ЙУНӮСАТ WИ РИЦӢСТОW

Қадӣм даwра̄йанд Хуδойи Ху га̄п подх̇ойард йо мардумард фире̂птоw ҷа̄т махсӯс одамен интихоб чӯд. Wевен пайғумбарен лу̊д. Wа̄δен бойад Хуδой фарму̊нен иҷро чӯҷат. Йӣw аз wеванд Йунус вуд.

Йакбори Хуδой аҷойиб кор wи римод: «Йунус, са тар Нинвеху дар борайи Хуδой нақл ки!»

Йунуси аwал фикр чӯд иде̂, йид wи тар ғу̊ɣ йат. Нинве Ашшӯр замӣнанд сар ғула̄ х̇а̄р вуд, ат Ашшур хубаϑ ғула̄йат бақуwат даwлат вуд. Йу Исроӣл амсойа̄ вуд.

Тарам дар борайи Хуδой нақл чӣдоw лап қӣн вуд! Йу мардумта фукаϑ wи шу̊нт. Тарамта wи дийен йо софаϑта зӣнен wи. Йунуси ху диланд лу̊д: «Най, тар Нинвета wуз наса̄м!» Йуйи Хуδой фарму̊н иҷро чӣдоw хойих̇ начӯдху, софаϑ чи рицӣст сутху, тар бегу̊на мулк ҷой ху чичӣд вуд. Йуйи ху пу̊ндпӯли да̄кчӯдху, сифӣд пи ких̇тӣху тӯйд.

Сар пиро фукчӣзаϑ баша̄нд вуд, йичӣзаϑ қӣни навуд.

Амо ба̄рвайен хелак тойдат, хах̇ х̇ӯʒ андӯйд. Wам ба̄р маwҷенен биландди сат. Йу мардум са̄манд δод. Wевард дисга дивих̇т иде̂, йа̄ ких̇тӣ таш бун нӣϑт. Wа̄δен ба̄д хах̇аϑ ху хуδойен дараw қӣwд сат: «Йордам ма̄шард кинет! Зиwе̂δет ма̄ш! Е хуδойен, ку ма̄ш садо х̇инет!»

Амо йу х̇ӯʒ соф хах̇ди сут. Ат Йунуси чӣр чӯд? Хе̂р йуйи зинда̄ Хуδой фа̄мт. Йуйи мис дуо чӯдо? Най, ду̊н ҷа̄т йуйи хойих̇ начӯд иде̂, Хуδой байоδ δед. Йу ких̇тӣйанд ар wам тагов ха̄вдху х̇овд. Амо ких̇тӣ хӯҷайӣн йатху, ага̄йи wи чӯдху, лу̊ди: «Ага тунд Хуδой ца вид, андиʒху дуо wирд ки! Ту наwинийо, ма̄ш бун ца ниϑам?»

Йунуси фикр чӯд иде̂, йид х̇ӯʒ тар wийат тар wи рицӣстоw арчӣзца дахл йаст. Амо йуйи Хуδой қати га̄пδе̂д хойих̇ начӯд. Wа̄δ ких̇тӣ хӯҷайӣнен тар

йакдигар лу̊д:«Вет қура̄ пите̂wа̄м. Дисгата ба̄д фа̄ма̄м иде̂, Хуδой ку чи ҷа̄т ми х̇ӯʒ қати ма̄ш ҷазо δӣд. Йид қура̄ Йунусти wе̂х̇т.

Wа̄δен аз Йунус пех̇цт: «Тут ча̄й, тут чӣр чӯҷху Хуδой аз рӯи ту ма̄ш мис ҷазо ца δӣд?»

Йуйи wевард ҷаwоб δод: «Wузум ик wи Хуδой банда̄ иде̂, Йуйи замӣнат, осму̊нат х̇ац офарӣд ца чӯд. Амо шичум аз Wи рицӯст. Йуйи му тар Нинве бох̇т, амо wузум тарам ситтоw хойих̇ начӯд».

Wа̄δ хӯҷайӣненен хубаϑ нафа̄мт иде̂, Йунус қати чӣрен.

Йуйи wевард лу̊д: «Зет муху ар ба̄р му пите̂wет! Ба̄дта йам х̇ӯʒ қарор ких̇т. Дун ҷа̄т икам бало аз рӯи му тама тора йат».

Wа̄δ на̄ла: «Най, ма̄шта дисга кор накина̄м».

Амо wа̄δен чӯх̇т иде̂, ачгайен нава̄рδодху, аз Йунӯс Хуδойен бахих̇ тила̄птху, wийен аз ких̇тӣти ар х̇ац пите̂wд.

Йу х̇ӯʒ wитийаϑ қарор чӯд. Wа̄δен аwал ик ди wоқийа̄йард боwар мис начӯд, амо ба̄д аз йичанд дақӣқа̄йен чизу̊н ху δодху, ақу̊ни Хуδойарден дуо дараw чӣд сат.

Ат Йунус цара̄нг сут? Йу бун нӯсто?

Най! Хе̂р Худоwанди хойих̇ начӯд иде̂, Wи пайғумбар мӣрт. Йуйи хойих̇ чӯд ла̄к Йунус тар Нинве су̊дху дар борайи Хуδой нақл ких̇т. Ди ҷа̄ти ба̄д Хуδой ғула̄ мойи бох̇тху, йа̄йи ба̄д аз Йунус абох̇т.

Пайғумбар ара х̇абу̊нарӯз ар wам мойи дарӯн ред. Йуйи ик ди wахтанд Худоwандард дуо чӯд. Ба̄ди Худоwанд wам мойи римод иде̂, аз Йунус тар қоқи туф ких̇т.

Йунус ба̄д тар қоқи wе̂х̇тху, фикрийи чӯд: «Хуδойанд аҷаб зӯр қудрат вуδҷ! А̄м хӯʒ wи ниғу̊ɣдат, а̄м ар х̇ац айwу̊нен wи ниғу̊ɣен».