КӮДАК АР WИНӢР

Рӯманд йакум импира̄т импе̂ратур қайсар Авғустӯс вуд. Хуδойи wи дилард дисга хойих̇ пеδо чӯд иде̂, йуйи римод фукаҷо мардум рӯи хат кинен. Йуйи дисга фарму̊н зиwост иде̂,

аз рӯи wам бойад Фалистӣн мардум, рӯи хат чӣдоw ҷа̄ т тар ху бобен замӣн суδҷат.

Йӯсуфат Марйамен wи даwра̄ тар Носира̄ зиндаги чӯд.

Йӯсуфи Марйамард лу̊д: «Ту фа̄ мийо мунден му аwлоден аз Байт-Ла̄ м вад. Подх̇о Доwӯд мурд δараки қаwм. Йу пигоθ даwра̄ wи мамлакат подх̇о вуδҷ. Wуз бойад тарам са̄ м».

Марйами ойи сар тӣждху лу̊ди: «Шичард кӯдак ар му қӣч ца навуδҷат, мурд йам сафар қӣни начӯҷат, амо ту хубаθ фа̄ ми иде̂, wуз бойад ба наздӣки Зирйот ва̄ м. Йид пу̊нд мис wазмин. Ба̄ д йига бегу̊на̄ ҷойанд Ми ца ва̄ м, лап ганда̄ ».

Йӯсуфи wам дилпури δод: «Марйам, wузум фук wахт ту хезанд. Ба̄ д Фарих̇та̄ йи мис налу̊дна̄ йид Кӯдакта тунд ца су̊д, йид Хуδой пуц. Хуδойта ма̄ ш чост».

Марйамат Йӯсуфен ба̄ д тар пу̊нд δод. Wеванд марка̄ б мис вадат, амо wа̄ δен оста-оста̄ тойд, ди ҷа̄ т ба̄ д wев сафар йичанд рӯз даwу̊м чӯд. Wа̄ δен то тар Байт-Ла̄ м фирӣптоwард мотизор сатху, х̇е̂вдоwарден ҷой хурд х̇икӯд. Йӯсуфи аз мему̊нху̊на̄ сойиб пех̇цт: «Ту бахих̇ кийат, ди ту чӣданд йи ма̄ ла̄ холи йасто?»

Йуйи wевард лу̊д: «На̄ й, тар фукаθ ма̄ лайен одам».

Йӯсуфи во wи пех̇цт: «Фукаҷо пуро? Ма̄ш ку х̇а̄б тарка̄ са̄ wа̄ м? Тунд йи ʒуликикаθ ма̄ ла̄ йак мис нисто? Му ɣин бойад ик мев рӯзен зирйот вӣрт, йаст йид нур х̇а̄ б wи вӣрт!»

Йу чорики ҷаwоб δод: «Най, нист. Ца вуδҷат тот ту ɣинум йи ҷо барҷой чӯҷат, амо афсӯс, ҷой нист».

Марйами х̇оҷ δӯйдху, Йӯсуф δустарди анҷӯвдху, лу̊ди: «Ма̄ шта ваҷанд нӣстоw нава̄ рδийа̄ м! Ваҷанд лап шито, мунд йам кӯдак му зорδти лап ғалч!»

Йу мему̊нху̊на̄ сойиб қарӣбди йатху лу̊ди: «Тамата ваҷанд нарисет. Тар му аwли дарӯн йи ғиҷӣд. Тарам wох̇ тӣрти бараwотаθ ниθетат, а̄ мга айwу̊нен байнардта нах̇ицийет». Йӯсуфат Марйамен аз wи минатдор сатху, аз дилат ҷу̊нен қулуғ wирд лу̊д.

Дам х̇а̄ б ба̄ д аҷойибард wоқийа̄ сут: Ику Хуδой пуц иде̂, ҷау̊ни офарӣд ца чӯдат, фукаθ офарӣних̇ Wи миδуст ца, йи ʒуликик кӯдак ҷиноw сутху, тар ғиҷӣд дарӯн wох̇ти аɣе̂зҷин вуд. Тар Wи ца чисен, йича̄ йаθта нафа̄ мт иде̂, Йам Хуδой Пуц. Марйами ба̄ д ар wинӣр Wи рибӯдху, Йуи мис дига кӯдакен ҷиноw δустат поδ wеδдат, ху садойи зиwост.

Йӯсуфи тар Марйам чӯх̇тху лу̊ди: «Ту байоδ йасто, Фарих̇та̄ йи дар борайи ми Кӯдак турд чӣз лу̊д? Wев га̄ пенард боwар чӣдоw лап қӣн, ду̊н ҷа̄ т Йам дис ʒуликикат, йам шаройит мис йу̊данд

лап бечора̄ ».

Марйами ба̄ д оста̄ йикаθ лу̊д: «Амо йид фукаθ рост,

арчӣзи Хуδой ца лу̊д, йута фукаθ иҷро су̊д».