ИСО ОЙИЛА̄ ДАРӮНАНД

Исо тар Носира̄ Йӯсуф ну̊м устоδ чӣданд ғула̄ сут. Исо 12 сола̄ сутху, Марйамат Йӯсуфен ху қати Wи зох̇тху тар Ерусалӣмен тар Наҷот айу̊м Wи йод. Йаӯдийенен ар сол Наҷот айу̊м қайд чӯдат тар wам йаттоwен хушизор вад. Йила̄в аз wевен дам айу̊м ҷа̄т цу̊ндо рӯз тойдху тар айу̊м ҷа̄т цу̊ндо рӯз тойдху тар Ерусалӣмен сат.

Тарамен аз дигарга мамлакатен йила̄вга йаӯдийенга йатху, ибодатху̊на̄йанден йакҷойаϑ дам айу̊м қайд чӯд. Йаманден wа̄δ Хуδой ситоwах̇ чӯд иде̂, Йуйи Ху халқ жӣwҷ ца чӯдат, тез-тези wирд йордам чӯд. Фукаϑен хушизор вад, амо сар лап хушийен ик wа̄δ кӯдакен чӯд иде̂, wам пиро солен дуwоздасола̄ ца сат.

Ду̊н ҷа̄т wеванд шич уқӯқ сут иде̂, дам айу̊манд йакум бор иштирок кинен.

Йӯсуфат Марйамен мис Исога зох̇тху ху амсойагу̊н қатийен тар Ерусалӣм тойд. Исойи ик ди сафаранд фана̄ арчӣзаϑ wӣнтат, фана̄ га̄пенгайи х̇уд. Йуйи то тар Ерусалӣм фирӣптоwард, пу̊ндардаϑ цу̊ндо аҷойиб корен wӣнт, амо Ерусалӣми ца wӣнт соф айру̊н сут. Wи цем пиронди хушрӯй ибодатху̊на̄ вадат, wи гаргинӯх̇а̄ азор рақам мардумат садо вуд. Исойард аҷойиб вуд иде̂, ку ибодатху̊на̄йандта хизмат цара̄нг наɣҷӣст. Wи додат на̄нен Wирд фа̄му̊нт иде̂, ибодатху̊на̄йандта чӣр киненат, цара̄нгин қойдайен йаманд.

Йа̄ айу̊м wӯвд рӯз даwу̊м чӯд. Ба̄д йу мардум во тар ху чӣден дараw тӣд сут. Марйамат Йӯсуфен ху Пуц х̇икӯд, амо йиҷойаϑен Wи навирӯд. Wа̄δен фикр чӯд иде̂, Йу х̇о wев амсойайен қати тӯйд, ду̊н ҷа̄т Йу дойимаϑ wев қати вуд. Ба̄д wев дил пур сутху тар пу̊нден δод. Wа̄δен вегакийард wи Носира̄ мардум дарйов чӯд, амо чӯх̇тен Исо wев қати нистху, ба̄ден са̄манд δод. Йӯсуфат Марйамен нафа̄мт чӣр кинен.

Ба̄ден маҷбӯр сат во тар Ерусалӣм гах̇т кинен! Wа̄δен фукаҷо х̇икӯдат, ар ча̄й wевард дичор ца сут, фукаϑен пех̇цт. Фана̄ одаменен Wи синнард бачгала̄ wӣнт, амо мардуми нафа̄мт иде̂, wев Пуц чиду̊м. Wа̄δен ди мис лу̊вдоw нава̄рδод иде̂, Wи додат на̄н бойад ка̄дард Исо х̇икарен. Йӯсуфат Марйамен айру̊наϑ ред.

Wеванд соф лапди wев зорδти ғалч сутат, wев зақах̇ мис лапди сут. Охиру̊нен лу̊д ку йакборга тар ибодатху̊на̄, ик тар wи ҷой чисен иде̂, тарамен рӯу̊ни робарен дар борайи Китоби Муқадас нақл ца чӯд. Wевард боwари мис навуд иде̂, Исо тарам вирийен. Хе̂р Йу ʒулик ғаδа̄ вуд, Йу ғула̄ одамен дарӯн чӣр ких̇т? Йута wев нақл ма̄нӣ мис нафа̄мтху, wев хезандта нӣстоw мис Wирд нафорт.

Амо ақу̊ни фукаϑ соф йисохга вуд: wа̄δен ху Пуц тар ибодатху̊на̄ вирӯд. Марйамат Йӯсуфард боwари навуд иде̂, Исо wев пиройанд. Исойи wев рӯу̊ни робаренард қӣн саwолен δодат, wа̄δен байела̄ wевард ҷаwоб вирӯд, ат wа̄δен Wи йичӣз ца пехцт, Йуйи wевард ростат пура̄ ҷаwоб δод. Wа̄δ робаренен ба̄д аз Wи Ғаδабуц ҷаwобδе̂д Wи ду̊ниш қати айру̊наϑ редху ху ка̄лен ҷумбент.

Марйамат Йӯсуфен хуш сатху ху Пуцен ху батанд δод. Марйами ба̄д Wи пех̇цт: «Тут тарка̄ вуд? Ма̄ша̄м лап Ту х̇икӯд!

Исойи wевард ҷаwоб δод: «Wузум фук wахт тару̊д вуд. Тамет нафа̄мтна̄ Wузум тару̊д, тар Ху осму̊ни Та̄т чӣд?

Амо Марйамат Йӯсуфен wи га̄пен ма̄нӣ нафа̄мт.

Wа̄δен ху Пуц зох̇тху тар Носӣра̄йен тойд.

Исо сол ба сол ғулади сутат, wи ду̊ниш мис лапди сут. Йуйи ху додат на̄н жӣwҷ чӯдху, фук wахти wев ниғух̇т, ба̄д ажда̄ солга wев тарбийатан ред. Wи на̄н Марйаманд ик wа̄δ га̄пен иде̂, Исойен тар ибодатху̊на̄ вирӯдху, Йуйи wев ца лу̊д, фук wахтен wам байоδ вад. Йа̄йи дар борайи ик wев га̄пен дойимаϑ фикр чӯд.

САWОЛЕН

1) Йаӯдийенен бойад тар Ерусалӣм тар чиду̊м айу̊м сицат?

2) Бачгала̄йен аз цу̊нд солагинди Наҷот айу̊манд тар ибодатху̊на̄ йод?

3) Йӯсуфат Марйамен Исо ца бине̂ст, Йу ка̄данд вуд? Йуйи чӣр чӯд?

4) Исо йакум бор тар ибодатху̊на̄ йатху, ба̄ди wи цу̊нд солга тар Носира̄ Ху додат на̄н тарбийатанд ред?