АСӢРИ

Ба̄д аз wи иде̂, Сулайму̊нанд йи ғула̄йат бой даwлат wи миδуст ца вуд, бех̇ди аз сесад сол наɣҷӣд.

Ба̄ди wи мӣдоw йу даwлат δу қисм сут. Асоси х̇а̄р ғал Ерусалӣм вуд. Йаманд подх̇о дарбор вуд, ат сар асоси йаманд ибодатху̊на̄ вад иде, Сулайму̊ни ху даwра̄йанд wам ца мӣзд. Шич ди замӣн ну̊м Йаӯдо вуд.

Афсӯс иде̂, а̄м подх̇ойат, а̄м халқи аз Хуδой ху пӣц гарδент, wа̄δен Wи қонӯнен иҷро начӯд, ат бардирӯғ хуδойенат бутенарден саҷда̄ чӯд. Хуδой пайғумбаренен мардумард wа̄з х̇е̂йдат, тӯба̄ чӣдоwен wи римод, амо wеви йича̄йаϑ наниғух̇т.

Хуδойи ба̄д wи халқ тора ҷазо вӯдху, Бобил мардуми wев мамлакат анҷӯвд.

Йаӯдийенард сар хатарнок дух̇ман Бобил подх̇о, Набукаднесар вуд. Йу ху лих̇кар қати йат тар Ерусалӣмху wи подх̇ойи анҷӯвд, аз ибодатху̊на̄йанди фукаϑ тилойийат нуқрайин ҷогайен зох̇тху wеви тар Бобил, тар бардирӯғ хуδой ибодатху̊на̄ йод. Арчӣз бойгари ибодатху̊на̄йандат Сулайму̊н дарборанд мис ца вуд, Бобил мардуми фукаϑ wи зох̇т. Wа̄δен фукчӣзаϑ цифтху, подх̇о дарборат, ибодатху̊на̄йат, йаӯди хӯҷайӣнен чӣденен фукаϑ пиδид.

Набукаднесари йошенат, подх̇о паценат, йаӯди хӯҷайӣненат, wӯвд азор йаӯди аскаренат, фукаϑга устоδенат сипинмозӣҷен асӣр анҷӯвдху, тар Бобили йод.

Ик дисгайен Йаудойат Ерусалӣм Набукаднесар миδуст сат. Худоwанди ик дити Ху гунокорат сахра̄ халқ ҷазо δод. Исроӣл мардум тар асӣри wе̂х̇тху бойад фа̄мчати иде̂, Худоwанд – йид ақу̊ни Хуδой, ат бутенен – бардирӯғ хуδойен.

САWОЛЕН

1) Худоwанд халқи Wи ниғух̇то?

2) Йаӯдийенанд wев ақу̊ни дух̇ман ча̄й вуд?

3) Бобил мардуми Ерусалӣм цара̄нг чӯд?