СУЛАЙМУ̊НТА ХИРАД ИНТИХОБ КИХ̇Т

Доwӯди пиро аз ху мӣдоw фукаϑ Исроӣл робарен Ерусалӣманд ҷа̄м чӯдху лу̊ди wевард иде̂, wинд нийат вуд хирго ҷойтита Худоwандард ибодатху̊на̄ мозд.

Амо Худоwанди Доwӯдард ди насӣб начӯд, ду̊н ҷа̄т йуйи лап δе̂д чӯд.

Доwӯди лу̊д: «Му пуц Сулайму̊нта ибодатху̊на̄ мозд. Худоwанди мурд wа̄да̄ δод иде̂, ага Сулайму̊нта Wи амрийен иҷро ца ких̇т, Йута wи чостат, wи ғалаϑ мис бақуwатди ких̇т.

Доwӯди фукаϑард лу̊д иде̂, Худоwанд амрийен иҷро киненат, аз дили ҷу̊н Wирд хизмат кинен. Ба̄ден фукаϑ хӯҷайӣненат, фукаϑ Доwӯд пацен қасам хӯд иде̂, наw подх̇о, йа̄ни Сулайму̊нардта итоат кинен.

Худоwанди Сулайму̊нард баракат δодху, йу ба̄д бузург подх̇о сут. Wийен на фақат wи мардум ду̊нд, жӣwҷ чӯд, ат бегу̊на̄ халқи мис wи урмат чӯд.

Сулайму̊н наw подх̇о сутху аз дилу ҷу̊ни Худоwандард қурбу̊ни чӯд. Йи х̇а̄б Худоwанд хӯδманд Сулайму̊нард озир сутху лу̊ди: «Арчӣз хойих̇ тунд ца вид, лу Мурд» Сулайму̊ни ба̄д лу̊д: «Тут фук wахт му та̄т чӯх̇тат, муйат ба̄ди wи подх̇о не̂δд. Амо wузум ғал йошат му лайоқат мис ка̄м, ди ҷа̄т wуз хойих̇ум ху банда̄йард ақлийат

Сулайму̊ни ба̄д лу̊д: «Тут фук wахт хирад да̄к, ла̄к Ту халқти робари ва̄рδӣмат, некийат бади аз йакдигар фарқум, ага най ик ми Ту лапаϑ халқти робари чӣдоw мурд қӣн» Худоwанди ба̄д wирд лу̊д: «Тут ба ҷойи бойгарийат дароз умр хирад талаб ца чӯд, Wузта ту хойих̇ иҷро кинум. Ба ғайри дита Wуз турд дисга бойгарийат қадр да̄кум иде̂, аз wи ғал то шичец йичиду̊м подх̇ойанд навуδҷат ба̄ди тута мис насу̊д. Ага тута мис ху та̄т Доwӯд ҷиноw Му қонӯненат Му амрийен иҷро ца кини, Wузта ту умри мис дароз кинум».

Сулайму̊н ага̄ сутху арчӣзи Хуδой хӯδманд wирд wа̄да̄ ца δод, wи ҷа̄ти Wирд шукрат чӯд. Йи рӯзен δу ɣиник кӯдак қати тар подх̇о хез йатху, хойих̇ен чӯд иде̂, йу wев шара̄т а̄л ких̇т. Йӣw аз wеви ба̄д подх̇ойард лу̊д: «Ма̄ш йи чӣданд зиндаги кина̄м, ма̄шанд варϑанд йи рӯзанд пуц сут. Йи х̇а̄б мам ɣиник пуц мӯд. Йами ик ди фа̄мтху, wузум ғал х̇е̂вʒин вадат йами му пуц хурд зох̇т, ат wи ху мӯɣҷин пуци му хезанд рибӯд».

Йа̄ йига ɣиники wам га̄п х̇ичух̇тху лу̊ди: «Най, му пуц зинда̄, йу мӯɣҷин кӯдак тунд». Ик дитийен ба̄д подх̇о пиронди шара̄т чӯд. Йид қӣн масала̄ вад, ди ҷа̄тен ба̄д фукаϑ пи подх̇о га̄п ност. Сулайму̊ни ху хизматгорард лу̊д: «Са шамшер ваху, ди ғаδабуц δу ка̄нд киху, йи қисм дам йи ɣиникард да̄кат, йига қисм дам йигайард да̄к!»

Ба̄д ика̄ ɣиник иде̂, wам пуц зинда̄ ца вуд, хах̇аϑи лу̊д:«Е подх̇о! Ди кӯдак ма̄зӣнет, ди зинда̄йаϑ дамард да̄кет!»

Йа̄ йига ɣиники ба̄д лу̊д: «Х̇ичандет ди, ла̄к на дамард су̊дат на мурд!» Ик дитийи ба̄д подх̇о фа̄мт иде̂, wи кӯдак на̄н ча̄й вад. Йа̄йи ба̄д зинда̄йаϑ wи зох̇тху тойд!

Исроӣл мардуми фукаϑ х̇уд иде̂, подх̇ойи цара̄нг хирад қати кор чӯд, ба̄ден соф лапди wи урмат чӯд, ду̊н ҷа̄т фа̄мтен иде̂, ик ди хиради wирд Хуδой да̄кчӯд, ла̄к мардум рости қати укм ких̇т.