ИСОТА БИЙА̄ БУ̊НАНД ОЗИМӮД СУ̊Д

Хуδойат Wи Пуцанд Wев ақу̊ни дух̇ман фук wахт шайту̊н вуд. Исои Масейи wи қати хах̇ мубориза̄ йод. Йид мубориза̄ аз wи wахтанд сар сут иде̂, Исойи ар Урдӯн та̄мӣд қабӯл чӯдху, Wи осму̊ни Та̄ти Wи римод иде̂, замӣнти Ху хизмат сар ких̇т. Рӯи Поки аз Исо тар бийа̄бу̊н йод, ла̄к шайту̊н тарам озимӯд wи ких̇т.

Исойи бийа̄бу̊нанд чил х̇абу̊нарӯз рӯза̄ анҷӯвд. Йуйи ик ди wахтанд на йичӣз хӯдат найи бирох̇т. Шайту̊нта фук wахт одамен озимӯд ких̇тат, тар гунокорита wев ба̄р δӣд. Йу бийа̄бу̊нанд йат тар Исо хезху фикрйи чӯд: «Йид бағер аз маɣʒу̊нҷи соф беқуwат суδҷат, wуз шич ва̄рδӣм аз ро ди δа̄м. Ба̄дта пи ху мақсад фира̄пум.

Йид Наҷотδа̄δӣҷта гуно ца ких̇т, Йидта дига одамененд wев гунойен хути зе̂х̇тоw нава̄рδед. Ба̄дта одамен гуно дарӯн абади рисен». Ба̄д аз дисга фикрийени шайту̊н лу̊д: «Ага Ту Хуδой Пуц ца вийи, дев жӣренард лу гарδа̄ сен!»

Амо Исойи wирд дисга ҷаwоб δод: «Одамӣнзодта гарδа̄ қатийаϑ ду̊нд зиндаги наких̇тат, wирд ар йак Калӣмайи Хуδой мис залӯл».

Йеданди ба̄д шайту̊н Исойард йичӣзаϑ лу̊вдоw мис нава̄рδод, ат хойих̇и чӯд йакборга во озимӯд Wи ких̇т. Йуйи аз Исо пи йи биландизор кӯ сифентху, фукаϑ мамлакатенат wев қудратат wев бойгарийи Wирд дивих̇тху катаҷу̊наϑи лу̊д: «Ага Ту мурд саҷда̄ ца кини, wуз ик ди фукаϑ Турд да̄кум».

Исойи во wирд ҷаwоб δод: «Е шайту̊н, δар са аз Му хезанд, хе̂р нивишчин иде̂: «Ху Худоwанд Хуδойард ду̊нд саҷда̄йат хизмат ки».

Ба̄ди дийи шайту̊н аз Исо вӯд тар Ерусалӣмху, пи ибодатху̊на̄ дишӣди Wи сифентху, лу̊ди Wирд: «Ага Ту Хуδой Пуц ца вийи, ар тагов зибан, ду̊н ҷа̄т нивишчин иде̂: «Ху Фарих̇тагу̊нта римедху, wа̄δта Ту анҷен, ла̄к Ту поδ пи жӣранд ма̄ангахцт».

Худоwанд Исойи шайту̊нард налу̊д иде̂, йуйи Китоби Муқадас ғалат ма̄нӣ δод. Исойи хубаϑ Китоби Муқадас га̄пен қати wирд ҷаwоб δод: «Ху Худоwанд Хуδой озимӯд ма̄к». Шайту̊нанд wи кор насутху, аз Исо хезанд тӯйд.

Исо Рӯи Пок қати пур сутху, аз Урдӯнга гах̇т чӯдху,ба̄ди Рӯ тар бийа̄бу̊н Wи йод Луқо «Хушхабар» 4:1

САWОЛЕН

1) Шайту̊ни чӣзард хойих̇ чӯд Худоwанд Исо кор нест ких̇т?

2) Исойи Ча̄й тар бийа̄бу̊н йод?

3) Шайту̊ни цу̊нд пӣδ Исо озимӯд чӯд? Wа̄δен цара̄нгин озимойих̇ен вад?

4) Исойи wирд чӣз ҷаwоб δод?