ТАФСУ̊Н ЧО

Йила̄в wахт наɣҷӣдат Набукаднесари ринӯх̇т иде̂, Донийол Хуδой – ақу̊ни йагу̊на̄ Хуδой. Йуйи римод иде̂, тилойи бут сохта̄ кинен, ла̄к фукаϑ мардум wирд саҷда̄ ких̇т. Ба̄ден ташкӣли чӯдху фана̄ мему̊ненат, Донийол ох̇нойенен мис қӣwд. Йаманден елу̊н чӯд иде̂, мӯсиқи садо дисут, фукаϑ бойад чизу̊н ху δенху wи бутард саҷда̄ кинен, ат арча̄йта ца наких̇т, wита ар тафсу̊н чо пите̂wен.

Йид базм сар сутху, мӯсиқи садо биланд сутат, ба ғайр аз wев йош йаӯдийен дигайенен фукаϑ ху чизу̊н δодху, wи тилойи бутарден саҷда̄ чӯд. Набукаднесар хизматгоренен дар борайи ди wирд хабар δод. Йуйи римод wев видоwху, лу̊ди wевард: «Тамата ди тилойи бутард саҷда̄ ца накинет, wузта римӣм ар тафсу̊н чо тама пите̂wен»

Амо Шадракат, Мешакат, Абднаҷӯйен подх̇ойард лу̊д:

«Ику Хуδой иде̂, ма̄ш wирд хизмат ца кина̄м, Wинд лап бузург қудрат. Йу ва̄рδед а̄м аз ту азоб ма̄ш халос ких̇тат, а̄м аз тафсу̊н чо дарӯнанд зинда̄йаϑ ма̄ш зиwе̂δд. Амо ага Йу ик ди хойих̇ ца наких̇т мис, ма̄шта wити мис ту хуδойенард хизмат накина̄мат, тилойи бутардта мис саҷда̄ накина̄м»!

Набукаднесари ба̄д римод ар чо лапаϑ йоц кинен. Ху сар бақуwат аскаренарди лу̊д иде̂, дев аравӣр вӣсетху ар чо пите̂wет. Аз wам чо дарӯнанд дисга хах̇ таф нах̇тӯйд иде̂, wа̄δ аскаренен пиδидху моден. Ат Шадракат, Мешакат, Абднаҷӯйен вӣсчинаϑ ар чо wе̂х̇т.

Подх̇ойи ик ди фукаϑ wӣнтху, а̄м айру̊н сутат, а̄м са̄манд δод. Йуйи чӯхт ар чо дарӯн арчӣзцага аҷойибард кор вуд, ба̄ди ху wазӣрен пех̇цт: «Ма̄ша̄м арай одам вӣстху, ар чо дарӯна̄м wев напите̂wдна̄?

Wи wазӣренен wитийаϑ ҷаwоб δод: «У̊н».

Ат Набукаднесари ба̄д лу̊д: «Хе̂р wуз wинум иде̂, цара̄нг цавор одам wи йоц дарӯнард беғамаϑ қадам δенат йицайаϑ wевард нист!»

Йу тар wам чо хез йатху хах̇аϑи қӣwд: «Е Шадракат, Мешакат, Абднаҷӯ, тамет Хуδойи Таоло бандайен! Нах̇тийетху тар му хез йадет!

Ба̄ден арай нафар нах̇тойдху тар подх̇о хезен сат. Подх̇о wазӣренат хизматгоренен чӯх̇т иде̂, йу йоци на wев ғӯнҷ ϑуδҷат на wев луқ, аз wев δудбу̊й мис навуд. Йид лап аҷойиб вуд, ду̊н ҷа̄т wа̄δ бақуwат аскаренен wам чо ғе̂вецаϑ ца йат, пиδе̂денху моден.

Набукаднесар маҷбӯр сут ик wи Хуδой қудратард боwари δӣд иде̂, wа̄δ йаӯди йошенен Wирд саҷда̄ ца чӯд. Йуйи ростаϑ лу̊д: «Шукр Шадракат, Мешакат, Абднаҷӯ Хуδойард иде̂, Йуйи ху фарих̇та̄ бох̇тху, ик wе̂в бандайен иде̂, wев дилпури пи Wи ца вуд, наҷоти wев δод. Wа̄δен аз ху ҷу̊н мис х̇оҷ наδӯйд, ди ҷа̄тен ба̄д ба ғайр аз ху Хуδой йичиду̊мга хуδойард хизматат саҷда̄ начӯд!»

Набукаднесари wев арай ох̇ново тар wев корат wазӣфа̄ вудху, фана̄га урматат қадрийи wев чӯд.