ДОНИЙОЛ АР ШЕРЕН ЧО

Форсат Модай фарму̊ненанд дисга хосийат вуд иде̂, wевен фук wахт иҷро чӯд. Ага подх̇ойи фарму̊н дасхат ца чӯд, wирд мис уқӯқ навуд иде̂, йу wам бида̄л ких̇т. Донийоли мис ба̄д аз йичанд wахт дар борайи wам наw фарму̊н х̇уд. Амо йуйи пироки ҷиноw рӯзанд ара пӣδ Худоwандард саҷда̄йат дуо чӯд.

Ик тар wи ма̄ла̄йи йу дуо ца чӯд, wинден wи тоқен йет вад, ди ҷа̄т ба̄д wа̄δ дарбор мардумен тар дарго ца вад, wи садойен х̇уд. Wа̄δен дед тар wи ма̄ла̄ху анҷӯвден wи.

Ба̄ден йат тар Дорйовеш хезху, арчӣзен ца wӣнтат ца х̇уд, фукаϑен wирд нақл чӯд. Подх̇ойанд wи қа̄р хах̇аϑ сифӣдху лу̊ди: «Wуз боwар накинум! Тама му ох̇нойат му сар баша̄нд муоwинти ту̊мат ма̄кет... Wузта дисга тама нала̄кум!»

Йӣw аз wеванди ба̄д лу̊д: «Е бузург подх̇о, ма̄ш wирд йичӣзаϑ бади хойих̇ накина̄м, амо қонӯн ик дисга тила̄пт».

Подх̇ойи хах̇аϑ лу̊д: «Ту фа̄нд δа̄δи! Тамет Донийол нест чичӣд, ди ҷа̄тет му розӣ чӯдху, wузум wам фарму̊н дасхат чӯд! Бесет аз му цем пиройанд!»

Дорйоwеш хафайизор сут. Йуйи ик wам рӯз холи фикр чӯдат, ху wазӣренат ох̇ногу̊н қатийи мусла̄т чӯд. Амо йича̄йаϑи нафа̄мт wам фарму̊н қати чӣз илоҷ кинен. Подх̇о Дорйовеш хафа̄йаϑ тӯйд тар Донийол хез, ат йу ди wахтанд шерен чо хезанд wирӯвҷин вуд. Донийолен ар чо чипите̂wд ца сат, wев шерененарден йичанд рӯз йичӣзаϑ наδод, ла̄к wа̄δ маɣʒу̊нҷизор вийен.

Дорйовеши малолаϑ ху δуст рибӯд Донийол сӣвдтиху лу̊ди: «Ног Ику Хуδой иде̂, ту wирд аз дилат ҷу̊н хизмат ца кини, йордамта турд ких̇т».

Подх̇ойи ба̄д римодху, Донийолен ар чо пите̂wд.

Дорйовеши wам рӯз йичӣзаϑ нахӯд, ат х̇а̄би мис хӯδм wи найод. Са̄раки, наw хӣр пал чӯдат, йу wитийаϑ тар шерен чо хез сутху, қӣwди: «Донийол! Донийол, тут зинда̄йо, Ту Хуδойи ту наҷот δодо?»

Аз wам чо дарӯнанд оста̄йаϑ Донийол садо нах̇тӯйд: «У̊н е подх̇о! Хуδойи Ху Фирих̇та̄ бох̇тху, йуйи мев шерен ғе̂в чуст чӯдху, ма̄δен пи му нарафт».

Ба̄ден wитийаϑ Донийол аз wам чо дарӯнанд зиwост. Подх̇о хушизор сутху, лапаϑ сабуки ху йис чӯд. Йу тар дарбор йатху римод иде̂, wев Донийол дух̇манен ар шерен чо пите̂wен.

Ба̄ди ху мамлакатанд фукаϑ хӯҷайӣненард дисга фарму̊н нивишт: «Арцу̊нд мардум му мамлакатанд ца, аз нуранд бойад Донийол Хуδойард саҷда̄ кинен, ду̊н ҷа̄т Йу ақу̊ни Хуδой. Йу ва̄рδед мӯҷизайен дивестат одамен наҷот δӣд. Wинд Wи подх̇ойи бар мунд азор маротиба̄га лапдийат, йу Wи подх̇ойита абади рист».

САWОЛЕН

1) Донийоли дар борайи Дорйовеш наw фарму̊н ца фа̄мт, чӣри чӯд?

2) Донийолен ар шерен чо чипите̂wд ца сат, Дорйовеши wирд чӣз лу̊д?

3) Донийол аз чо дару̊нанд зинда̄йаϑ нах̇тӯйдху, Дорйовеши цара̄нгин фарму̊н зиwост?