БАЛТШАСАР ТАШКӢЛИ

Ба̄д аз Набукаднесар мӣдоw Балтшасар Бобил подх̇о сут.

Wинд wи дарборанд дойимаϑ базмат созинги вуд. Wирден да̄δен ду̊ндард хуш вад иде̂, дух̇маненен мис Бобил гирд ца чӯд, тар дарбор ғула̄ ташкӣли вуд.

Арцу̊нд бойенен wи мамлакатанд ца вад, тар wи ташкӣлийен йат. Йаманд шароб х̇ац ҷиноw раwу̊н вад.

Балтшасар маст сутху пис тилойийат нуқрайин ҷогайени римод иде̂, йи wахти wи та̄т Набукаднесар аз Ерусалӣм ибодатху̊на̄йанд wев ца зох̇т. Подх̇ойат wи мему̊ненен аз wев муқадас ҷогайенанд шароб бирох̇тху, ху бутен қудрат ситоwах̇ен дараw чӣд сат. Wа̄δен фикр чӯд иде̂, wа̄δ бу̊тента аз дух̇манен wев халосчӣд ва̄рδийен.

Wи ма̄ла̄йанд йакбораϑ қарори сут. Подх̇ойат wи мему̊ненен хоҷ пи х̇оҷ тар бурҷ чӯх̇т. Йамти одам δуст пеδо сутху нома̄лум га̄пени нивишт. Йича̄йаϑи на wи х̇е̂йдоw ва̄рδодат, найен wи ма̄нӣ фа̄мт. Подх̇о ра̄нг сафед сутху wи поδенен мис дараw лаɣʒа̄ сат. Йуйи wи нивишчин ма̄нӣ нафа̄мтат, амо ик дийи фа̄мт иде̂, ик ди коранд баша̄нд оқибат нист.

Йуйи хах̇аϑ wа̄ғаст δодху римоди Бобил ду̊нишманденат ҷодугарен тар wи хез вен. Балтшасари wевард wа̄да̄ δод иде̂, арча̄йта wи нивишчин ца х̇ойд, йута зарат тило wирд да̄ких̇т, амо йича̄йаϑи wи х̇е̂йдоw нава̄рδод.

Йеданд wи на̄н йатху лу̊ди: «Ту дарборанд Донийол ну̊м одам йаст. Wинд рӯи Хуδой wи қати. Набукаднесари ху даwрайанд фукаϑ ду̊нишманден хӯҷайӣн wи не̂δд».

Донийолен тар Балтшасар хез вӯдху йуйи лу̊д: «Wузум х̇уд тут ду̊нишмандат рӯи Худоwанд ту қати. Бобил ду̊нишманденен дев га̄пен ма̄нӣ нафа̄мт. Ага тута дев ма̄нӣ ца лу̊ви, ғула̄ тӯфата турд да̄кум.

Амо Донийоли wирд лу̊д: «Ту тӯфайен ла̄к туҷайаϑ менен, ат қадр мис йига одам ки! Wузта бе йичӣзаϑ wи нивишчин х̇ойумху wи ма̄нӣта лу̊м. Фукаϑ подх̇ойенат халқенен Хуδой миδуст, амо тут Хуδой ху диланд на анҷӯвдху туйат, ту ох̇ногу̊нат, ту ɣиненен, ху бадкирдорийат катаҷу̊ни қати ар ик wев ҷогайен шароб бирох̇т иде̂, аз ибодатху̊на̄йанден wев ца зох̇т.

Тамет ик wев нуқрайинат тилойи хуδойен ситоwах̇ чӯд иде̂, wа̄δ ца наwиненат, ца нах̇инен. Ат ику Хуδой иде̂, турди зиндаги ца да̄кчӯдат, пу̊нд турд ца дивест, Wийат ситоwах̇ начӯд. Йуйи ба̄д ди ҷа̄т δуст бох̇тху ма̄δ га̄пенен нивишчак сат: МНЕ̂, МНЕ̂, ТКЕЛ, ВУФАРСӢН.

Дев га̄пен ма̄нӣ дисга: «Хуδойи ту подх̇ойи рӯзен исоб чӯдху wа̄δен тайор сат. Туйи тирозити рибӯдху тут лап сабук нах̇тӯйд. Ту даwлатта δу тақсӣм су̊дху Модайат Форсарта да̄кчӯҷак су̊д».

Ик wам х̇а̄баϑен Балтшасар зӣд, ат Форс подх̇о, Курӯши Бобил анҷӯвд. Йу ра̄нг бақуwат даwлат Бобиланд ца вуд, йикеданд йу нест сут.