ХУΔОЙАРД ИБОДАТХУ̊НА̄ МӢЗДОW

Худоwанди Сулайму̊н подх̇ойийард баракат δод. Wи мамлакатанд серийат пури вудат, амсойа̄ халқен қати wинд баша̄нд муносибат вуд. Амо Сулайму̊нанд йи ғула̄ кор аз пиро вуд – Худоwандард ибодатху̊на̄ мӣздоw.

Ба̄д аз Миср нах̇тӣдоw чорсаду аштод сол наɣҷӣдат, исроӣлийенен ибодатху̊на̄ мӣздоw сар чӯд. Сулайму̊ни ху та̄т Доwӯд ох̇но Иром қати суле̂ чӯд. Йу Сӯрат Сидон ну̊м х̇а̄рен подх̇о вуд. Wа̄δен мусла̄т чӯд иде̂, Иромта ибодатху̊на̄ мӣздоwард қиматбао δоргат жӣр бе̂зд, ат аз Исроӣлта тарам харчат хурок йосен.

Дам ибодатху̊на̄ен wӯвд солти мӣзд. Wамарди Доwӯд ху wахтанд нақша̄ чӯдху, пиро аз ху мӣдоwи wи Сулайму̊нард да̄кчӯд. Ҷойи мис wамард Доwӯд пи Мӯрийо кӯ интихоб чӯд. Ик пи ди кӯйи пигоϑ wахтен Иброӣм Хуδойард ху садоқат дивих̇тат, Хуδойи Исоқард wи ҷу̊н бахих̇ чӯд.

Wам ибодатху̊на̄йанд δу қисм вуд. Wи йӣw ну̊м «Муқадас» вудат, wи йигайанд «муқадасен Муқадас». А̄д сандӯқ тар муқадасен Муқадас барҷой вад. Йу аз дига ма̄лайен пи тӣрди вуд, ат аз wийат Муқадас мобайнанд ға̄фс кола̄ қати парδа̄ вуд.

Муқадасен Муқадас ма̄ла̄йанд тоқ навуд, йу бойад торик вуδҷат. Китоби Муқадасанд wи ну̊м «Хуδой қати га̄пδе̂дард ҷой», ду̊н ҷа̄т йаманд Хуδой нонамойу̊наϑ озир вуд.

Ибодатху̊на̄ мӣздоwен тайор чӯдху, wамен ба дабдаба̄йаϑ муқадас гарδент. Худованд а̄д сандӯқен тар ибодатху̊на̄ ца вӯд, Сулайму̊ни фукаϑ пӣренат, хӯҷайӣненат, Исроӣл қабӣлайенанд wев робарен мис қӣwд.

Рӯу̊ни робаренен а̄д сандӯқ тар муқадасен Муқадас рибӯдат, ди wахтанд абри ха̄вдху ибодатху̊на̄йи пур чӯд.

Йеданди Худоwанд дивих̇т иде̂, Йу аз мардум кор розӣ сутху wев хезанд озир сут!

Ба̄д Сулайму̊н дил пур сут иде̂, ибодатху̊на̄йи ца мӣзд, йид wи кор аз тарафи Худоwанд қабӯл сут.

САWОЛЕН

1) Чӣзарди подх̇о Иром Сулайму̊нард йордам чӯд?

2) Ибодатху̊на̄ мӣздоw цу̊нд сол даwу̊м чӯд?

3) Муқадасен Муқадас тар ибодатху̊на̄ чӣзард даркор вуд?

4) А̄д сандӯқен тар ибодатху̊на̄ ца wеδд, чӣз га̄п сут?