ИСОТА ТА̄ МӢД ҚАБӮЛ КИХ̇Т

Фарих̇та̄ Ҷабраӣли дар борайи Йа̄йо, Закарйойат Елисоба̄ Закарйойат Елисоба̄ пуц таwалуд ситтоw мис пиройаϑ лу̊д. Хуδойи Йа̄йойард махсӯс хизмат тайӣн чӯд. Йу то ди wахтарард ғула̄ сутху, Йаӯдийа̄ бийа̄бу̊нанди зиндаги чӯд.

Йа̄йойи бойад дам бийа̄бу̊нанд холи дар борайи хизмати Худоwанд фикр чӯҷатху, тар йичӣзга wи wух̇ ма̄суδҷат. Йуйи хойих̇ чӯд йаманд соф осойах̇ видху, фақат Хуδой га̄пен ниғу̊ɣд.

Йи рӯзи Хуδой wирд лу̊д: «Са тар Урдӯнху wа̄з х̇ой!» Худоwанди ди мис wирд лу̊д иде̂, йу бойад дар борайи чӣз wа̄з х̇ойд. Йуйи Хуδой га̄п ниғух̇тху, тӯйд тар Урдӯн. Йу тарам фирӣптху арцу̊нд мардум Урдӯн гаргинӯха̄ ца вуд, wеварди лу̊д: «У̊ мардум тӯба̄ кинет! Ху зиндаги йисохга кинет!

Ар замӣнта Хуδой Подх̇ойи йоδд! Йу соф қарӣб суδҷ, тайор wирд вийет! Арра̄нгет шич ца, дисга видоw мӯмкин нист!

Wи га̄пенен сар пиро мардумард аҷойиби чӯд. Йила̄в мардуми wи шӣнт, йила̄ванд аз wи га̄пен wев қа̄р сифӣд. Амо дисга одаменен мис вад иде̂, wа̄δен йис чӯд иде̂, икам одам Хуδой Калӣма̄ нақл ких̇т.

Йа̄йойи мардумард лу̊д: «Та̄мӣд зет! Wузта Урдӯн х̇ац қати тама та̄мӣд δа̄м. Тамата ар х̇ац ху ца δет, йид наинки ху ғажди тозачӣд ду̊нд, тамати ди қати них̇у̊н δет иде̂, wи кӣна̄ зиндагита ла̄кетат наwта сарет.

Фана̄ одаменен та̄мӣд зох̇т. Wа̄δен ху ох̇ногу̊нат ху баладенард лу̊д иде̂, аз нур рӯзандта наw зиндаги сарен. Wев га̄пенен дига одаменард мис аҷойиби чӯдху, wа̄δен хубаϑ мис хойих̇ чӯд иде̂, Йа̄йо қати балад сен.

Йила̄в одаменен аз Йа̄йо пех̇цт: «Йакбор ниғу̊ɣ! Ту чиду̊м уқӯқ қати одамен та̄мӣд δа̄δиху, wевард лу̊ви иде̂, ху зиндаги йисохга кинен? Тут бағер Хуδой пуц, дар борайи wийен пайғумбарен нақл ца чӯд?

Йа̄йойи wевард ҷаwоб δод: «Най, тама дар борайи ик Wи ца лу̊вет, wузум Йу нист. Амо дар борайи муйи мис Ишайо пайғумбар пигоϑ даwра̄ лу̊д: «Бийа̄бу̊нардта қӣwдат лу̊вдта, иде̂ Худоwандард пу̊нд тайор кинет». Wузта х̇ац қати тама та̄мӣд δа̄м. Амо ику Шахс иде̂, тамет пи Wи ца нӣсц, Йута Рӯи Пок қати та̄мӣд δӣд. Йу ду̊ндард бузург иде̂, wузум Wи бӯтба̄ндак йетчӣдард мис лойиқ нист» .

Йа̄йойи га̄п δодат, чӯх̇ти Исо тар wи хеза̄ҷ йат. Фукаϑен тар па̄ли ху чӯдху, ҷойен Wирд δод. Йа̄йойи ба̄д хах̇аϑ лу̊д: «Фукаϑ чисет! Йида Хуδой Wа̄рг иде̂, ҷау̊н гунойента Хути ца зе̂зд! Шичен ида пайғумбар га̄пен иҷро сат. Йам ику Шахс иде̂, дар борайи Мийум тамард ца лу̊д!» – ба̄ди пайғумбар тар Исо дивих̇т.

Исо Йа̄йойард қарӣбди йатху лу̊ди: «Wузум йат, ла̄к ту му та̄мӣд δа̄δи». Йа̄йо айру̊н сутху лу̊ди: «Гуйо wуз Ту та̄мӣд δа̄мо? Ақу̊ни бойад Ту му та̄мӣд δа̄δи!»

Исойи ба̄д wирд лу̊д: «Йа̄йо, йид бойад дисга вид. Йид хости Хуδой».

Wа̄δен ба̄д варϑ ар Урдӯн дед. Йа̄йойи ху δуст Исо ка̄лти рибӯдху ар х̇аци Wи ғу̊т δод, арра̄нги wев дига одамен та̄мӣд ца δод. Йеданд ба̄д аҷойиб кор сут. Исо наw аз х̇ацанд нах̇тӯйдат, Рӯи Пок аз осму̊н чибу̊д дастӯр йатху Wи сӣвдти нӯст. Ба̄д аз осму̊н садо йат: «Йид Му Нозийу̊н Пуц, Му хайрат баракат Ди қати!»

Йа̄йойард ику wазӣфа̄ сипорчин ца вуд, wийи иҷро чӯд. Йуйи мардумард лу̊д иде̂, Наҷотδа̄δӣҷта йоδд. Йида Йу мис йат – Исо аз Носира̄, Хуδой Пуц! Амо ди ма̄нӣ дисга навуд иде̂, фукаϑ йаӯдийенен йакбораϑ Худоwандард боwари δод. Най, фақат йила̄в мардуми ду̊нд Wи амчун ху Худоwанд фа̄мт.