ТАР WАТАН ГАХ̇ТЧӢД
Китоби Муқадас, Ирмийо китоб, 31 боб, 31-34 ойатен
Донийолен ʒуликиндийаϑ тар Бобил йод, амо йу пӣр мис ца сут ху wатанат Хуδой wа̄да̄йи наринӯх̇т, ца лу̊ди иде̂, ху халқта во тар wи ҷой ва̄м.
Шичарден ибодатху̊на̄ во соз чӯҷатху, фукаϑен ҷа̄м сицатху, Хуδойарден во дуо ца чӯҷат, лап баша̄нд вуδҷат! Донийол тоқа̄ϑ дед тар ху чӣдху, рӯза̄йи анҷӯвдху, Хуδойарди дуо чӯд: «Йо Худоwанд, Тут бузургат муқадас Хуδой. Арча̄йи Ту ца жӣwҷ Ту wевард лап ме̂рабу̊ни кини. Ма̄ша̄м фана̄ хато корен чӯд. Тут ди ҷа̄т ба̄д ла̄кчӯд Ерусалӣм wеру̊н су̊дат ма̄ш бегу̊на̄
мулканд зиндаги кина̄м. Амо wуз Ту ме̂рабу̊ни фа̄мумху, ди ҷа̄т аз Ту хойих̇ кинум иде̂, му халқард wи гуно бахих̇ киху, иҷозат wирд δа, ла̄к йу тар ху wатан су̊д!»
Хуδойи ба̄д ик дам дуо қабӯл чӯд. Донийоли хубаϑ тар Исроӣл гах̇тчӣд нава̄рδод, ду̊н ҷа̄т йу мӯдат, Исроӣл мардумарден зибора иҷозат δод иде̂, тар ху wатан гах̇т кинен. Бобил подх̇ойи на фақат гах̇тчӣд wевард иҷозат δод, йуйи wев тилойийат нуқрайин муқадас ҷогайен иде̂, аз Ерусалӣм ибодатху̊на̄йанден ца зох̇т, фукаϑи wевард да̄кчӯд. Исроӣл мардум хушизор сут. Wа̄δен бади цу̊ндо солен во озод сат!
Амо фукаϑен тар ху wатан гах̇тчӣд нава̄рδод, ду̊н ҷа̄т wа̄δен тар ди мамлакат хурд чӣденат боғен мӣзд, wеванден тарам амсойаенат ох̇нойен вад. Ат тар Исроӣлен фақат нихух̇чин ма̄лайен вад. Wевард аз наw мӣздоwард фана̄ ме̂нат даркор вуд.
Амо фана̄ одаменен вад иде̂, аз қӣнийен х̇оҷ наδӯйд. Wа̄δен хойих̇ чӯд тар Ерусалӣм ниϑенху, Худоwанд ибодатху̊на̄ во соз кинен.
Исроӣлийен гах̇тчӣдард фана̄ wахт даркор вуд. Wа̄δен йат тар ху wатанху чӯх̇тен иде̂, йила̄ванден wев чӣденен нихих̇цин вад, ат wев таза̄ чӣдентийен йига одамен нӣсцин вад. Wев зимценат ангӯрδзоренард wох̇ат шӯδ ру̊й δоδҷ, ат wев йила̄в замӣненен бегу̊на̄ одамен хурд зох̇тху, че̂ртен wевху, йичӣзен йаманд не̂δд. Исроӣлийенард аз пиро wазминат қӣн кор вуд!
Амо wевард че̂риʒат, киштат, осил зих̇тоwат, наw чӣденат, харчат хурок ду̊нд хах̇ аҷойиб навуд. Wевард сар асос ику кор вуд иде̂, асӣрийанден wи ца нава̄рδод: ибодатху̊на̄йанд Худоwанд ситоwах̇ чӣдоw! Амо шич йа̄ ибодатху̊на̄ мис навад. Йу ра̄нг хушрӯй Ерусалӣм фукаϑ нихух̇чин вуд.
Рӯу̊ни робари wевард лу̊д: «Мӯмкин ибодатху̊на̄ созчӣдарта фана̄ wахт даркор су̊д, амо ма̄ш ва̄рδийа̄м қурбу̊ниҷой шичаϑ моза̄м. Йу бойад укмандаϑ wи пироки ҷойти вид».
Йу мардум ба̄д wи қурбу̊ниҷой тоза̄ дараw чӣд сут. Wа̄δен Хуδойард қурбу̊ни чӯдху, шукратен Wирд лу̊д иде̂, тар wев wатани во wев ца вӯд. Ба̄д аз йичанд сол наw ибодатху̊на̄ тайор сатху муқадасен wам чӯд. Ерусалӣм во хушрӯй х̇а̄р сутат, wи гаргинӯх̇а̄йен ғула̄ бурҷен вад.
Исройӣлийенен аз Бобил асӣри халос сатху, Хуδойи во wевард пайғумбарен бох̇т, ла̄к Wи қонунен фук wахт wев байоδ wеδен. Йуйи во цу̊ндо пӣδ wев ҷазо δодат, цу̊ндо пӣδи wевард бахих̇ чӯд. Амо пигоϑ даwрайени Хуδой пайғумбар қати пе̂ғу̊м бох̇т иде̂, йи wахтта фукчӣзаϑ йисохга су̊д, аз пирокита лапаϑ фарқ су̊д:
«Худоwандта лу̊вд: «Wахта йоδдху Wузта Исроӣл мардумат Йаӯдо мардум қати наw а̄д кинум. Йа̄та ик wам а̄д ҷиноw насу̊д иде̂, йи wахтум wев аwлоден қати wам чӯдху, ба̄дум wев δустенард анҷӯвдху аз Мисрийандум wев ца зиwост; wа̄δен ик wам а̄д Мунд wеру̊н чӯд…» Худоwандта во лу̊вд: «Wузта ба̄ди wи Исроӣл мардум қати дисга а̄д кинум: Wузта Ху қонӯн wев диланд барҷой кинумху йамтита нивишум wам, ба̄дта Wуз wев Хуδой са̄мат, wа̄δта Му халқ сен...» ду̊н ҷа̄т Wузта wев гунойен бахих̇ кинумху, ачгата ху байоδ wев нава̄м». Китоби Муқадас, Ирмийо китоб, 31 боб, 31-34 ойатен
Хуδой пас ца wахт ик ди wа̄да̄ иҷро чичӣд вуд?