. Исо wев па̄лива наɣҷӣдат, Йа̄йойи wевард Wи дивих̇тху, лу̊ди: «Йида Хуδой Wа̄рг».
Йуйи Андрийосат Йуанойард ик ди ца лу̊д, wи га̄п ма̄нӣ дисга вуд иде̂, ла̄к wа̄δ wи хезанд ма̄ниϑенат, Масе да̄мти сенху, Йута wевард сар баша̄нд Молим су̊д. Андирйосат Йуанойен ба̄д Худоwанд да̄мти тойд. Исо пӣц га̄х̇тху, wӣнти wевху, лу̊ди: «Тамард чӣз даркор?»
Wа̄δен Wирд лу̊д: «Молим Ту ка̄данд зиндаги кини?»
Исойи ҷаwоб δод: «Тийет Му қатиху фа̄метта!»
Андрийосат Йуанойен Исо да̄мти сатху, тар Wи чӣден дед. Wа̄δен то вегайец Wи қати ред. Wевард Исо қати нақл чӣдоw лап хуш вуд. Худоwанд Исо га̄пенен ам соδа̄ вадат, амен аз дилу ҷу̊н вадат, ам wеваенд ғула̄ ма̄нӣ вуд. Андрийосат Йуанойен то ик дийец дисга нақл ғал ачаϑ нах̇уд.
Андрийосанд Шиму̊н ну̊м вирод вуд. Йуйи ху та̄т қати тар Байт-Сайдо ну̊м х̇а̄р зиндаги чӯд. Байт-Сайдо ба̄ри Ҷалӣлард наздӣк вуд.
Wа̄δен фукаϑ мойианҷа̄вӣҷ вад. Андрийос тӯйд ху вирод х̇икӣдоw, гуйо виред wиху дар борайи Исо wирд нақл ких̇т.
Йуйи Шиму̊н wӣнтху лу̊ди wирд: «Ма̄ша̄м Масе вирӯд!»
Ба̄ди Андрийос аз ху вирод хойих̇ чӯд иде̂, ла̄к йу мис Исо қати балад су̊д. Шиму̊н мис wитийаϑ розӣ сут. Исойи наw Шиму̊н wӣнтху, лу̊ди wирд: «Тут Шиму̊н, Йунӯс пуц, амо аз ми тару̊д ту ну̊м Кифо. Ди ма̄нӣ «жӣр» (Петрус).
Шиму̊н айру̊н сут иде̂, цара̄нги Худоwанд наw йакум бор wи wӣнтат, wи ну̊ми wитийаϑ фа̄мт.
Исойи Шиму̊нард наw ну̊м δодху, фа̄мти иде̂, икам ростоw мойианҷа̄вӣҷта ба̄ди йичанд wахт бузург рӯу̊ни одам су̊д.
Wи йига рӯз Йа̄йо во ху δу х̇огмрд қати wирӯвҷин вудат, wӣнти иде̂, Исо wев пирова наɣҷӣд. Йа̄йойи ба̄д лу̊д:«Йида Хуδой Wа̄рг». Wа̄δ δу х̇огирден wи га̄пен х̇удху, Исо да̄мтийен тойд... Йӣw аз wев δу нафаранд, Йа̄йо га̄пени ца х̇удху, Исо да̄мти ца тӯйд, Андрийос, Шиму̊ни Петрус вирод вуд. Йуйи аwал ху вирод Шиму̊н вирӯдху, лу̊ди wирд : ма̄ша̄м Масе вирӯд.
САWОЛЕН
1) Исойанден wи сар пиро х̇огирден ча̄й вад?
2) Исойи чирд Петрус ну̊м δод? Ди ма̄нӣ чӣз?