МАЛИКА̄ САБО
Китоби Муқадас, «3 Подх̇ойен» китоб, 10 боб
Сулайму̊н ну̊м фукаҷо па̄н сут. Дар борайи wи хушрӯй ма̄лайенен фукаҷо фа̄мт. Фана̄ мардум wам хушрӯй ибодатху̊на̄ чӣх̇тоwат, Сулайму̊н га̄пен ниғих̇тоw ҷа̄т тар Ерусалӣм йат. Йӣw аз wеванд малика̄ Сабо вад.
Йа̄ хубаϑ мис лап бой вад. Йа̄йи ик wев тӯфайен подх̇о Сулайму̊нард ца вӯд, аз динди wам бойгари ма̄лум сут. Х̇итуренти аррақамаϑ атрийенат, тилойат, қиматбао жӣрен wӣз вуд. Ик ди фукаϑ бойгарийен лапаϑ ғулу̊мен пу̊ндард пайраги чӯд.
Сулайму̊ни wам ну̊ми мему̊н подх̇ойи қойдаен қати қабӯл чӯд. Малика̄ Сабойи арчӣзаϑ wи пех̇цтат, арчӣзга wам диланд ца вуд, дар борайи фукчӣзаϑи wи қати нақл чӯд. Сулайму̊ни wам фукаϑ саwоленард ҷаwоб δод, ат ик дисга йичӣз навуд иде̂, йуйи wи нафа̄мт. Малика̄ Сабойи wи чӣдат, wи аwқотат, wи ғулу̊мен ма̄лайенат, wи хизматгорен луқат, қурбу̊нийени Худоwанд ибодатху̊на̄йанд ца чӯд, wӣнтиху, wи хиради фа̄мтху, айру̊наϑ ред.
Йа̄йи ба̄д Сулайму̊нард лу̊д: «Арчӣзен дар борайи ту хирадат, ту бойгари мурд ца лу̊д, фукаϑ рост вуδҷ, амо wузум ху цем қати ми wӣнтху, фа̄мтум иде̂, мурден ғал дар борайи нӣми ми мис нақл начӯҷ! Арчӣзум wуз ца х̇уδҷ, йу хурд йичӣзаϑ навуδҷ, ат ақу̊ни ту хирад лап зийод вуδҷат, тут лап зӯр кор чӯҷ. Шукр Худоwандард иде̂, Йуйи ту интихоб ца чӯҷху, подх̇ойи ту ца не̂δҷ! Хуδойанд wи ма̄бат тар Исроӣл абади, Йуйи ди ҷа̄т ту подх̇о не̂δд!»
САWОЛЕН
1) Малика̄ Сабо чӣзард тар δар сафар нах̇тойд?
2) Йа̄йи тар Исроӣл чӣз wӣнтху айру̊наϑ ред?
3) Йа̄йи Сулайму̊нард чӣз лу̊д?