НИНВЕ МАРДУМТА ТӮБА̄ КИХ̇Т

Ба̄д аз йичанд афта̄ Йунус ғула̄ х̇а̄р кучайенва тӯйдат, Хуδой га̄пени фукаҷо па̄н чӯд: «Ба̄д аз чил рӯзта Нинве нест су̊д».

Аҷойибард, йича̄йаϑи wи га̄пен қати wи нашӣнтат, найен wи δодат, найен х̇оҷ wи чӯд. Баракс, мардуми wи га̄пенард боwар чӯд. Худоwанди ик ди укм wевард ца чӯд, йид wевард wоҷиб вуд, ду̊н ҷа̄т wа̄δен фана̄ халқен қати δе̂д чӯдат, лапаϑ бадкирдорийен чӯд. Wа̄δен ба̄д хубаϑ фа̄мт иде̂, йид wев бадкирдорита бе ҷазойаϑ нарист.

Подх̇ойи мис дар борайи пайғумбарат дар борайи укми Худоwанд х̇удху, лу̊ди: «Ла̄к фукаϑ мардум Хуδойард дуо кинен. Йаст Йу ма̄шард бахих̇ ких̇т. Ла̄к фукаϑ рӯза̄ анҷенат, ба ҷойи қиматбао луқ буҷӣнакин луқ пине̂ʒен. Йид ла̄к них̇у̊найи тӯба̄ чӣдоw вид».

Ба̄д аз чил рӯз Йунус х̇а̄р хезанд пи йи биланд ҷой сифӣдху, азамтийи чӯх̇т, ку Нинвета цара̄нг нест су̊д. Амо йичӣзаϑ насут. Йа̄ рӯз вега̄ сатат Нинве ғалаϑ ху ҷойти вуд. Йунус қа̄р ба̄д сифӣд. Йуйи пас чӣзард дар борайи укми Хуδой хабар δод? Шичард Нинвейанд йу бадкирдор мардум ца мӯɣҷат, йид саwоб кор вуδҷат.

Ик wи биландити Йунус гӣр ца сут, йамти лап га̄рм вуд, ба̄д ди ҷа̄т мис wи қа̄р сифӣд. Амо йу са̄раки ага̄ ца сут, чӯх̇ти wи па̄линди йи ғула̄ гул вуд. Йунуси тар wи па̄ркен бӣр ху δодху, дӯсикга бӣдийи ху йис чӯд. Йид қудрати Хуδой вуд иде̂, йу гул йаманд йи х̇а̄бтийаϑ ғула̄ сут. Амо йига рӯзи Хуδой дис чӯд иде̂, йу гул wитийаϑ қоқ сут.

Йунус ди ҷа̄т хах̇ малол сут. Хуδойи ба̄д wирд лу̊д: «Йида wӣнтато, тут ди гул ҷа̄т малол сут, ат тут на ди не̂δдат, найат дити кор чӯд. Ат wуз цара̄нг Нинвети ра̄м ма̄кум, хе̂р йаманд фана̄ мардум зиндагӣ ких̇т». Йунуси ба̄д фа̄мт иде̂, Худоwанд цара̄нг ме̂рубу̊нат батоқатат, цара̄нг фукардаϑ бахих̇ кихт.

САWОЛЕН

1) Йунуси тар Нинве дар борайи чи нақл чӯд?

2) Нинве мардуми wи га̄пен цара̄нг қабӯл чӯд?

3) Худоwанди Нинве цара̄нг чӯд?