ФАРИХ̇ТА̄ ҶАБРАӢЛТА МАРЙАМАРД ОЗИР СУ̊Д

Тар Ҷалӣл, Носира̄ ну̊м ʒулик х̇а̄ранди йи ға̄ц зиндаги чӯд. Wам ну̊м Марйам вуд. Йа̄ Йӯсуф ну̊м устоδ қати нико чӯҷин вад. Марйамат Йӯсуфен бечора̄ мис ца вад, амо wа̄δен аз Доwӯд аwлод вад. Wа̄δен хойих̇ чӯд ба наздӣки сӯр кинен.

Йи рӯзи Марйам ху чӣдард кор чӯдат, йакбораϑ Фарих̇та̄ Ҷабраӣл wам пиронди пеδо сут. Wийи Хуδой ар замӣн бох̇т. Йуйи Марйамард лу̊д: «Саломолек, а бабаракат одам! Худоwанд ту қати».

Марйами х̇оҷ δӯйдху ху диланди лу̊д: «Дисгайи ғал йича̄йаϑ салу̊м мурд начӯҷ».

Фарих̇та̄ Ҷабраӣли лу̊д: «Марйам, х̇оҷ ма̄δе̂р, турди Хуδой баракат δод. Тундта Пуц су̊дху Wи ну̊мта Исо δа̄δи, ди ма̄нӣ Наҷотδа̄δӣҷ. Йута бузург су̊дху Wита Хуδой Таоло Пуц лу̊вен. Худоwандта Wирд Доwӯд тахт да̄ких̇тху, Wиндта ба̄д Wи Подх̇ойи абади рист». Марйами wи Фарих̇та̄ га̄пен баша̄нд нафа̄мтху, лу̊ди: «Хе̂р wузум ғал чор начӯҷат...

Фарих̇та̄йи дисга wамард лу̊д: «Ар йак кӯдаканд та̄т йаст, амо йу ту Пуцта аҷойибард кӯдак су̊д. Wинд wи Та̄т Хуδой. Wузум ди ҷа̄т лу̊д иде̂, Йута Хуδой Пуц су̊д».

Марйами Фарих̇та̄ га̄пен боwар чӯд. Хуδойи цу̊ндо сол тар пиро ик wи чӣз wа̄да̄ ца δод, йу бойад ба наздӣки иҷро су̊д! Марйамта ба̄д wа̄даδоδҷин Наҷотδа̄δӣҷанд Wи на̄н су̊д!

Амо йа̄йи ғалаϑ мис нафа̄мт иде̂, йидта фукаϑ цара̄нг иҷро су̊д. Йа̄йи ба̄д аз Фарих̇та̄ пех̇цт: «Йидта ба̄д цара̄нг иҷро су̊д?»

Фарих̇та̄йи wамард ҷаwоб δод: «Идта Рӯи Пок қудрат қати су̊д. Хуδой Таоло қудратта Wи Кӯдакард ҷу̊н да̄ких̇т. Ди ҷа̄тта ба̄д ик Wи Кӯдак ту ца ва̄ри, Йута муқадас су̊дху Wи ну̊мта Хуδой Пуц су̊д!»

Марйами хойих̇ чӯд Хуδой га̄пен иҷро ких̇т. Йа̄йи ба̄д Фарих̇та̄йард лу̊д: «Wузум Худоwанд банда̄. Арчӣз Ту ца лу̊ви, ла̄к ик wити су̊д» Фарих̇та̄ ба̄д аз wам хезанд нах̇тӯйдху пи омсу̊н гах̇т чӯд.

САWОЛЕН:

1) Фарих̇та̄ Ҷабраӣл чирд озир сут? Марйами ка̄данд зиндаги чӯд?

Йа̄ чи қати нико чӯҷин вад? Wа̄δен аз чи аwлод вад?

2) Фарих̇та̄йи Марйамард чӣз лу̊д?

3) Марйами Фарих̇та̄ га̄пен цара̄нг қабӯл чӯд?