САНДӮҚ ПИ СИОН КӮ

Оқибатард Доwӯд подх̇о сут, ар ра̄нги Хуδой wирд wа̄да̄ ца δод. Йу Байт-Ла̄манд таwалуд сутху, йамандаϑи чӯпу̊ни чӯд, амо подх̇о ца сут, дигайи тар Ерусалӣм зиндаги чӯд.

Ерусалӣм хушрӯй х̇а̄р вуд. Йу йичанд да̄х̇тенард мӣзҷин вуд. Йӣw аз wев да̄х̇тен ну̊м Сион кӯ вуд. Доwӯди ик ди кӯти хурд қаср мӣзд. Йуйи Хуδой лап жӣwҷ чӯд, ди ҷа̄ти ба̄д хойих̇ чӯд ла̄к Хуδой сандӯқ wирд наздӣк вид. Ба̄д Доwӯди ху тайори чӯдху тӯйд пис wам сандуқ.

Доwӯд қатийен фана̄га рӯу̊ни робарен вад.

Йу мардум мис подх̇о да̄мти тӯйдат, аррақамаϑ асбобентийен ниwе̂зд. Йӣла̄вҷа тирум вудат, йӣла̄вҷа на̄йат, йила̄вҷа да̄фат, йила̄вҷага таблак вуд. Йид мардуми ам ниwе̂здат, амен мадо лу̊дат, Хуδой ситоwах̇ен чӯд. Доwӯд мис ди мардум қабатанд тӯйдат барбати ниwе̂зд. Аз зибойен рӯу̊ни робарен Хуδой сандӯқ қати вад.

Йид лап хушрӯй кор вуд, мардуми лап хушрӯй Хуδой ситоwах̇ чӯд! Фана̄га мардум нах̇тӯйдху тар wевен амро сат. Доwӯди барбат ниwе̂здат Хуδойи ситоwах̇ чӯд, ат мардуми wи ниғух̇т. Доwӯд ик дам рӯз лап хушбахт вуд!

Wам сандӯқен пи Сион кӯ сифент. Пи тӣр wи кӯ гаргинӯх̇а̄ деwол вудат, wи деwол мобайнанд дарвоза̄ вуд. Йид мардум наздӣкди сутат, wи дарвоза̄йен йет чӯд, ла̄к подх̇о деδдат, сандӯқга тарам wеδен. Доwӯди пиройаϑ римод иде̂, wам сандӯқард махсӯс ҷой киненху аз пиро кола̄ қати wам чуст кинен. Созиндайенен «Худоwанд ситоwах̇» мадо лу̊д. Wами йи wахт Доwӯд нивишт. Ик wам рӯзи подх̇о пи Сион кӯ Хуδойард қурбу̊ни чӯдху Исроӣл мардумарди баракат δод.

Доwӯд лап хуш вуд иде̂, Хуδой сандӯқ wи дарбор хезанд ца вад. Созиндайенен ар рӯз wам сандӯқ пиронди ниwе̂здат мадоен лу̊д.

Доwӯд фук wахт ху дарборанд навуд. Йуйи фана̄ wахтен фалиштийенат дигарга дух̇манен қати δе̂д чӯд. Амо арwахти Хуδой wийат wи одаменард йордам чӯдху, wа̄δен дух̇маненти ғалаба̄ ца чӯд, йу ба̄д аз δе̂д йат пи Сион кӯху, ху ғалаба̄ ҷа̄ти Хуδойард шукрат лу̊д.